ភ្នំពេញ ៖ ក្នុង​ឆ្នាំ២០២៤​ កន្លងទៅ អាកាសយានដ្ឋាន​អន្តរជាតិទាំង៣​របស់កម្ពុជា ដែល​មាន​អាកាសយានដ្ឋានអន្តរជាតិភ្នំពេញ អាកាសយានដ្ឋានអន្តរជាតិ​ខេត្តសៀមរាប និងអាកាសយានដ្ឋានអន្តរជាតិ​ខេត្តព្រះសីហនុ ទទួលបានជើងហោះហើរ​សរុបចំនួន ៥៨ ៣៥៤ជើង ដែល​មានកំណើន​១៤ភាគរយ​ធៀបនឹង​ឆ្នាំ​២០២៣​ ដោយទទួលបាន​អ្នក​ដំណើរតាម​ផ្លូវ​អាកាស​សរុប​ចំនួន ៦,២៤លាននាក់ ។ នេះបើតាម​របាយការណ៍បូក​សរុប​របស់​រដ្ឋលេខាធិការ​អាកាសចរណ៍ស៊ី​វិល​ កាលពីថ្ងៃទី១១ និង​​១២ ខែមីនា ឆ្នាំ២០២៥ ។

ឯកឧត្តមបណ្ឌិត ម៉ៅ ហាវណ្ណាល់ រដ្ឋមន្រ្តីទទួលបន្ទុករដ្ឋលេខាធិការដ្ឋាន អាកាសចរណ៍ស៊ីវិលបានមានប្រសាសន៍ក្នុងអង្គសន្និបាតបូកសរុបលទ្ធផលការងារឆ្នាំ២០២៤ និងលើកទិសដៅការ​ងារ​ឆ្នាំ២០២៥ នៅថ្ងៃទី១២ ខែមិនា ឆ្នាំ២០២៥នេះឱ្យដឹងថា ជើងហោះហើរអន្តរជាតិត្រូវបានពង្រឹង និងពង្រីក ដោយទទួលបានលទ្ធផលយ៉ាងល្អប្រសើរលើការតភ្ជាប់ជើងហោះហើរ​ជាប្រវត្តិសាស្ត្រ រវាងរាជធានីភ្នំពេញ និងរដ្ឋធានីញូវដែលីប្រទេសឥណ្ឌា និងការចាប់ផ្តើមហោះហើរឡើងវិញរបស់ក្រុមហ៊ុនអាកាសចរណ៍អេមីរ៉ាត និងកាតា ដែលផ្សារភ្ជាប់ជើងហោះហើររវាងរាជធានីភ្នំពេញ និងទីក្រុងឌូបៃ និងទីក្រុងដូហា។

ឯកឧត្តមបញ្ជាក់ថា ៖

«នៅឆ្នាំ២០២៤នេះ អ្នកដំណើរតាមផ្លូវអាកាសមានចំនួនសរុបចំនួន ៦,២៤ លាននាក់ ដែលមានកំណើនប្រមាណ ២២% បើប្រៀបធៀបទៅនឹងរយៈពេលដូចគ្នានៅក្នុងឆ្នាំ២០២៣ មានចំនួនអ្នកដំណើរសរុបចំនួន ៥,១១ លាននាក់។ ជាមួយគ្នានេះការដឹកជញ្ជូនទំនិញតាមផ្លូវអាកាសមានចំនួន ៧៧,៨ ពាន់តោន ដែលមានកំណើនវិជ្ជមានប្រមាណ៤០% បើប្រៀបធៀបទៅនឹងរយៈពេលដូចគ្នានៅក្នុងឆ្នាំ២០២៣ ដែលការដឹកជញ្ជូនទំនិញតាមផ្លូវអាកាសមានចំនួន ៥៥,៧ ពាន់តោន»។

ក្នុងឆ្នាំ២០២៤ កម្ពុជាមានជើងហោះហើរសរុបចំនួន ៥៨ ៣៥៤ ជើង ដែលមានកំណើន១៤ភាគរយ បើប្រៀបធៀបទៅនឹងរយៈពេលដូចគ្នានៅក្នុងឆ្នាំ២០២៣ សរុបចំនួន ៥១ ១៤៩ ជើង។ ចំណែកជើងហោះហើររំលងមានសរុបចំនួន ៧១ ៦១៣ ជើង មានកំណើន ១៤ភាគរយ​ បើប្រៀបធៀបទៅនឹងរយៈពេលដូចគ្នានៅក្នុងឆ្នាំ២០២៣ ដែលទទួលបានជើងហោះហើរសរុបចំនួន ៦៣ ០៨៧ ជើង។ នៅក្នុងអង្គសន្និបាតខាងលើ ឯកឧត្តមបណ្ឌិត ម៉ៅ ហាវណ្ណាល់ ក៏បានដាក់ទិសដៅការងារឆ្នាំ២០២៥ សម្រេចឱ្យបាននូវការដឹកជញ្ជូនអ្នកដំណើរតាមផ្លូវអាកាសចំនួន ៧,៥ លាន នាក់ និងទំនិញចំនួន ៨០ ពាន់តោននៅក្នុងឆ្នាំ២០២៥។

