សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
គូឡាឡាំពួ៖ ក្រុមហ៊ុន Farm Fresh Group របស់ម៉ាឡេស៊ី និងក្រុមហ៊ុន Alpha group របស់កម្ពុជា បានចុះអនុស្សរណៈនៃការយោគយល់គ្នា ដើម្បីបោះទុនវិនិយោគបង្កើតកសិកដ្ឋានចិញ្ចឹមគោយកទឹកដោះ និងបង្កើតរោងចក្រសង្វាក់ផលិតកម្មទឹកដោះគោស្រស់ និងទឹកដោះគោឆៅកំប៉ុងនៅកម្ពុជា ដើម្បីបំពេញតម្រូវការទីផ្សារក្នុងស្រុក និងឈានដល់ការនាំចេញ។ ពិធីនេះ ប្រព្រឹត្តទៅក្រោមវត្តមានឯកឧត្តមឧបនាយករដ្ឋមន្ត្រី ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា ជាតំណាង សម្តេច ហ៊ុន ម៉ាណែត នាយករដ្ឋមន្ត្រីកម្ពុជា ព្រមទាំងមានការអញ្ជើញចូលរួមពីថ្នាក់ដឹកនាំរបស់សភាពាណិជ្ជកម្មកម្ពុជាផងដែរ។
ឯកឧត្តម ស៊ុន ចាន់ថុល បានមានប្រសាសន៍ថា ៖ អនុស្សរណៈលើការយោគយល់គ្នាដែលក្រុមហ៊ុននៃប្រទេសទាំងពីរបានផ្លាស់ប្តូរនាឱកាសនេះ គឺដើម្បីបង្កើត និងពង្រីកកិច្ចសហប្រតិបត្តិការអាជីវកម្ម និងការវិនិយោគរបស់ក្រុមហ៊ុន Farm Fresh Berhad មកកាន់កម្ពុជា ពាក់ព័ន្ធនឹងខ្សែចង្វាក់ផលិតកម្មផលិតផលចេញពីទឹកដោះគោស្រស់ ដើម្បីចូលរួមបំពេញតម្រូវការទីផ្សារនៅកម្ពុជា ដោយក្នុងមួយថ្ងៃប្រមាណ ១០ម៉ឺនលីត្រ ប៉ុន្តែការផលិតសរុបប្រចាំថ្ងៃ មានប្រមាណត្រឹម ២ម៉ឺនលីត្រប៉ុណ្ណោះ តាមរយៈក្រុមហ៊ុន និងកសិដ្ឋានចិញ្ចឹមគោយកទឹកដោះធំៗចំនួន៤ ។
សូមជម្រាបថា គិតត្រឹមឆ្នាំ២០២៤ ក្រុមហ៊ុន និងកសិដ្ឋានចិញ្ចឹមគោយកទឹកដោះធំៗទាំង៤ រួមមាន៖ កសិដ្ឋានគិរីសួគ៌ កសិដ្ឋានមូមូហ្វាម កសិដ្ឋានក្នុងឧទ្យានជាតិ ឫស្សីត្រឹប និងកសិដ្ឋាន អូម៉ កម្ពុជា រួមគ្នាអាចផលិតទឹកដោះគោស្រស់ប្រមាណជាង ១ម៉ឺន ៣ពាន់លីត្រក្នុងមួយថ្ងៃ ឬស្មើនឹង ៥លានលីត្រក្នុងមួយឆ្នាំ ដែលចំនួននេះស្មើនឹងប្រមាណ ១៧ភាគរយនៃតម្រូវការទឹកដោះគោស្រស់សរុបក្នុងស្រុក ដែលមានជាង៣០លានលីត្រក្នុងមួយឆ្នាំ។
អ្នកឧកញ៉ា លី ឃុនថៃ ប្រធានក្រុមប្រឹក្សាភិបាលនៃក្រុមហ៊ុន Alpha group បានគូសបញ្ជាក់ថា ការចាប់ដៃវិនិយោគជាមួយក្រុមហ៊ុនរបស់ម៉ាឡេស៊ីនាពេលនេះ ជាការពង្រីកការផលិតទឹកដោះគោស្រស់ និងទឹកដោះគោឆៅ ដើម្បីបំពេញតម្រូវការទឹកដោះគោស្រស់ និងទឹកដោះគោឆៅកំប៉ុង ដែលកំពុងមានកំណើនខ្ពស់នៅកម្ពុជា។ ដោយឡែក សម្រាប់ក្រុមហ៊ុន Farm Fresh Group គឺជាក្រុមហ៊ុនដែលធំជាងគេនៅក្នុងប្រទេសម៉ាឡេស៊ី ដែលមានកសិដ្ឋានចិញ្ចឹមគោយកទឹកដោះ និងមានគោចំនួនប្រមាណ ១ម៉ឺន ៤ពាន់ក្បាល ដែលស័ក្ដិសមចូលរួមជាមួយសង្វាក់ផលិតកម្មទឹកដោះគោស្រស់ និងទឹកដោះគោឆៅកំប៉ុងនៅកម្ពុជា៕
Account
Security
Favourite Content