សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពី CNN បានរាយការណ៍ថា រដ្ឋបាល Biden បានចេញការរឹតបន្តឹងជាថ្មីលើការនាំចេញបន្ទះឈីបកុំព្យូទ័រដែលផ្តល់ថាមពលដល់ប្រព័ន្ធបញ្ញាសិប្បនិម្មិត (AI) ផលិតដោយសហរដ្ឋអាម៉េរិក ក្នុងកិច្ចខិតខំប្រឹងប្រែងចុងក្រោយមុនពេលចាកចេញពីតំណែង ដើម្បីទប់ស្កាត់គូប្រជែង ជាពិសេសចិន ពីការចូលប្រើបច្ចេកវិទ្យាទំនើប។
កាលពីថ្ងៃអាទិត្យ រដ្ឋមន្ត្រីក្រសួងពាណិជ្ជកម្មអាម៉េរិក Gina Raimondo លើកឡើងថា ច្បាប់ថ្មីនេះត្រូវបានរៀបចំឡើងដើម្បីការពារបច្ចេកវិទ្យា AI ទំនើបបំផុត និងធានាថាវានៅឆ្ងាយពីគូសត្រូវរបស់អាម៉េរិក ប៉ុន្តែនៅតែអនុញ្ញាតឱ្យមានការចែកចាយ និងចែករំលែកយ៉ាងទូលំទូលាយផងដែរ ដើម្បីផលប្រយោជន៍ជាមួយប្រទេសជាដៃគូ។ កាលពីថ្ងៃចន្ទ សប្ដាហ៍នេះ ការប្រកាសក្របខ័ណ្ឌការនាំចេញសកលនឹងបែងចែកលើក្រុមប្រទេសជា ៣ កម្រិតសម្រាប់ការនាំចេញបន្ទះឈីប និងបច្ចេកវិទ្យា AI កម្រិតខ្ពស់។ ក្រុមប្រទេសកម្រិតទីមួយ គឺជាដៃគូដែលជឿទុកចិត្ត និងសម្ព័ន្ធមិត្តដូចជា៖ អូស្ត្រាលី ជប៉ុន កូរ៉េខាងត្បូង និងតៃវ៉ាន់ដោយមិនមានការរឹតបន្តឹលើពួកគេនោះទេ។ សម្រាប់បណ្តាប្រទេសនៅកម្រិតទី២ គឺស្ថិតនៅក្រោមការរឹតបន្តឹងរួមមាន ចិន និងរុស្ស៊ី ដែលត្រូវបានរារាំងរួចហើយពីការទិញបន្ទះឈីបកម្រិតខ្ពស់។ ការរឹតបន្តឹងថ្មីនេះ ពួកគេនឹងត្រូវបានទប់ស្កាត់ពីការទិញម៉ូដែល AI ដ៏មានឥទ្ធិពលបំផុត ដែលសំដៅលើម៉ូដែលដែលត្រូវបានប្រើប្រាស់សម្រាប់ស្ថាបត្យកម្មមូលដ្ឋាន និងមិនត្រូវបានបញ្ចេញទៅសាធារណៈ។ ជាលទ្ធផល ការផ្លាស់ប្តូរដ៏ធំបំផុតនឹងមានឥទ្ធិពលខ្លាំងលើក្រុមប្រទេសកម្រិតទីបី ដែលជាក្រុមប្រទេសមានហានិភ័យខ្ពស់ ឬមិនចូលបក្សសម្ព័ន្ធ។ ការរឹតបន្តឹងថ្មីនេះនឹងកម្រិតលើបរិមាណថាមពលកុំព្យូទ័រដែលពួកគេអាចទិញបាន ទោះបីជាពួកគេអាចដាក់ពាក្យសុំកូតាបន្ថែមដែលស្ថិតនៅក្រោមតម្រូវការសុវត្ថិភាពជាក់លាក់ក៏ដោយ។ អ្នកវិភាគលើកឡើងថា ការផ្លាស់ប្តូរនេះមានគោលបំណងរារាំងចិនពីការចូលប្រើបន្ទះឈីប AI តាមរយៈប្រទេសទីបី ជាពិសេសបណ្តាប្រទេសមជ្ឈិមបូព៌ា។
គួរឲ្យបញ្ជាក់ដែរថា ការរឹតបន្តឹងថ្មីនេះ គឺវិធានការចុងក្រោយបំផុតត្រូវបានប្រកាសមួយខែបន្ទាប់ពីមានការប្រកាសការរឹតបន្តឹង ដើម្បីទប់ស្កាត់ការលក់គ្រឿងផ្គុំផលិតឈីបជាង ២០ ប្រភេទ និងការរឹតបន្តឹងលើក្រុមហ៊ុនចិនជាច្រើនពីការចូលប្រើបច្ចេកវិទ្យារបស់អាម៉េរិក។ ចាប់តាំងពីខែតុលាឆ្នាំ ២០២២ រដ្ឋបាល Biden បានដាក់ការរឹតបន្តឹងជាច្រើនជុំលើការនាំចេញគ្រឿងផ្គុំផលិតឈីបទៅកាន់ទីក្រុងប៉េកាំង ខណៈដែលចិនមានមហិច្ឆិតាចង់ក្លាយមហាអំណាចបច្ចេកវិទ្យា។
ការរឹតបន្តឹងថ្មីនេះគឺជាលទ្ធផលនៃការប៉ុនប៉ងជាច្រើនឆ្នាំរបស់អាម៉េរិកក្នុងការទប់ស្កាត់ចិនពីការទទួលបានអត្ថប្រយោជន៍បច្ចេកវិទ្យាសម្រាប់ផ្នែកយោធា និងឧស្សាហកម្ម។ យ៉ាងណាមិញ ការរឹតបន្តឹងនេះនឹងធ្វើឱ្យទំនាក់ទំនងរវាងទីក្រុងវ៉ាស៊ីនតោន និងទីក្រុងប៉េកាំងភាពតានតឹងកាន់តែខ្លាំងឡើង មុនពេលដែលប្រធានាធិបតីជាប់ឆ្នោត Donald Trump ចូលកាន់តំណែងនៅសប្តាហ៍ក្រោយ។ មិនត្រឹមតែប៉ុណ្ណោះ ការរឹតបន្តឹងថ្មីនេះបង្កឱ្យមានការរិះគន់យ៉ាងខ្លាំងពីក្រុមហ៊ុនបច្ចេកវិទ្យាយក្សរបស់សហរដ្ឋអាម៉េរិកដូចជា Nvidia និង Oracle ខណៈដែលតម្រូវការកើនឡើងជាសកលសម្រាប់បន្ទះឈីប AI ដែលផលិតដោយ Nvidia, AMD និង Intel ៕
Account
Security
Favourite Content