ខេត្តព្រះសីហនុ ៖ រដ្ឋមន្ត្រីក្រសួងទេសចរណ៍បានបង្ហាញពីក្ដីរំពឹងថា នៅក្នុងឆ្នាំ២០២៥នេះ តំបន់ឆ្នេរកម្ពុជាដែលរួមមានខេត្តចំនួន៤ អាចទាក់ទាញភ្ញៀវទេសចរជាតិប្រាណ ៨លាននាក់ និងទេសចរអន្តរជាតិ ៨០ម៉ឺននាក់ ខណៈដែលបណ្តាញហេដ្ឋារចនាសម្ព័ន្ធនានាត្រូវបានអភិវឌ្ឍន៍បន្ថែម រួមទាំងតំបន់កម្សាន្តថ្មីៗមួយចំនួនទៀតដើម្បីបង្កើនភាពទាក់ទាញ។

ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានមានប្រសាសន៍កាលពីពេលកន្លងទៅថ្មីៗនេះថា ៖ រាជរដ្ឋាភិបាល បាន និងកំពុងយកចិត្តទុកដាក់យ៉ាងខ្លាំងទៅលើការរៀបចំ និងអភិវឌ្ឍន៍បន្ថែមនូវបណ្តាញហេដ្ឋារចនាសម្ព័ន្ធនានារួមមាន ផ្លូវថ្នល់ តំបន់ឆ្នេរកម្សាន្ត កំពង់ផែទេសចរណ៍ ជាពិសេសការតភ្ជាប់បណ្តាខេត្តនានមកកាន់ខេត្តជាប់តំបន់ឆ្នេរដែលជាគោលដៅទេសចរណ៍ដ៏សំខាន់។ ជាមួយនឹងភាពល្អប្រសើរនៃបណ្តាញហេដ្ឋារចនាសម្ព័ន្ធទាំងនេះ ក្នុងឆ្នាំ២០២៥រំពឹងថា អាចទទួលបានទេសចរជាតិប្រមាណ ៨លាននាក់ ហើយអន្តរជាតិប្រមាណ ៨០ម៉ឺននាក់។ ដោយឡែក សម្រាប់តែខេត្តព្រះសីហនុ រំពឹងទទួលបានទេសចរជាតិ៤លាននាក់ និងអន្តរជាតិប្រមាណ ៤៥ម៉ឺននាក់។

ឯកឧត្តម រដ្ឋមន្ត្រី បានបញ្ជាក់ថា ៖

«វិស័យទេសចរណ៍កម្ពុជា គឺជាវិស័យអាទិភាពមួយដែលសម្តេចតេជោ ហ៊ុន សែន អតីតនាយករដ្ឋមន្ត្រីកម្ពុជា បានប្រសិទ្ធនាមថា ជាមាសបៃតង និងបានរួមចំណែកអភិវឌ្ឍសង្គម សេដ្ឋកិច្ច គាំទ្រដល់ការអភិរក្សធនធានធម្មជាតិ វប្បធម៌ដ៏សម្បូរបែប ដែលធ្វើឱ្យប្រទេសកម្ពុជា រក្សាបានសុខសន្តិភាព ស្ថិរភាពនយោបាយល្អ បន្តអនុគ្រោះដល់ការវិនិយោគ និងការរីកចម្រើនក្នុងវិស័យទេសចរណ៍ គឺជាជន្ទល់សេដ្ឋកិច្ចមួយសំខាន់ និងបានចូលរួមចំណែកប្រមាណជា៣ភាគរយនៃផលិតផលក្នុងស្រុកសរុប»។

ជាមួយគ្នានេះ ឯកឧត្តមរដ្ឋមន្ត្រីក៏បានលើកឡើងពីទស្សនវិស័យទេសចរណ៍ជាវិជ្ជមានរបស់ខេត្តព្រះសីហនុ និងអំពាវនាវឱ្យអង្គភាពខេត្តជាប់មាត់សមុទ្រ អាជ្ញាធរពាក់ព័ន្ធ និងប្រជាពលរដ្ឋបងប្អូនប្រជាពលរដ្ឋ ចាប់យកអត្ថប្រយោជន៍ឱ្យបានច្រើន និងប្រកបដោយនិរន្តរភាព ដោយមានការទទួលខុសត្រូវ ហើយអ្វីដែលសំខាន់គឺការចូលរួមក្នុងកិច្ចសហប្រតិបត្តិការពីគ្រប់ភាគីពាក់ព័ន្ធ ទាំងវិស័យរដ្ឋ និងឯកជន ទាំងថ្នាក់ជាតិ ក្រោមជាតិ និងកិច្ចសហប្រតិបត្តិការជាអន្តរជាតិផងដែរ។

