សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ព្រឹត្តិការណ៍កីឡាស៊ីហ្គេម (SEA Games) និងអាស៊ានប៉ារ៉ាហ្គេម (ASEAN Para Games) គឺជាព្រឹត្តិការណ៍ដ៏ធំមួយដែលធ្វើវិលជុំក្នុងប្រទេសទាំង ១០របស់អាស៊ាន ហើយបានចាប់ផ្ដើមតាំងពីឆ្នាំ១៩៥៩ ដែលគិតមកដល់ពេលនេះគឺមានរយៈពេល ៦៤ឆ្នាំមកហើយ។ កីឡាស៊ីហ្គេម ធ្វើឡើងក្នុងចន្លោះ ២ឆ្នាំម្ដង ហើយធ្វើឡើងនៅក្នុងឆ្នាំសេស (១៩៥៩, ១៩៦១, ១៩៦៣, ១៩៦៥, ១៩៦៧…)។
អំពីកីឡាស៊ីហ្គេមនៅកម្ពុជា ៖ មុននឹងមកដល់កម្ពុជា កីឡាស៊ីហ្គេមលើកទី៣១ និងអាស៊ានប៉ារ៉ាហ្គេមលើកទី១១ ត្រូវបានធ្វើឡើងនៅប្រទេសវៀតណាមកាលពីឆ្នាំ ២០២១។ សម្រាប់កម្ពុជាក្នុងឆ្នាំនេះ គឺនឹងត្រូវធ្វើជាម្ចាស់ផ្ទះជាលើកដំបូងក្នុងប្រវត្តិសាស្ត្រ រាប់ចាប់តាំងពីកីឡានេះត្រូវបានបង្កើតឡើងមក។ កាលពីឆ្នាំ១៩៦៣ កម្ពុជាក៏ត្រូវដល់វេនរៀបចំព្រឹត្តិការណ៍កីឡានេះម្ដងដែរ ប៉ុន្តែដោយសារបញ្ហាចម្រូងចម្រាស់នៃវិបត្តិនយោបាយផ្ទៃក្នុងប្រទេសកម្ពុជាក៏ខកខានមិនបានរៀបចំនូវការប្រកួតឡើយ។ ក្រោយៗមកទៀត ដោយសារតែមមាញឹកក្នុងការកសាងស្ថិរភាព សន្តិភាពខាងក្នុងប្រទេស ទើបកម្ពុជាពន្យារពេលរហូតដល់ឆ្នាំ២០២៣នេះ។
ឋេរៈវេលានៃការប្រកួត ៖ សម្រាប់ការរៀបចំកម្មវិធីប្រកួត គឺនឹងត្រូវបែងចែកជា២ ដោយកីឡាស៊ីហ្គេមលើកទី៣២ នឹងធ្វើឡើងមុន (ចាប់ពីថ្ងៃទី៥ ដល់ថ្ងៃទី១៧ ខែឧសភា ឆ្នាំ២០២៣) ហើយការប្រកួតកីឡា អាស៊ានប៉ារ៉ាហ្គេមលើកទី១២ នឹងត្រូវធ្វើក្រោយ ដោយគិតចាប់ពីថ្ងៃទី៣ ដល់ថ្ងៃទី៩ ខែមិថុនា ឆ្នាំ២០២៣។ គិតត្រឹមថ្ងៃទី ២៦ ខែមករានេះ កម្ពុជានៅសល់ត្រឹមតែ ៩៩ថ្ងៃទៀតប៉ុណ្ណោះ នឹងត្រូវដល់ពេលវេលាធ្វើជាម្ចាស់ផ្ទះរៀបចំព្រឹត្តិការណ៍កីឡាស៊ីហ្គេមយ៉ាងពេញទីហើយ។
