ភ្នំពេញ ៖ ធនាគារជាតិនៃកម្ពុជា គ្រោងដាក់ឱ្យប្រើប្រាស់ប្រព័ន្ធបាគងសម្រាប់ភ្ញៀវទេសចរអន្តរជាតិនៅពេលឆាប់ៗខាងមុខនេះ ដើម្បីដោះស្រាយបញ្ហាប្រឈមនានា ជាពិសេសទាក់ទងនឹងការប្រើប្រាស់រូបិយបណ្ណដែលមានសភាពចាស់ៗ ទក់ ឬ រហែក ដែលជួបផលលំបាកក្នុងការចាយវាយនៅលើទីផ្សារ។

នៅក្នុងសន្និបាតបូកសរុបលទ្ធផលការងារប្រចាំឆមាសទី១ និងទិសដៅការងារឆមាសទី២ ឆ្នាំ២០២៤ នៅថ្ងៃទី១៩ ខែកក្កដា ឆ្នាំ២០២៤ លោកជំទាវបណ្ឌិត ជា សិរី ទេសាភិបាលធនាគារជាតិនៃកម្ពុជា មានប្រសាសន៍ថា នៅពេលភ្ញៀវទេសចរអន្តរជាតិមកដល់កម្ពុជា គឺពួកគេអាចដោនឡូតកម្មវិធីបាគង (App) បើទោះបីជាមិនទាន់មានគណនីធនាគារនៅក្នុងប្រទេសកម្ពុជាក៏ដោយ ក៏អាចប្រើក្រេឌីតកាតដែលមានពីប្រទេសរបស់ខ្លួនបាន ដូចជា ៖ VISA Card, Master Card, និង Union Pay ជាដើម។

លោកជំទាវបណ្ឌិត បានមានប្រសាសន៍បន្តថា មធ្យោបាយនេះ (ការទូទាត់តាមប្រព័ន្ធបាគង) នឹងជួយសម្រួលដល់ភ្ញៀវទេសចរក្នុងការចាយវាយស្រួលដូចប្រជាជនក្នុងស្រុក ក៏ដូចជាដោះស្រាយបញ្ហាមួយចំនួនដែលភ្ញៀវទេសចរអន្តរជាតិជួបក្នុងការចាយរូបិយបណ្ណដុល្លារ ឬក្រដាសប្រាក់ចាស់ៗ រហែក ពោលគឺជួយកាត់បន្ថយការចាយវាយជាសាច់ប្រាក់សុទ្ធ។

គម្រោងដាក់ឱ្យប្រើប្រាស់ប្រព័ន្ធបាគងសម្រាប់ភ្ញៀវទេសចរអន្តរជាតិនេះ ត្រូវបានរៀបចំឡើងបន្ទាប់ពីប្រមុខរាជរដ្ឋាភិបាល សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានណែនាំឱ្យធនាគារជាតិធ្វើការជាមួយធនាគារពាណិជ្ជក្នុងវិស័យឯកជន កែសម្រួលលក្ខខណ្ឌទទួលយកប្រាក់ដុល្លារអាមេរិក ដែលទក់ មានស្នាមប្រឡាក់តិចតួច ឬក៏មានរហែកតិចតួច ខណៈភ្ញៀវទេសចរអន្តរជាតិជួបការលំបាកពេលដើរកំសាន្តនៅខេត្តសៀមរាប។

កាលថ្ងៃទី១៨ ខែកក្កដា ឆ្នាំ២០២៤ សម្ដេចធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានណែនាំដល់ធនាគារជាតិនៃកម្ពុជា សហការជាមួយធនាគារឯកជន ដើម្បីសម្រួលដល់ការចាយវាយប្រជាពលរដ្ឋ ជាពិសេសការទូទាត់របស់ភ្ញៀវទេសចរចំពោះករណីលុយដុល្លារទក់ ចាស់ ឬដាច់បន្ដិចបន្តួច នៅតំបន់ទេសចរណ៍ក្នុងខេត្តសៀមរាប ។

សម្តេចធិបតី បានមានប្រសាសន៍ដូច្នេះថា ៖ «ពេលខ្លះ យើងដាក់លក្ខខណ្ឌកំណត់តឹងពេក គ្រាន់តែលុយដាច់បន្តិចក៏មិនឱ្យយក ហើយត្រូវកាត់ទឹក។ ដល់អ៊ីចឹង វាពិបាក! កន្លែងលក់ គ្នាយក (លុយដុល្លារ) អត់បាន ព្រោះយកទៅដូរនៅធនាគារ ធនាគារកាត់ទឹក។ ដល់ចឹង អ្នកលក់ត្រូវកាត់ទឹកពីភ្ញៀវ ហើយភ្ញៀវរអ៊ូថា ហេតុអីយកលុយចាយហើយ ពិបាកម្ល៉េស ?»

ដោយឃើញពីភាពលំបាក់នេះ សម្តេចធិបតី បានប្រាប់ទៅកាន់ធនាគារជាតិនៃកម្ពុជាឱ្យធ្វើការជាមួយធនាគារពាណិជ្ជ ឬធនគារឯកជន ទម្លាក់លក្ខខណ្ឌមួយចំននួន ទាក់ទងនឹងករណីទទួលយកប្រាក់ដុល្លារអាមេរិក ដែលមានបញ្ហារហែកដាច់តិចតួច ឬស្នាមតិចតួច ដើម្បីត្រូវធ្វើយ៉ាងណាបង្កភាពងាយស្រួលដល់ការទូទាត់នៅតំបន់ទេសចរណ៍ប្រវត្តិសាស្ត្រនេះ៕