សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពី BBC បានរាយការណ៍ថា ឥណ្ឌា កំពុងពង្រឹងទំនាក់ទំនងពាណិជ្ជកម្មសេរីជាមួយសហភាពអឺរ៉ុប បើទោះបីជារងសម្ពាធអត្រាពន្ធខ្ពស់ពីអាម៉េរិកក៏ដោយ។
កាលពីខែសីហា កន្លងទៅនេះ អាម៉េរិក បានដំឡើងពន្ធទ្វេដង ៥០% លើទំនិញពីឥណ្ឌាពាក់ព័ន្ធករណីដែលប្រទេសនេះទិញប្រេងក្នុងបរិមាណដ៏ច្រើនពីរុស្ស៊ី។ បន្ថែមពីនេះ កាលពីថ្ងៃអង្គារសប្ដាហ៍នេះ ប្រធានាធិបតីអាម៉េរិក Donald Trump បានបញ្ចុះបញ្ចូលបណ្តាប្រទេសនៃសហភាពអឺរ៉ុបដាក់ពន្ធ ១០០% លើឥណ្ឌា និងចិន ដោយសារពួកគេបន្តទិញប្រេងពីរុស្ស៊ី។ ប្រសិនបើសហភាពអឺរ៉ុបយល់ព្រមធ្វើដូច្នោះមែន Trump បានត្រៀមខ្លួនរួចរាល់ក្នុងការដាក់ពន្ធបន្ថែមទៀតលើចិន និងឥណ្ឌា។ យ៉ាងណាមិញ ឥណ្ឌា បានងាកមកពង្រឹងពាណិជ្ជកម្មជាមួយប្រទេសនានា និងកំពុងប្រញាប់ប្រញាល់ឈានដល់ការសម្រេចសេចក្តីចុងក្រោយនៃពាណិជ្ជកម្មជាមួយនឹងសហភាពអឺរ៉ុបមុនពេលដែល Trump ដំឡើងពន្ធបន្ថែមទៀតលើការនាំចេញរបស់ខ្លួន។
ថ្មីៗនេះដែរ រដ្ឋមន្ត្រីក្រសួងពាណិជ្ជកម្មឥណ្ឌា Piyush Goyal បានបង្ហើបថា ឥណ្ឌា បានត្រៀមខ្លួន និងបង្កើនការធ្វើពាណិជ្ជកម្មដើម្បីអាចសម្រេចគោលដៅដ៏ធំមួយនៅក្នុងការធ្វើកិច្ចព្រមព្រៀងពាណិជ្ជកម្មសេរីរបស់ខ្លួនជាមួយសហភាពអឺរ៉ុប EU។ គួរឲ្យបញ្ជាក់ដែរថា មន្ត្រីពាណិជ្ជកម្មកំពូលៗរបស់សហភាពអឺរ៉ុបនឹងធ្វើដំណើរទស្សនកិច្ចមកកាន់ឥណ្ឌាដើម្បីចរចាពាណិជ្ជកម្ម ដែលចាប់ផ្តើមពីថ្ងៃទី១២ ខែកញ្ញា ឆ្នាំ២០២៥។ ឥណ្ឌា និងសហភាពអឺរ៉ុបនឹងពិភាក្សាពាណិជ្ជកម្មសេរីនៅឆ្នាំ២០២១ ឡើងវិញបន្ទាប់ពីការផ្អាករយៈពេលយូរ ហើយកំពុងធ្វើការដើម្បីឈានដល់កិច្ចព្រមព្រៀងមួយនៅចុងឆ្នាំ២០២៥ នេះ។ លោក Goyal សង្ឃឹមថា នៅពេលដែលសមាជិកនៃគណៈកម្មាធិការសហភាពអឺរ៉ុបលោក Maros Sefcovic និងលោក Christophe Hansen មកដល់ប្រទេសឥណ្ឌា ពួកគេនឹងព្យាយាមឈានដល់ការសម្រេចកិច្ចព្រមព្រៀងនេះ។
ក្រៅពីការចរចាលើពាណិជ្ជកម្មសេរី ឥណ្ឌា និងសហភាពអឺរ៉ុប នឹងពិភាក្សាអំពីគោលនយោបាយការបរទេសសំខាន់ៗ សន្តិសុខ និងបញ្ហាដែលទាក់ទងនឹងការការពារជាតិផងដែរដើម្បីឈានទៅកិច្ចប្រជុំកំពូលរវាងសហភាពអឺរ៉ុប-ឥណ្ឌានៅឆ្នាំក្រោយ។ ជាមួយគ្នានេះ គេរំពឺងថា ឥណ្ឌា និងសហភាពអឺរ៉ុបនឹងបន្តទៅមុខជាមួយគ្នាក្នុងការចរចាពាណិជ្ជកម្ម ទោះបីជាមានការខ្វែងគំនិតគ្នាពាក់ព័ន្ធនឹងសង្គ្រាមរុស្ស៊ី-អ៊ុយក្រែនក៏ដោយ។ បច្ចុប្បន្ននេះ ក្រុមហ៊ុនរបស់សហភាពអឺរ៉ុបប្រហែល ៦ ០០០ កំពុងប្រតិបត្តិការនៅក្នុងប្រទេសឥណ្ឌា ខណៈដែលតំបន់នេះគឺជាដៃគូពាណិជ្ជកម្មធំបំផុតមួយរបស់ឥណ្ឌា។ កាលពីឆ្នាំ២០២២ ដល់ ២០២៣ ពាណិជ្ជកម្មទ្វេភាគីឈានដល់ ១៣៥ ពាន់លានដុល្លារ។
ដោយឡែក កាលពីឆ្នាំមុន ឥណ្ឌា ក៏បានចុះហត្ថលេខាលើកិច្ចព្រមព្រៀងពាណិជ្ជកម្មសេរីមានតម្លៃ ១០០ ពាន់លានដុល្លារជាមួយសមាគមពាណិជ្ជកម្មសេរីអឺរ៉ុប (EFTA) ដែលជាក្រុមប្រទេសទ្វីបអឺរ៉ុបចំនួន ៤ ដែលមិនមែនជាសមាជិកនៃសហភាពអឺរ៉ុប។ កាលពីខែកក្កដា កិច្វព្រមព្រៀងពាណិជ្ជកម្មសេរីរវាងឥណ្ឌា-អង់គ្លេសបានចូលជាធរមាន៕
Account
Security
Favourite Content