បរទេស៖ យោងតាមប្រភពព័ត៌មានពី Arab News បានរាយការណ៍ថា ជប៉ុន បានហាមឃាត់ការនាំចេញរថយន្តជជុះទៅកាន់ប្រទេសរុស្ស៊ី ដែលជាពាណិជ្ជកម្មមានតម្លៃជិត ២ ពាន់លានដុល្លារក្នុងមួយឆ្នាំ។

ប្រទេសជប៉ុន ដែលជាប្រទេសនាំចេញរថយន្តជជុះឈានមុខគេរបស់ពិភពលោក បានហាមឃាត់ការនាំចេញរថយន្តប្រណីត និងរថយន្តដឹកទំនិញធុនធ្ងន់ទៅកាន់ប្រទេសរុស្ស៊ីកាលពីឆ្នាំមុន។ កាលពីខែសីហាកន្លងទៅនេះ ទីក្រុងតូក្យូបានពង្រីកការហាមឃាត់បន្ថែមទៀត រួមមានទាំងរថយន្តថ្មី និងប្រើរួច ក៏ដូចជារថយន្ត hybrid និងរថយន្តអគ្គិសនី ដែលស្របទៅនឹងទណ្ឌកម្មរបស់សហភាពអឺរ៉ុប។

ទន្ទឹមនឹងនេះ ការហាមឃាត់ថ្មីនេះបានទម្លាក់តម្លៃរថយន្តជជុះនៅក្នុងប្រទេសជប៉ុន និងបង្ខំឱ្យឈ្មួញកណ្តាលស្វែងរកទិសដៅផ្សេងក្រៅពីប្រទេសរុស្ស៊ី។ SV Alliance ដែលជាក្រុមហ៊ុននាំចេញរថយន្តជជុះ និង ទទួលបានប្រាក់ចំណេញកើនឡើងក្នុងអំឡុងពេលជម្លោះរុស្ស៊ី-អ៊ុយក្រែនបានបញ្ជេញថា អាជីវកម្មរបស់ខ្លួនបានធ្លាក់ចុះ ៧០​ ភាគរយបន្ទាប់ពីការហាមឃាត់។ ចាប់តាំងពីមានសង្គ្រាមមក ក្រុមហ៊ុន SV Alliance បាននាំចេញរថយន្តជជុះជាមធ្យមប្រហែល ៦ ៥០០ គ្រឿងពីទីក្រុង Fushiki ទៅកាន់ប្រទេសរុស្ស៊ីជារៀងរាល់ខែ។

បន្ទាប់ពីក្រុមហ៊ុនផលិតរថយន្តទូទាំងពិភពលោកបានផ្អាកប្រតិបត្តិការជាមួយនឹងរុស្ស៊ីកាលពីឆ្នាំមុនកន្លងទៅនេះ តម្រូវការរបស់រុស្ស៊ីសម្រាប់រថយន្តជប៉ុនជជុះរួមមាន តូយ៉ូតា ហុងដា និង នីសាន់បានកើនឡើង។ លើសពីនេះ រុស្ស៊ីបានទិញរថយន្តជជុះច្រើនជាងមួយភាគបួននៃការនាំចេញរថយន្តជជុះរបស់ជប៉ុនក្នុងតម្លៃជាមធ្យមជិត ៨ ២០០ ដុល្លារក្នុងមួយគ្រឿង។ បើធៀបទៅនឹងឆ្នាំ២០២០ ចំនួននៃការទិញរថយន្តជជុះរបស់រុស្ស៊ីពីជប៉ុនមានចំនួនប្រហែល ១៥ ភាគរយនៃការនាំចេញរថយន្តជជុះសរុបរបស់ជប៉ុន។​

យោងតាមទីភ្នាក់ងារវិភាគរុស្ស៊ី Autostat បានឱ្យដឹងថា នៅចន្លោះខែមករា ដល់ខែសីហាឆ្នាំនេះ រថយន្តជជុះចំនួន ៣០៣ ០០០ គ្រឿងត្រូវបាននាំចេញទៅកាន់ប្រទេសរុស្ស៊ី ដោយជាងពាក់កណ្តាលមានប្រភពមកពីប្រទេសជប៉ុន។ គេប៉ាន់ប្រមាណថា ការលក់រថយន្តជជុះរបស់ជប៉ុនបានឈានដល់ ១,៩ ពាន់លានដុល្លារក្នុងឆ្នាំ ២០២៣0 មុនពេលដែលការហាមឃាត់នេះត្រូវបានអនុម័ត៕