បរទេស៖ យោងតាមប្រភពពី Mining Digital បានលើកឡើងថា ទ្វីបអាហ្រ្វិកភាគច្រើនត្រូវបានគេស្គាល់ថាជាតំបន់សម្បូរទៅដោយប្រទសក្រីក្រ ខណៈដែលវាគឺជាទីកន្លែងដែលមានប្រភពរ៉ែច្រើនជាងគេបំផុតមួយរបស់ពិភពលោក ហើយនៅក្នុងនោះមានប្រទេសមួយចំនួនដែលបានជាប់ឈ្មោះថាជាប្រទេសដែលមានសកម្មភាពរុករករ៉ែធំៗប្រចាំទ្វីប រួមមានដូចជា ប្រទេសអាហ្វ្រិកខាងត្បូង, នីហ្សេរីយ៉ា, អាល់ហ្សេរី, អង់ហ្គោឡា, និងលីប៊ីជាដើម។ ខាងក្រោមនេះគឺជាប្រទេសដែលរុករក និងផលិតរ៉ែច្រើនជាងគេបំផុតទាំង ១០ នៅក្នុងទ្វីបអាហ្វ្រិក ៖

១. អាហ្រ្វិកខាងត្បូង ៖ ផលិតកម្មរ៉ែប្រចាំឆ្នាំ ១២៤ ៩៦៣ លានដុល្លារ

អាហ្វ្រិកខាងត្បូង គឺជាប្រទេសដែលមានរ៉ែច្រើនជាងគេបំផុតរបស់ទ្វីប។ ប្រទេសនេះមានអណ្តូងរ៉ែមាសចំនួន ៣៥ ហើយក៏ផលិតធ្យូងថ្ម ពេជ្រ រ៉ែដែក និងក្រូមីញ៉ូមយ៉ាងច្រើនផងដែរ។ លើសពីនេះ អាហ្វ្រិកខាងត្បូងមានផ្ទុកទៅដោយលោហៈធាតុម៉ង់ហ្គាណែស និងប្លាទីនធំបំផុតរបស់ពិភពពលោកទៀតផង។ យ៉ាងណាក៏ដោយ ទោះបីជាមានភាពវិជ្ជមានទាំងអស់នេះក៏ដោយ ប៉ុន្តែក្រុមហ៊ុនរុករករ៉ែស្ថិតនៅក្នុងបរិយាកាសប្រតិបត្តិការដ៏លំបាកជាមួយនឹងកម្រិតឧក្រិដ្ឋកម្មខ្ពស់ ការផ្គត់ផ្គង់អគ្គិសនីថ្លៃ និងការរាំងស្ទះផ្នែកដឹកជញ្ជូននៅលើផ្លូវដែក និងកំពង់ផែ។

២. នីហ្សេរីយ៉ា៖ ផលិតកម្មរ៉ែប្រចាំឆ្នាំ ៥២ ៦៧៨ លានដុល្លារ

ក្រៅពីមានទុនបម្រុងដែលជាប្រេងដ៏ច្រើនរបស់ខ្លួន នីហ្សេរីយ៉ាក៏មានមាស, រ៉ែដែក, អ៊ុយរ៉ាញ៉ូម, columbite, wolframite, tantalite, និង bitumen ផងដែរ។ យ៉ាង​ណា​មិញ ឧស្សាហកម្ម​រ៉ែ​មាន​ការ​អភិវឌ្ឍ​តិចតួច​ប៉ុណ្ណោះ ហើយ​មានចំណែក​តែ ០,៣ ភាគរយប៉ុណ្ណោះនៃផលិតផលក្នុងស្រុកសរុប (GDP)។

៣. អាល់ហ្សេរី៖ ផលិតកម្មរ៉ែប្រចាំឆ្នាំ ៣៨ ៦៩៩ លានដុល្លារ

ទោះបីជាអាល់ហ្សេរីមានទុនបម្រុងជារ៉ែដែលមិនមែនជាអ៊ីដ្រូកាបូន ប៉ុន្តែកន្លែងភាគច្រើនមិនទាន់ត្រូវបានរុករកនោះទេ។ យ៉ាងណាមិញ ប្រទេសនេះកំពុងសម្លឹងមើលឱកាសដើម្បីក្លាយជាមជ្ឈមណ្ឌលក្នុងតំបន់សម្រាប់ការផលិតអ៊ីដ្រូសែន។

៤. អង់ហ្គោឡា៖ ផលិតកម្មរ៉ែប្រចាំឆ្នាំ ៣២០៤ លានដុល្លារ

អង់ហ្គោឡា គឺជាអ្នកផលិតពេជ្រធំជាងគេទី ៣ នៅទ្វីបអាហ្រ្វិក ខណៈដែលការរុករកបានត្រឹមតែ ៤០ ភាគរយប៉ុណ្ណោះនៃទឹកដីរបស់ខ្លួន។ មាស និងប្រេង គឺជាកត្តាជំរុញប្រាក់ចំណូលដ៏សំខាន់នៅក្នុងសេដ្ឋកិច្ចអង់ហ្គោឡា។

