ភ្នំពេញ ៖ ថ្ងៃទី ២៤-២៥-២៦ ខែមីនា ឆ្នាំ២០២៤នេះ ក្រសួងឧស្សាហកម្មកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានរៀបចំប្រារព្ធនូវទិវាជាតិវិទ្យាសាស្ត្រ បច្ចេកវិទ្យា និងនវានុវត្តន៍» លើកទី២ ក្រោមប្រធានបទ « សហគ្រាសធុនតូច និងមធ្យម ឆ្ពោះទៅវិទ្យាសាស្ត្រ បច្ចេកវិទ្យា និងនវានុវត្តន៍»។ ព្រឹត្តិការណ៍នេះមានការចូលរួមពីក្រុមហ៊ុនឯកជនចំនួន ៣១២ ក្រុមហ៊ុន និងមានដាក់ស្តង់តាំងបង្ហាញនូវបច្ចេកវិទ្យាថ្មីៗជាច្រើនប្រភេទ ក្នុងនោះក៏មាននូវប្រភេទរ៉ូបូតផងដែរ។

ថ្លែងក្នុងសន្និសីទសារព័ត៌មាននាពិធីបើកទិវាខាងលើ ឯកឧត្តម ហែម វណ្ណឌី រដ្ឋមន្ត្រី​ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានឱ្យដឹងថា កម្មវិធីនេះគឺចង់​​បង្ហាញដល់​វិ​ស័យឯកជន ក៏ដូចជាសហគ្រាសធនតូច និងមធ្យម អំពីផលិតភាព សក្កានុពលនៃការធ្វើ​ស្វ័យប្រវត្តិកម្មចង្វាក់ផលិតកម្មរបស់កម្ពុជា។

ឯកឧត្តមបន្តឱ្យដឹងថា៖

« ការរៀបចំនូវទិវាជាតិលើកទី២នេះ គឺដើម្បីចែករំលែក និងពង្រឹងការចាប់​យកបច្ចេកវិទ្យា វិទ្យាសាស្ត្រ និងនវានុវត្តន៍ តាមរយៈការដាក់តាំងនូវពិព័រណ៍បច្ចេកវិទ្យា ហើយយើង​នឹងចូលរួមបង្ហាញពីភាពលូតលាស់របស់ឧស្សាហកម្ម និងសហគ្រាសធុនតូច និងមធ្យមរបស់យើង ដែលបានរួមចំណែកដល់ការបង្កើតនូវការងារ និងចូលរួមបង្កើននូវទំហំសេដ្ឋកិច្ចជាតិផងដែរ»។

ជាគោលដៅសំខាន់ ការដាក់តាំងបង្ហាញនូវបច្ចេកវិទ្យាថ្មីៗទាំងនោះ គឺដើម្បីជំរុញឱ្យម្ចាស់អាជីវកម្ម​ធុនតូច និងមធ្យម (SMEs) អាចមានគំនិតថ្មីៗក្នុងការនាំយកបច្ចេកវិទ្យាទៅប្រើប្រាស់ក្នុង​អាជីវកម្ម​របស់ពួកគេ ដើម្បីបង្កើនផលិតភាពនៃសង្វាក់ផ្គត់ផ្គង់។ ដើម្បីសម្រួលការងារនេះ ក្រសួងក៏បាន និងកំពុងរៀបចំកម្មវិធីជាច្រើនដើម្បីគាំទ្រអ្នកដែលចាប់​អារម្មណ៍ចង់យកបច្ចេកវិទ្យាទៅប្រើប្រាស់នៅ​ក្នុងអាជីវកម្មរបស់ខ្លួន ក៏ដូចជាជួយម្ចាស់អាជីវកម្មក្នុង​ការចាប់យកបច្ចេកវិទ្យាផងដែរ។

ក្នុងលក្ខខណ្ឌរួមមួយ ប្រជាជនទូទៅក៏ត្រូវតែដើរស្របទៅនឹងបរិបថឌីជីថលនេះផងដែរ ប៉ុន្តែដើម្បី​ប្រជាជនអាចឈានទៅចាប់យកបច្ចេកវិទ្យា លុះត្រាតែពួកគេបានឃើញនូវគុណតម្លៃបន្ថែមរបស់បច្ចេកវិទ្យា។ នេះបើតាមប្រសាសន៍របស់ឯកឧត្តមរដ្ឋមន្ត្រី។

ឯកឧត្តមបន្តមានប្រសាសន៍ទៀតថា ទិវាជាតិក៏ជាឱកាសដ៏កម្រសម្រាប់ម្ចាស់អាជីវកម្ម លោកគ្រូ-​អ្នកគ្រូ អ្នកស្រាវជ្រាវ សិស្សានុសិស្ស និងវិស័យឯកជន ដៃគូអភិវឌ្ឍន៍ចូលរួមចែករំលែក ក៏ដូចជាធ្វើការរួមគ្នាដើម្បីការអភិវឌ្ឍនូវប្រទេសជាតិ។ តាមរយៈទិវានេះក្រសួងសង្ឃឹមថាអាចផ្លាស់ប្ដូរនូវគំនិត បទពិសោធន៍ ក៏ដូចជាផែនការសម្រាប់សហប្រតិបត្តិការជាមួយដៃគូ ក៏ដូចជាបណ្ដាប្រទេសដែលកម្ពុជានឹងធ្វើសហ​ប្រតិបត្តិការជាមួយ​ជាក់ស្ដែងក្នុងពេលអនាគត៕