សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ យោងតាមប្រភពព័ត៌មានពី BBC បានចេញផ្សាយថា មូលនិធិរូបិយវត្ថុអន្តរជាតិ (IMF) បានលើកឡើងអំពីសេដ្ឋកិច្ចរបស់ចក្រភពអង់គ្លេសអាចនឹងធ្លាក់ចុះ និងមានដំណើរការអាក្រក់ជាងប្រទេសដែលមានសេដ្ឋកិច្ចជឿនលឿនផ្សេងទៀតក្នុងក្រុម G7 ដោយសារតម្លៃនៃការរស់នៅប្រចាំថ្ងៃនៅតែបន្តប៉ះពាល់ដល់ជីវភាពប្រជាពលរដ្ឋ។
IMF បានព្យាករណ៍ថា សេដ្ឋកិច្ចអង់គ្លេសនឹងធ្លាក់ចុះ ០,៦ ភាគរយនៅក្នុងឆ្នាំនេះ។ ការព្យាករណ៍ថ្មីនេះបានឆ្លុះបញ្ចាំងពីការឡើងថ្លៃតម្លៃថាមពលខ្ពស់ លក្ខខណ្ឌហិរញ្ញវត្ថុរបស់ចក្រភពអង់គ្លេស និងការឡើងអតិផរណាខ្ពស់។ IMF ក៏បាននិយាយផងដែរថា ផលិតផលក្នុងស្រុកសរុប (GDP) របស់ចក្រភពអង់គ្លេសនឹងធ្លាក់ចុះ ០,៣ ភាគរយនៅឆ្នាំនេះ ហើយចក្រភពអង់គ្លេសនឹងក្លាយជាប្រទេសតែមួយគត់ក្នុងចំណោមប្រទេសដែលមានសេដ្ឋកិច្ចជឿនលឿនរបស់ពិភពលោកដែលកំពុងទទួលរងនូវការធ្លាក់ចុះ GDP។
ប្រធាន IMF លោក Pierre-Olivier Gourinchas បាននិយាយថា ចក្រភពអង់គ្លេសមានកំណើនរឹងមាំ ៤,១ ភាគរយ ដែលជាអត្រាកំណើនដ៏ខ្លាំងបំផុតមួយនៅអឺរ៉ុបកាលពីឆ្នាំ២០២២ កន្លងទៅនេះ។ យ៉ាងណាមិញ វានឹងមានការធ្លាក់ចុះយ៉ាងខ្លាំងនៅឆ្នាំនេះ ដោយសារកំណើននឹងប្រែទៅជាអវិជ្ជមាន ដែលបណ្តាលមកពីការឡើងថ្លៃតម្លៃថាមពលខ្ពស់ និងការពឹងផ្អែកខ្ពស់លើហ្គាសធម្មជាតិរាវ។ ជាការឆ្លើយតបទៅនឹងអតិផរណាខ្ពស់នេះធនាគារកណ្តាលអង់គ្លេសបានធ្វើការរឹតបន្តឹងគោលនយោបាយរូបិយវត្ថុ។
នាយករដ្ឋមន្ត្រីចក្រភពអង់គ្លេស លោក Rishi Sunak បាននិយាយឱ្យដឹងថា លោកនឹងខិតខំកាត់បន្ថយអតិផរណាពាក់កណ្តាលនៅចុងឆ្នាំនេះ។ បញ្ហាប្រឈមរយៈពេលខ្លីមិនគួរទុកចោលក្នុងរយៈពេលយូរនោះទេ ហើយប្រសិនបើប្រកាន់ខ្ជាប់នូវផែនការក្នុងការកាត់បន្ថយអតិផរណាពាក់កណ្តាល នោះចក្រភពអង់គ្លេសនឹងត្រូវបានគេព្យាករណ៍ថាអាចនឹងកើនឡើងលឿនជាងប្រទេសអាល្លឺម៉ង់ និងជប៉ុនក្នុងរយៈពេលប៉ុន្មានឆ្នាំខាងមុខនេះ។
ស្របពេលជាមួយគ្នានេះ IMF បានព្យាករណ៍ថា សេដ្ឋកិច្ចចក្រភពអង់គ្លេសនឹងធ្លាក់ចុះ កំណើនសេដ្ឋកិច្ចនៅសហរដ្ឋអាមេរិកនឹងឡើង ១,៤ ភាគរយ អាល្លឺម៉ង់ ០,១ ភាគរយ បារាំង ០,៧ ភាគរយ អ៊ីតាលី ០,៦ ភាគរយ ជប៉ុន ១,៨ ភាគរយ និង កាណាដា ១,៥ ភាគរយ។ សរុបជារួម IMF បានប៉ាន់ប្រមាណថា អតិផរណាពិភពលោកបានឆ្លងផុតកម្រិតកំពូលរបស់ខ្លួន ហើយនឹងធ្លាក់ចុះពី ៨,៨ ភាគរយកាលពីឆ្នាំមុនមក ៦,៦ ភាគរយនៅឆ្នាំនេះ។
ទោះជាយ៉ាងណាក៏ដោយ IMF បាននិយាយថា នៅឆ្នាំ២០២៤ ខ្លួនរំពឹងថាកំណើនចក្រភពអង់គ្លេសនឹងឡើង ០,៩ ភាគរយ ដែលកើនឡើងពី ០,៦ ភាគរយ។ GDP គឺជារង្វាស់សម្រាប់រកមើលថា តើសេដ្ឋកិច្ចមួយកំពុងដំណើរការល្អ ឬអាក្រក់ប៉ុណ្ណា ហើយប្រសិនបើ GDP របស់ប្រទេសមួយធ្លាក់ចុះពីរត្រីមាសជាប់ៗគ្នា មានន័យថាវាស្ថិតនៅក្នុងវិបត្តិសេដ្ឋកិច្ច និងជាសញ្ញាមួយដែលថាសេដ្ឋកិច្ចរបស់ប្រទេសនេះកំពុងដំណើរការមិនល្អ។ នៅពេលដែលប្រទេសមួយស្ថិតក្នុងវិបត្តិសេដ្ឋកិច្ចក្រុមហ៊ុនសឹងតែទាំងអស់រកចំណូលបានតិច និងចំនួនអ្នកអត់ការងារធ្វើកើនឡើង៕
Account
Security
Favourite Content