អំពីអ្នករៀបចំ ៖ ព្រឹត្តិការណ៍កីឡាស៊ីហ្គេមឆ្នាំ២០២៣ ស្ថិតក្រោមការរៀបចំរបស់គណៈកម្មាធិការជាតិរៀបចំការប្រកួតកីឡាអាស៊ីអាគ្នយ៍ លើកទី៣២ ឆ្នាំ២០២៣ (CAMSOC) ដែលមានសម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ជាប្រធាន។ វេបសាយ និងបណ្ដាញសង្គមផ្លូវការរបស់កម្ពុជាលើការជូនដំណឹងផ្សេងៗស្ដីអំពីការរៀបចំព្រឹត្តិការណ៍កីឡាស៊ីហ្គេម មានឈ្មោះថា «Cambodia 2023»។
ពាក្យស្លោក ៖ ជាទូទៅ ប្រទេសជាម្ចាស់ផ្ទះប្រារព្ធព្រឹត្តិការណ៍កីឡាស៊ីហ្គេម ត្រូវបង្កើតនូវពាក្យស្លោករៀងខ្លួន ដើម្បីឱ្យត្រូវទៅតាមបរិបថប្រទេសនីមួយៗ។ ដោយឡែក ពាក្យស្លោករបស់កម្ពុជាគឺ «កីឡារស់ក្នុងសន្តិភាព – Sport: Live in Peace»។
អំពីវិញ្ញាសាប្រកួត ៖ ប្រទេសជាម្ចាស់ផ្ទះមានសិទ្ធិក្នុងការសម្រេចជ្រើសរើសបញ្ចូលវិញ្ញាសារទៅក្នុងការប្រកួត ដែលនេះបានផ្ដល់អាទិភាពដល់ម្ចាស់ផ្ទះ ព្រោះក្នុងចំណោមកីឡាដែលត្រូវបានជ្រើសរើសច្បាស់ណាស់ថាមានប្រភេទកីឡាអត្តសញ្ញាណ តួយ៉ាង កម្ពុជាកីឡាអត្តសញ្ញាដូចជា ល្បុក្កតោ ប្រណាំងទូក និងគុណខ្មែរជាដើម។ ព្រឹត្តិការណ៍កីឡាអាស៊ីអាគ្នេយ៍លើកទី៣២ ឆ្នាំ២០២៣នៅកម្ពុជា បានដាក់បញ្ចូល ៣៨ប្រភេទកីឡា និង ៦០៨វិញ្ញាសា ក្នុងកម្មវិធីប្រកួត។ ចំនួននេះបានបំបែកកំណត់ត្រាជាប្រទេសដែលមានវិញ្ញាសារប្រកួតច្រើនជាងគេ រាប់ចាប់តាំងពីឆ្នាំ១៩៥៩មក។
អំពីការរាប់ថយក្រោយ ៖ មិនមែនតែកម្ពុជានោះទេ ប្រទេសដែលជាម្ចាស់ផ្ទះកន្លងទៅក៏បង្កើតនូវយុទ្ធនាការរាប់ថយក្រោយផងដែរ រហូតវាបានក្លាយជាទម្លាប់តៗគ្នា។ ការរាប់ថយក្រោយអាចមាន ១០០០ថ្ងៃ ៥០០ថ្ងៃ ២០០ថ្ងៃ ១០០ថ្ងៃជាដើម ដែលយុទ្ធនាការរាប់ថយក្រោយនេះគឺដើម្បីពញ្ញាក់ស្មារតីប្រជាជនទាំងក្នុងស្រុក និងក្រៅស្រុក ឱ្យរួសរាន់រៀបចំកិច្ចការចាំបាច់នានាឱ្យរួចរាល់មុនថ្ងៃប្រកួតមកដល់។ សម្រាប់កម្ពុជានិយាយដោយឡែក គឺចង់ប្រមូលនូវកម្លាំងសាមគ្គីភាពប្រជាជាតិទាំងមូល ដើម្បីត្រៀមខ្លួនស្វាគមន៍ភ្ញៀវរាប់ម៉ឺននាក់ នាពេលខាងមុខប្រកបទៅដោយស្នាមញញឹមរួសរាយរាក់ទាក់៕
Account
Security
Favourite Content