ឯកឧត្តម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ បានលើកឡើងថា តបទៅនឹងគោលបំណង និងផែនការរបស់រាជរដ្ឋាភិបាល រដ្ឋបាលខេត្តព្រះសីហនុបានយកចិត្តទុកដាក់យ៉ាងខ្លាំងទៅលើការរៀបចំសណ្តាប់ធ្នាប់ ការអភិវឌ្ឍន៍នៅតាមតំបន់ទេសចរណ៍ និងកម្សាន្តនាតំបន់ឆ្នេរ ជាពិសេសគឺសុខសុវត្ថិភាពចំពោះភ្ញៀវទេសចរ ក៏ដូចជាបណ្តាអ្នកធុរកិច្ចផងដែរ។

ឯកឧត្តមអភិបាលបានបន្តថា ៖ បន្ថែមពីលើពិធីបុណ្យជាតិ និងសកល ក៏ដូចជាថ្ងៃសម្រាកចុងសប្ដាហ៍ នៅក្រុងព្រះសីហនុ ក៏ដូចជាតាមតំបន់កម្សាន្តនានាក្នុងខេត្ត តែងបង្កើតជាព្រឹត្តិការណ៍សប្បាយៗជាបន្តបន្ទាប់ ដើម្បីធ្វើយ៉ាងណាបង្កើនភាពទាក់ទាញឱ្យកាន់តែខ្លាំងបន្ថែមពីលើអ្វីដែលមានស្រាប់។ ជាក់ស្ដែង កាលពីអំឡុងចុងខែមករា ឆ្នាំ២០២៥កន្លងទៅនេះ រដ្ឋបាលខេត្តព្រះសីហនុ ក្រោមកិច្ចសហការពីសំណាក់ក្រសួងទេសចរណ៍ បានរៀបចំព្រឹត្តិការណ៍ពិព័រណ៍ទេសចរណ៍បានយ៉ាងជោកជ័យ។ តាមរយៈព្រឹត្តិការណ៍គឺមានគោលបំណង ៖ ១- បង្កើនការទាក់ទាញទេសចរឱ្យមកសម្រាកកម្សាន្តនៅខេត្តព្រះសីហនុកាន់តែច្រើន និងស្នាក់នៅយូរថ្ងៃ។ ២- ជំរុញការផ្សព្វផ្សាយផលិតផល និងសក្ការនុពលទេសចរណ៍។ ៣- ជំរុញការផ្សព្វផ្សាយ និងលើកកម្ពស់តម្លៃវប្បធម៌ជាតិខ្មែរ។ ៤- ពង្រឹងកិច្ចសហប្រតិបត្តិការអន្តរជាតិ ដើម្បីឱ្យវិស័យទេសចរណ៍ និងពាណិជ្ជកម្មកាន់តែមានការរីកចម្រើន។

សូមជម្រាបថា ខេត្តព្រះសីហនុមានសមិទ្ធផលជាច្រើន ដែលសម្រេចបាន ក្នុងនោះមានដូចជា ជ័យលាភីទីក្រុងស្អាត ជ័យលាភីទីក្រុងទេសចរណ៍គ្នានផ្សែងបារី ជ័យលាភីផ្ការំដួលបីទង ជ័យលាភីលេខ១ ចូលឆ្នាំសកលល្អជាងគេប្រចាំឆ្នាំ២០២៣ ជ័យលាភីបង្គន់សាធារណៈស្តង់ដារអាស៊ាន ស្បាម៉ាហ្សាស្តង់ដារអាស៊ាន និងសហគមន៍ទេសចរណ៍ស្តង់ដារអាស៊ានផងដែរ៕