សូមជម្រាបថា រដ្ឋលេខាធិការដ្ឋានអាកាសចរណ៍ស៊ីវិល បានប្រារព្វអង្គសន្និបាតបូកសរុបលទ្ធផលការងារឆ្នាំ២០២៤ និងលើកទិសដៅការងារឆ្នាំ២០២៥ នាថ្ងៃទី១១-១២ ខែមីនា ឆ្នាំ២០២៥ នៅសណ្ឋាគារសុខាភ្នំពេញ ក្រោមអធិបតីភាពដ៏ខ្ពង់ខ្ពស់ ឯកឧត្តម បណ្ឌិត ម៉ៅ ហាវណ្ណាល់ រដ្ឋមន្ត្រី ទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល។ អ្នកចូលរួមកម្មវិធីមានអង្គសន្និបាតរួមមាន វត្តមានដ៏ខ្ពង់ខ្ពស់របស់ឯកឧត្តម​ លោកជំទាវ លោក លោកស្រី អ្នកនាងកញ្ញា ភ្ញៀវកិត្តិយសជាតិ និងភ្ញៀវអន្តរជាតិ មកពីបណ្តាតំណាងអន្តរក្រសួង តំណាងមន្ទី តំណាងអាជ្ញាធរខេត្ត តំណាងមកពីវិស័យឯកជន ដែលកំពុងបម្រើឱ្យវិស័យអាកាសចណ៍ស៊ីវិលចំនួន៥០០នាក់។

គោលបំណងនៃអង្គសន្និបាត គឺពិនិត្យឡើងនូវកិច្ចការអនុវត្តប្រចាំថ្ងៃ ដោយផ្តោតលើតួរនាទី និងការទទួលខុសត្រូវការវឌ្ឍនភាពនៃការអនុវត្តការ បញ្ហាប្រឈមនានាដែលអង្គភាព ជួបប្រទះ លើវិស័យអាកាសចរណ៍ស៊ីវិលរយៈពេល០១ឆ្នាំកន្លងទៅ និងលើកទិសដៅការងារសំខាន់ៗ សម្រាប់អនុវត្តបន្ត ក្នុងការចូលរួម អនុវត្តយុទ្ធសាស្ត្របញ្ជកោណ ដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភាសំដៅរួមចំណែកដល់ការអភិវឌ្ឍសង្គម-សេដ្ឋកិច្ចប្រកបដោយចីរភាពនិងបរិយាបន្ន ឆ្ពោះទៅសម្រេចបានចក្ចុវិស័យកម្ពុជាឆ្នាំ ២០៥០។

ថ្លែងក្នុង ក្នុងពិធីអង្គសន្និបាទ ឯកឧត្តមបណ្ឌិត ម៉ៅ ហាវណ្ណាល់ រដ្ឋមន្ត្រី ទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល បានគួសបញ្ជាក់ថា៖ វិស័យអាកាសចរណ៍ស៊ីវិល នៅតែបន្តទទួលផលប្រយោជន៍នៃកេរ្តិ៍ដំណែល ក្រោមគំនិតផ្តួចផ្តើមប្រកបដោយគតិបណ្ឌិត និងទស្សនៈវិស័យវែងឆ្ងាយរបស់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាអតីតនាយករដ្ឋមន្ត្រីក្នុងការដាក់ឱ្យអនុវត្តគោលនយោ​បាយបើកចំហជើងមេឃ នៅក្នុងឆ្នាំ១៩៩៩ និងកំពុងបន្តអនុវត្តក្រោមការដឹកនាំប្រកប​ដោយ​​​គតិបណ្ឌិត និងឈ្លាសវៃបំផុតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី​ នៃព្រះរាជាណាចក្រកម្ពុជា ដោយបានជួយជំរុញឱ្យមានសន្ទុះរីកចម្រើនដល់ការដឹកជញ្ជូនតាមផ្លូវអាកាស ហើយឆ្លើយតបតម្រូវការ ទេសចរណ៍ ធុរកិច្ច ពាណិជ្ជកម្ម និងការផ្សារភ្ជាប់ទំនាក់ទំនងសង្គម-វប្បធម៌កម្ពុជាទៅកាន់អន្តរជាតិ និងអន្តរជាតិមកកាន់កម្ពុជា។ ទន្ទឹមនឹងនេះ រដ្ឋលេខាធិការដ្ឋានអាកាសចរណ៍ស៊ីវិល ក៏កំពុងអនុវត្តតាមផែនការរបស់រាជរដ្ឋាភិបាលនីតិកាលទី៧ ដែលបានដាក់ចេញនូវយុទ្ធសាស្ត្របញ្ចកោណ-ដំណាក់កាលទី១ ដែលវិស័យអាកាសចរណ៍ស៊ីវិល ស្ថិតនៅក្នុងបញ្ចកោណទី២ ការធ្វើពិពិធកម្មសេដ្ឋកិច្ច និងការបង្កើនភាពប្រកួតប្រជែង និងមុំទី២ ការលើកកម្ពស់ការតភ្ជាប់ និងការបង្កើនប្រសិទ្ធភាពនៃវិស័យដឹកជញ្ជូន ឡូជីស្ទីក វិស័យ ថាមពល វិស័យទឹកស្អាត និងវិស័យឌីជីថល៕