សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ឥណ្ឌា ជាមហាយក្សសេដ្ឋកិច្ចថ្មីទាំងក្នុងកម្រិតតំបន់ ក៏ដូចជាពិភពលោក និងកំពុងសន្ទុះយ៉ាងខ្លាំងធៀបទាំងជាមួយនឹងអាមេរិក និងចិនផងដែរ ខណៈដែលកាលពីពេលកន្លងទៅថ្មីៗនេះ ឥណ្ឌា និងកាណាដា បានធ្លាក់ចូលក្នុងវិបត្តិការទូតដែលមិនធ្លាប់មានពីមុនមក និងអាចមានផលវិបាកទាំងផ្នែកនយោបាយ ឬអាចក្លាយទៅជាបញ្ហាភូមិសាស្ត្រនយោបាយថ្មីមួយទៀតក្នងនាមជាមហាអំណាចដ៏សំខាន់ទាំង២របស់ពិភពលោក។
មួយរយៈចុងក្រោយនេះថ្វីត្បិតតែឥណ្ឌាមិនសូវរងផលប៉ះពាល់ដោយសារភូមិសាស្ត្រនយោបាយរវាងអាមេរិក-ចិន ឬរុស្ស៊ី និងអ៊ុយក្រែនក្តី ប៉ុន្តែប៉ុន្មានថ្ងៃចុងក្រោយនេះគេសង្កេតឃើញថាឥណ្ឌាហាក់ដូចជាកំពុងធ្លាក់ចូលក្នុងបញ្ហាភូមិសាស្ត្រនយោបាយផ្ទាល់ខ្លួនមួយជាមួយនឹងមហាអំណាចសេដ្ឋកិច្ចកាណាដា។
ភាពតានតឹងរវាងប្រទេសកាណាដា និងឥណ្ឌា បានឈានដល់កម្រិតថ្មីជាមួយដូចជាការបណ្តេញចេញមន្ត្រីការទូតរវាងគ្នា ជាពិសេសការចោទប្រកាន់ចុងក្រោយមួយដោយនាយករដ្ឋមន្ត្រីកាណាដា Justin Trudeau ពីការចូលរួមរបស់រដ្ឋាភិបាលឥណ្ឌាក្នុងផែនការសម្លាប់សកម្មជន ជនជាតិ Sikh នៅលើទឹកដីកាណាដា។ ព័ត៌មានចោទប្រកាន់នេះបានផ្ទុះឡើងពេញបណ្តាសារព័ត៌មានអន្តរជាតិល្បីៗទាំងអស់នៅមុនជំនួបកំពូលនៃមហាសន្និបាតអង្គការសហប្រជាជាតិនៅសហរដ្ឋអាមេរិក។
កាលពីថ្ងៃចន្ទ នាយករដ្ឋមន្ត្រីកាណាដា Justin Trudeau នៅក្នុងកិច្ចប្រជុំរបស់សភាបានប្រកាសទាំងគួរឲ្យភ្ញាក់ផ្អើលដោយចោទប្រកាន់ទៅលើរដ្ឋាភិបាលនៃប្រទេសឥណ្ឌាគឺជាអ្នកមានទំនាក់ទំនងពីក្រោយនៃផែនការធ្វើឃាតលោក Hardeep Singh Nijjar មេដឹកនាំដ៏សំខាន់របស់ជនជាតិ Sikh កាលពីខែមិថុនាកន្លងមក។
នៅក្រោយហេតុការណ៍នេះ អ្នកជំនាញជាច្រើនបានបង្ហាញនូវក្តីព្រួយបារម្ភថា សកម្មភាពពាណិជ្ជកម្មរបស់ កាណាដា ជាមួយនឹងប្រទេស ឥណ្ឌា អាចនឹងជួបការលំបាក ខណៈ ទំនាក់ទំនងកាន់តែមានភាពតានតឹងឡើង។ មិនត្រឹមតែប៉ុណ្ណោះ ការចោទប្រកាន់ដ៏ធ្ងន់ធ្ងរនេះបានជំរុញឱ្យប្រទេសទាំង ២ ឈានទៅដល់ការសម្រេចចិត្តបណ្តេញអ្នកការទូតរវាងគ្នាទៅវិញទៅមកទៀតផង ខណៈដែលកិច្ចពិភាក្សាលើកិច្ចព្រមព្រៀងពាណិជ្ជកម្ម និងបេសកកម្មពាណិជ្ជកម្មកាណាដា ដែលបានគ្រោងទុកនៅក្នុងខែតុលាក៏ត្រូវបានប្រកាសផ្អាកជាបណ្តោះអាសន្នដែរ។
គួរឲ្យដឹងដែរថា ចលនាឯករាជ្យ Sikh (Sikh Independence) របស់ឥណ្ឌាធ្លាប់មានឈ្មោះជាការបះបោរដោយប្រដាប់អាវុធបង្ហូរឈាមដ៏សាហាវបំផុតមួយ ដែលបានអង្រួនប្រទេសឥណ្ឌាក្នុងទសវត្សរ៍ឆ្នាំ១៩៧០ និង ១៩៨០។ ទីតាំងរបស់ជនជាតិ Sikh រស់នៅគឺស្ថិតនៅកណ្តាលរដ្ឋ Punjab ភាគខាងជើង ហើយបច្ចុប្បន្នជនជាតិដើមមួយនេះមានចំនួនប្រមាណជា ១,៧ភាគរយ នៃចំនួនប្រជាជនឥណ្ឌាសរុប។
យ៉ាងណាក៏ដោយ បើទោះបីជាសកម្មភាពរបស់ជនជាតិ Sikh បានស្ងប់ស្ងាត់ទៅហើយក្តី ប៉ុន្តែការបះបោរដែលបានកើតឡើងរយៈពេលជាងមួយទសវត្សរ៍មុន មិនអាចឲ្យរដ្ឋាភិបាល និងជនជាតិ Sikh បំភ្លេចបានឡើយ ដោយសារតែការបង្ក្រាបពីសំណាក់រដ្ឋាភិបាលឥណ្ឌាគ្រានោះបានបណ្តាលឲ្យមានមនុស្សរាប់ពាន់នាក់បានបាត់បង់ជិវិត រួមទាំងមេដឹកនាំ Sikh ដ៏លេចធ្លោជាច្រើននាក់ផងដែរ៕
Account
Security
Favourite Content