បរទេស ៖ តម្លៃលុយគ្រីបតូបានធ្លាក់ចុះគួរឲ្យកត់សំគាល់កាលពីពាក់កណ្តាលឆ្នា២០២៤កន្លងមក ក្រោយពេលដែលទីផ្សារបានបន្តហក់ឡើងយ៉ាងខ្លាំងក្នុងរយៈពេលជិត១ទសវត្សរ៍ចុងក្រោយនេះ និងកំពុងធ្វើឲ្យមានភាពមិនច្បាស់លាស់ចំពោះក្រុមអ្នកវិនិយោគទៅលើលុយអេឡិកត្រូនិកមួយនេះ។

ប្រទេសភាគច្រើននៅលើពិភពលោកនៅតែមិនទាន់ទទួលស្គាល់ និងមានទំនុកចិត្តខ្លាំងចំពោះលុយឌីជីថលគ្រីបតូនៅឡើយ ដែលបានធ្វើឲ្យក្រុមអ្នកវិនិយោគ និងក្រុមអ្នកមានលុយគ្រីបតូកាន់នៅក្នុងដៃហាក់មិនទាន់មានជំនឿចិត្តក្នុងការចាយវាយ ឬវិនិយោគបន្ថែមឲ្យកាន់តែទូលំទូលាយនៅឡើយដែរ។ យ៉ាងណាក្តី នៅសប្តាហ៍នេះ បេក្ខភាពប្រធានាធិបតីអាមេរិក លោក Donald Trump បានចេញមកបង្ហើបប្រាប់អំពីផែនការដ៏មហិច្ឆិតារបស់លោកចំពោះទីផ្សារលុយគ្រីបតូ ហើយវានឹងក្លាយទៅជាដំណឹងដ៏គួរឲ្យរីករាយបំផុតសម្រាប់ក្រុមអ្នកវិនិយោគ ក៏ដូចជាក្រុមអ្នកដែលកាន់លុយគ្រីបតូផងដែរ។

តាមរយៈសារសម្លេងមួយដែលត្រូវបានបង្ហាញលើបណ្តាញសង្គម X អតីតប្រធានាធិបតីអាមេរិករូបនេះបានប្រកាសអំពីការគាំទ្រយ៉ាងខ្លាំងក្លាចំពោះទីផ្សារលុយគ្រីបតូដោយក្នុងនោះលោកសន្យាថានឹងរៀបចំឲ្យប្រទេសអាមេរិកអាចក្លាយទៅជាទីតាំងប្រមូលផ្តុំដ៏ធំមួយនៃលុយគ្រីបតូទាំងអស់ ឬ Cryptocurrency Capital។

លោកបានបញ្ជាក់ថា ៖

«ខ្ញុំសប្បាយចិត្តនឹងបង្ហើបប្រាប់អ្នកទាំងអស់គ្នាអំពីផែនការដែលធានាឲ្យសហរដ្ឋអាមេរិកនឹងក្លាយទៅជាទីស្នាក់ការកណ្តាលធំបំផុតក្នុងការចរាចរលុយគ្រីបតូបើទោះបីជាមានអ្នកណាព្យាយាមទាញយកអាជីវកម្មនេះចេញពីយើងក៏ដោយ»។

គួរបញ្ជាក់ថា លោក Trump គឺជាអ្នកជំនួញដ៏ជោគជ័យតាំងតែពីមុនពេលដែលគាត់ចូលប្រឡូកនយោបាយ ហើយវាក៏មិនមែនជារឿងថ្មីដែរសម្រាប់គាត់ក្នុងការប្រកាសគាំទ្រលើរូបិយវត្ថុឌីជីថលទាំងនោះ ដែលសូម្បីតែកូនប្រុសទាំង២ របស់លោក គឺលោក Donald Trump Jr. និង Eric Trump ក៏ទទួលបានការជ្រោមជ្រែងពីឪពុកក្នុងការបង្កើតក្រុមហ៊ុនរកស៊ីលើលុយគ្រីបតូផងដែរ ដែលគេស្គាល់ថា World Liberty Financial ឬជាប្រភេទវេទិកាដែលជួញដូរលុយគ្រីបតូជំនួសឲ្យការជួញដូរបែបបុរាណតាមរយៈប្រព័ន្ធធានាគារ decentralized finance (DeFi)។

យ៉ាងណាក្តី មិនដល់មួយថ្ងៃផងក្រោយការបង្ហោះសម្លេងដែលនិយាយអំពីផែនការ Cryptocurrency Capital នេះ ហើយគ្រុបឆាតតេលេឡេក្រាមរបស់ World Liberty Financial អាចមើលឃើញនូវការចូលរួមរបស់អ្នក subscribers ថ្មី និងអ្នកតាមដានផេកសរុបទាំងអស់ដល់ទៅជាង ៥៣០០០នាក់ភ្លាមៗ។

ដោយឡែក ព័ត៌មានមួយទៀតដែលត្រូវបានចេញផ្សាយដោយ The Crypto Wealth Report 2024 កាលពីសប្តាហ៍មុនដែរបានបង្ហាញថា ក្រុមអ្នកដែលមានកាន់កាប់លុយគ្រីបតូមានតម្លៃច្រើនជាង១លានដុល្លារនោះបានបន្តកើនឡើងដល់ទៅជិត២ដងក្នុងឆ្នាំ២០២៣ ដោយក្នុងនោះពាក់កណ្តាលគឺជាអ្នកវិនិយោគទៅលើលុយ Bitcoin។

របាយការណ៍ចេញពីប្រភពដដែលក៏បានបង្ហាញពីការកើនឡើងក្នុងអត្រាដល់ទៅ៨៩ភាគរយនៃតម្លៃទីផ្សារសរុបនៃទ្រព្យសកម្មលុយគ្រីបតូពី ១,២ទ្រីលានដុល្លារកាលពីឆ្នាំមុនមកដល់ ២,៣ទ្រីលានដុល្លារហើយក្នុងពេលបច្ចុប្បន្ននេះ៕