សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ គណៈកម្មាធិការវិនិយោគកម្ពុជានៅក្នុងសប្តាហ៍នេះ បានអនុម័តគម្រោងវិនិយោគចំនួន៤ ដែលមានទុនវិនិយោគសរុបជិត៥០លានដុល្លារអាម៉េរិក និងបង្កើតការងារជាង២ពាន់កន្លែង។ គម្រោងទាំងនេះមានទីតាំងក្នុងខេត្តបាត់ដំបង ស្វាយរៀង និងខេត្តតាកែវ ។
ស្រុករតនមណ្ឌល ខេត្តបាត់ដំបង ទទួលបានគម្រោងវិនិយោគបង្កើតរោងចក្រកែច្នៃផ្លែឈើគ្រប់ប្រភេទ ក្នុងទំហំទុនវិនិយោគប្រមាណ ២៧លានដុល្លារអាម៉េរិក និងអាចបង្កើតការងារបានចំនួន១.១៦០កន្លែង។
ចំណែកប្រជាពលរដ្ឋក្រុងបាវិត ខេត្តស្វាយរៀង ទទួលបានគម្រោងវិនិយោគបង្កើតរោងចក្រផលិតទូកកម្សាន្ត ទូកកាយាក់ និងសម្ភារៈបន្ទាប់បន្សំគ្រប់ប្រភេទ ស្ថិតក្នុងតំបន់សេដ្ឋកិច្ចពិសេស សានដុង សាន់សែល ស្វាយរៀង ក្នុងទំហំទុនវិនិយោគប្រមាណ ៤,៣លានដុល្លារអាម៉េរិក និងអាចបង្កើតការងារបានចំនួន ១៦៥កន្លែង។
រីឯស្រុកកំពង់រោទិ៍ ខេត្តស្វាយរៀង ទទួលបានគម្រោងវិនិយោគបង្កើតរោងចក្រផ្គុំដំឡើងម៉ាស៊ីនសម្រាប់ហាត់ប្រាណ និងឧបករណ៍ហាត់ប្រាណគ្រប់ប្រភេទ ស្ថិតក្នុងតំបន់សេដ្ឋកិច្ចពិសេស ហ័រស៊ាំង អ៊ិនធើណេសិនណាល ក្នុងទំហំទុនវិនិយោគប្រមាណ ១១លានដុល្លារអាម៉េរិក និងអាចបង្កើតការងារបានចំនួន៤៤៩កន្លែង។
សម្រាប់ប្រជាពលរដ្ឋស្រុកសំរោង ខេត្តតាកែវ ក៏ទទួលបានគម្រោងវិនិយោគបង្កើតរោងចក្រផលិតបរិក្ខារអគ្គិសនីបំភ្លឺ គ្រឿងអគ្គិសនីប្រើប្រាស់ក្នុងផ្ទះ និងប្រអប់ដាក់សម្ភារៈជាង ក្នុងទំហំទុនវិនិយោគប្រមាណ ៥,៤លានដុល្លារអាម៉េរិក និងអាចបង្កើតការងារបានចំនួន ៣៤៣ កន្លែង។
ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា បានលើកឡើងថា៖ក្នុងរយៈពេលប៉ុន្មានឆ្នាំចុងក្រោយ ការវិនិយោគមកពីប្រទេសចិននៅកម្ពុជាមានកំណើនខ្ពស់គួរឱ្យកត់សម្គាល់។ បន្ថែមលើនេះ ឯកឧត្តមអគ្គលេខាធិការបានបង្ហាញក្តីសង្ឃឹមយ៉ាងមុតមាំថា ប្រទេសចិននឹងបន្តជំរុញវិនិយោគិនមកពិនិត្យលទ្ធភាពបណ្តាក់ទុនវិនិយោគនៅកម្ពុជាដើម្បីផលិតវត្ថុធាតុដើម និងផលិតផលពាក់កណ្តាលសម្រេចសម្រាប់ផ្គត់ផ្គង់សហគ្រាសដែលបម្រើដល់ការនាំចេញក្នុងទម្រង់ជាប្រព័ន្ធអេកូឡូស៊ី និង អភិវឌ្ឍតំបន់សេដ្ឋកិច្ចពិសេសឯកទេសផ្នែកកសិ-ឧស្សាហកម្មសម្រាប់ប្រមូលផ្តុំសហគ្រាសកែច្នៃ, បង្កើនតម្លៃបន្ថែម និងជំរុញស្ថិរភាពនៃការផ្គត់ផ្គង់ផលិតផលកសិកម្ម។
បើតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជាបានឱ្យដឹងថា គិតចាប់ពីខែមករា ដល់ដំណាច់ខែកក្កដា ឆ្នាំ២០២៥ គម្រោងវិនិយោគចំនួន ៤៤០គម្រោង ជាមួយដើមទុនប្រមាណ ៦,៧ពាន់លានដុល្លារអាម៉េរិកត្រូវបានក្រុមប្រឹក្សាអភិវឌ្ឍន៍កម្ពុជាអនុម័តជាផ្លូវការ ។ នៅក្នុងចំណោមប្រភពទុនវិនិយោគក្នុងរយៈពេល៧ខែកន្លងមកនេះឃើញថា ប្រភពទុនវិនិយោគពីប្រទេសចិនមានរហូតដល់៥៣,៦៦ភាគរយ ឬស្មើនឹងប្រមាណ ជិត ៣,៦ពាន់លានដុល្លារអាម៉េរិកទៅហើយ ៕
Account
Security
Favourite Content