សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ យោងតាមរបាយការណ៍របស់អគ្គនាយកដ្ឋានកៅស៊ូ នៃក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ក្នុងឆមាសទី១ ឆ្នាំ២០២៥ កម្ពុជាទទួលបានចំណូលប្រមាណ ៣០៤,៥៣ លានដុល្លារ ពីការលក់ឈើកៅស៊ូ និងជ័រកៅស៊ូ ទៅកាន់ទីផ្សារក្នុងស្រុក និងអន្តរជាតិ ដោយចំណូលនេះបានកើនឡើង ៤១,៦១ភាគរយ ធៀបរយៈពេលដូចគ្នាកាលពីឆ្នាំ២០២៤ ដែលបានបង្ហាញពីភាពរីកចម្រើនទាំងការដាំដុះសម្រាប់បម្រើការនាំចេញ ទាំងតម្រូវការទីផ្សារកំពុងកើនឡើង។
បើតាមរបាយការណ៍ដដែលបានបង្ហាញថា ចាប់ពីខែមករា ដល់ខែមិថុនា ឆ្នាំ២០២៥ កម្ពុជាបាននាំចេញជ័រកៅស៊ូក្នុងបរិមាណ ១១២ ៥៩៥តោន បានចំណូល ២០៨ ៦៣៣ ៨២៦ដុល្លារ, នាំចេញឈើកៅស៊ូចំនួន ៩៩៤៣ ម៉ែត្រគូប បានចំណូល ២ ៣៥៥ ៤៣៨ដុល្លារផងដែរ។
ទន្ទឹមនឹងនេះ កម្ពុជាបានបញ្ចេញជ័រកៅស៊ូ ៥៣ ៣៦១តោន ទៅកាន់ទីផ្សារក្នុងស្រុក ផ្គត់ផ្គង់ដល់រោងចក្រផលិតសំបកកង់ឡាន ដែលគិតជាទឹកប្រាក់មានចំនួន ៩៣ ៥៤១ ៨៣៣ដុល្លារ។ ដូច្នេះ ចំណូលសរុបពីការលក់ផលិតផលកៅស៊ូ មានទំហំ ៣០៤ ៥៣១ ០៩៧ដុល្លារ កើនឡើង ៤១,៦១ភាគរយ ធៀបនឹងរយៈពេលដូចគ្នា ក្នុងឆ្នាំ២០២៤។
ដោយឡែក នៅក្នុងខែមិថុនាវិញ កម្ពុជាបាននាំចេញជ័រកៅស៊ូ ២៣ ៦១៥ តោន បានកើនឡើង ១១ ១០២តោន ស្មើនឹង ៨៨,៧២ ភាគរយ ធៀបនឹងខែមុន ប៉ុន្តែបានថយចុះចំនួន ៦ ២៦៦តោន ស្មើនឹង ២០,៩៧ ភាគរយ ធៀបនឹងខែមិថុនា ឆ្នាំ២០២៤។ បរិមាណបញ្ចេញលក់ឈើកៅស៊ូក្នុងខែមិថុនា ឆ្នាំ២០២៥ មានចំនួន១ ៥៦២ ម៉ែត្រគូប។ ចំណូលសរុបទទួលបានពីផលិតផលទាំងពីរនេះមានចំនួន ៥៣ ៧១២ ១៥០ដុល្លារ។
សូមជ្រាបថា ជ័រកៅស៊ូកម្ពុជាក្រៅពីនាំចេញក៏ត្រូវបានផ្គត់ផ្គង់ដល់រោងចក្រផលិតសំបកកង់រថយន្ដក្នុងស្រុកចំនួន៣ ដែលកំពុងតែដំណើរការស្ថិតនៅខេត្តស្វាយរៀង ខេត្តព្រះសីហនុ និងខេត្តក្រចេះ។ ការផ្គត់ផ្គង់នេះធ្វើឱ្យការប្រើប្រាស់ក្នុងស្រុកបានកើនឡើងរហូតដល់៩២ ភាគរយ ឬស្មើ ៨៥ពាន់តោន ធៀបនឹងរយៈពេលពេញមួយឆ្នាំ២០២៤។ នេះបើតាមរបាយការណ៍របស់អគ្គនាយកដ្ឋានកៅស៊ូ។
ដោយឡែក ជ័រកៅស៊ូលក់ចេញជាមធ្យមក្នុងខែមិថុនា មានតម្លៃ ១ ៦១៣ដុល្លារក្នុងមួយតោន បានថយចុះ ១៧៤ដុល្លារ ឬស្មើ ៩,៧២ភាគរយ ធៀបនឹងខែឧសភា ឆ្នាំ២០២៤ និងបានថយចុះ ២៥ដុល្លារក្នុងមួយតោន ស្មើនឹង ១,៥២ភាគរយ ធៀបនឹងខែមិថុនា ឆ្នាំ២០២៤។
បច្ចុប្បន្ន កម្ពុជាមានផ្ទៃដីដាំកៅស៊ូ ៤២៥ ៤៤៣ ហិកតា ក្នុងនោះ ផ្ទៃដីចៀរជ័រមាន ៣៣០ ២៥៩ ហិកតា ស្មើ ៧៨ ភាគរយ និងផ្ទៃដីថែទាំ ៩៥ ១៨៤ ហិកតា ស្មើ ២២ ភាគរយ។ ផ្ទៃដីកៅស៊ូកសិឧស្សាហកម្ម ២២៣ ១២២ ហិកតា ស្មើ ៥២ ភាគរយ និងផ្ទៃដីកៅស៊ូគ្រួសារ ២២៣ ១២២ ហិកតា ស្មើ ៤៨ភាគរយ។
សូមជម្រាបថា កាលពីឆ្នាំ២០២៤កន្លងទៅ កម្ពុជាផលិតបានជ័រកៅស៊ូ ៤០៧ ២០៩ តោន ក្នុងនោះ នាំចេញទៅកាន់ទីផ្សារអន្តរជាតិ ប្រមាណ ៣៣៨ ០០០តោន ឬស្មើទឹកប្រាក់ ៦៥៨ ១៥២ ០០០ដុល្លារ។
Account
Security
Favourite Content