៥. លីប៊ី៖ ផលិតកម្មរ៉ែប្រចាំឆ្នាំ ២៧០២ លានដុល្លារ

លីប៊ី បានកំណត់ធនធានរ៉ែមួយចំនួនជាវត្ថុធាតុដើម ដូចជា ដីឥដ្ឋ ស៊ីម៉ងត៍ និងថ្មកំបោរ។ ទុនបម្រុងរ៉ែផ្សេងទៀតរួមមាន ប៉ូតាស្យូម ម៉ាញ៉េទិច ថ្មផូស្វាត និងស្ពាន់ធ័រ។ មិនត្រឹមតែប៉ុណ្ណោះ លីប៊ី គឺជាសមាជិកនៃក្រុមប្រទេសនាំចេញប្រេង OPEC ចាប់តាំងពីឆ្នាំ១៩៦២។

៦. អេហ្ស៊ីប៖ ផលិតកម្មរ៉ែប្រចាំឆ្នាំ  ២៣ ២២៥ លានដុល្លារ

អេហ្ស៊ីបគឺជាប្រទេសដែលមានធនធានរ៉ែដ៏សម្បូរបែបរួមមាន មាស ទង់ដែង ប្រាក់ ស័ង្កសី ផ្លាទីន និងលោហៈមានតម្លៃមួយចំនួនទៀត។ ធនធានទាំងអស់នេះស្ថិតនៅក្រោមវាលខ្សាច់នៃខាងកើតប្រទេស និងឧបទ្វីបស៊ីណៃ។

៧. ហ្គាណា៖ ផលិតកម្មរ៉ែប្រចាំឆ្នាំ ១៤ ៩៧០ លានដុល្លារ

ហ្គាណាសម្បូរទៅដោយ មាស រ៉ែដែក ថ្មកំបោរ និងសារធាតុរ៉ែសំខាន់ៗផ្សេងទៀត។ ប្រទេសនេះមានក្រុមហ៊ុនរុករករ៉ែខ្នាតធំចំនួន ២០ ដែលផលិតមាស ពេជ្រ បុកស៊ីត និងម៉ង់ហ្គាណែស ខណៈដែលមានក្រុមរុករករ៉ែខ្នាតតូចបានចុះបញ្ជីជាង ៣០០ និងក្រុមហ៊ុនផ្តល់សេវាកម្មសម្រាប់អណ្តូងរ៉ែចំនួន ៩០ ។

៨. សាធារណរដ្ឋប្រជាធិបតេយ្យកុងហ្គោ៖ ផលិតកម្មរ៉ែប្រចាំឆ្នាំ ១៣ ៦៨៨ លានដុល្លារ

កុងហ្គោសម្បូរទៅដោយរ៉ែមាស ពេជ្រ កូបាល់ និងទុនបំរុងស្ពាន់ដែលមិនទាន់កែច្នៃ ប៉ុន្តែប្រទេសនេះមានហានិភ័យផ្នែកសន្តិសុខ ដោយសារកង្វះហេដ្ឋារចនាសម្ព័ន្ធរឹងមាំ។

៩. ហ្គាបុង៖ ផលិតកម្មរ៉ែប្រចាំឆ្នាំ៖ ១០ ៩២០ លានដុល្លារ

ហ្គាបុង មានផ្ទុកម៉ង់ហ្គាណែសច្រើនជាងគេទី ២ នៅលើពិភពលោកបន្ទាប់ពីអាហ្រិ្វកខាងត្បូង ហើយគឺជាអ្នកផលិតម៉ង់ហ្គាណែសធំជាងគេទី ៣ របស់ពិភពលោក។ ប្រទេសនេះមានប្រាក់ចំណូលមធ្យមកម្រិតខ្ពស់ ហើយនៅឆ្នេរសមុទ្រភាគខាងលិចក៏ផលិតរ៉ែដែក អ៊ុយរ៉ាញ៉ូម និងមាសផងដែរ។

១០. ហ្ស៊ីមបាវ៉េ៖ ផលិតកម្មរ៉ែប្រចាំឆ្នាំ ៩,៧៦ ពាន់លានដុល្លារ

វិស័យរុករករ៉ែរបស់ហ្ស៊ីមបាវ៉េមានភាពចម្រុះយ៉ាងខ្លាំងដោយមានសារធាតុរ៉ែជិត ៤០ ​ប្រភេទផ្សេងៗគ្នា ហើយរ៉ែដែលលេចធ្លោជាងគេរួមមានផ្លាទីន ក្រូម មាស ធ្យូងថ្ម និងពេជ្រ ដែលភាគច្រើនត្រូវបានរកឃើញនៅក្នុងតំបន់ Chiadzwa៕