ភ្នំពេញ៖ ឯកឧត្តម  ឌិត ទីណា រដ្ឋមន្រ្តីក្រសួងកសិកម្ម រុក្ខប្រមាញ់ និងនេសាទ កាលពីថ្ងៃទី១៨ ខែមិថុនា ឆ្នាំ២០២៤ បានចុះជួបសំណេះសំណាលជាមួយប្រជាកសិករដែលជាសមាជិកសហគមន៍ដាំបន្លែក្នុងផ្ទះសំណាញ់ នៅឃុំត្រាំកក់ ស្រុកត្រាំកក់ ខេត្តតាកែវ ក្នុងគោលបំណងកៀរគរកសិករឱ្យចងក្រងជា «សហគមន៍កសិកម្មទំនើប» ដើម្បីកាត់បន្ថយការចំណាយ និងផ្ដល់ផលចំណេញច្រើន។

ក្នុងជំនួបសំណេះសំណាលជាមួយកសិករសមាជិកសហគមន៍ដាំបន្លែក្នុងផ្ទះសំណាញ់ នៅឃុំត្រាំកក់ ស្រុកត្រាំ​កក់ ខេត្តតាកែវ ឯកឧត្ត ឌិត ទីណា បានពន្យល់ទៅកាន់កសិករថា ការចូលរួមក្នុងសហគមន៍កសិកម្មទំនើប នឹងជួយឱ្យពួកគេទទួលបានផលចំណេញច្រើន តាមរយៈការរៀបចំផែនការផលិតច្បាស់លាស់ ហើយផ្សារភ្ជាប់ទៅកាន់ទីផ្សារដោយត្រង់។

ឯកឧត្តម ឌិត ទីណា បានបញ្ជាក់ថា ៖

«ការចូលរួមក្នុងសហគមន៍កសិកម្មទំនើប នឹងជួយឱ្យប្រជាកសិករទទួលបានផលចំណេញច្រើន មិនត្រឹមតែប៉ុណ្ណោះ សហគមន៍កសិកម្មទំនើប នឹងទទួលបានការគាំទ្រផ្នែកហេដ្ឋារចនាសម្ព័ន្ធផ្សេងៗ ដូចជា ផ្ទះសំ​ណាញ់ ប្រព័ន្ធស្រោចស្រពត្រឹមត្រូវតាមបច្ចេកទេស ដើម្បីធ្វើយ៉ាងណាកាត់បន្ថយការចំណាយឱ្យបានជាអតិបរមា»។

បន្ថែមពីនេះឯកឧត្តម រដ្ឋមន្ត្រី ក៏បានណែនាំឱ្យ ឯកឧត្តម ឃឹម ហ្វីណង់ ក៏ដូចជាថ្នាក់ដឹកនាំដទៃទៀត ដែលទទួលបន្ទុកការងារ «សហគមន៍កសិកម្មទំនើប» រួមគ្នាពិនិត្យមើលលទ្ធភាពជាមួយប្រជាកសិករ និងសមាជិកសហគមន៍កសិកម្មដែលចាប់អារម្មណ៍ ដើម្បីសិក្សាបន្តអំពីលទ្ធភាពនៃការចងក្រងសហគមន៍កសិកម្មទំនើប ទៅតាមគោលការណ៍ស្ម័គ្រចិត្ត និងសក្ដានុពលនៃផលិតកម្មរបស់ប្រជាកសិករនៅស្រុកត្រាំកក់ ខេត្តតាកែវនេះផងដែរ។

ឯកឧត្តម ឃឹម ហ្វីណង់ អ្នកនាំពាក្យ​ក្រសួង​កសិកម្ម រុក្ខា​ប្រមាញ់ និង​នេសាទ​ ថ្មីៗនេះបានបង្ហាញអត្ថ​ប្រយោជន៍​ដ៏​សំខាន់​មួយ​នៃ​ការ​ចង​ក្រង​គ្នា​ជា​សហគមន៍​កសិកម្ម​ទំនើប នៅក្នុងជំនួប​សហគមន៍​​​កសិកម្ម​ទំនើប​ស្រូវ​នាង​អំ ដែលបានចូលជាសហគមន៍​​​កសិកម្ម​ទំនើបតាមរយៈក្រសួង​កសិកម្មដែល​កំពុង​ជួយ​គាំទ្រ​ដល់​សហគមន៍នេះដោយពួកគាត់បានសម្រេចមូលមតិគ្នាប្រើដ្រូន​សម្រាប់​​ព្រោះស្រូវ ដែលជាការ​រៀបចំ​ផែន​ការ​មេ​ក្នុង​ការ​អភិវឌ្ឍ​យូរ​អង្វែង។

ឯកឧត្តម ឃឹម ហ្វីណង់ បានថ្លែង​ថា៖

«នេះ​ហើយ​គឺ​ជាការ​​ស្តែងចេញឱ្យឃើញ​​ថា សហគមន៍​កសិកម្មទំនើបស្រូវ​នាងអំ គឺជា​សហគមន៍​កសិកម្ម​តែ​មួយ​គត់​ដែល​មាន​ដ្រូន​សម្រាប់​​ប្រើប្រាស់​​​ព្រោះស្រូវ ដោយកាលពីមុន​​កសិករ​នៅ​ទីនេះ​ធ្វើ​ស្រែ​ក្នុង​ទំហំ​តូចៗ​រៀងៗ​ខ្លួន និង​គ្មានជម្រើស​អ្វី​ក្រៅ​ពី​សាបព្រោះ​ដោយ​ដៃ ​ឬ​ជួល​គ្រឿង​ចក្រ ឬ​ជួល​ដ្រូន​ពី​គេ​ក្នុង​តម្លៃ​ខ្ពស់។ ដ្រូន​មួយនេះ​អាចមានសមត្ថភាពព្រោះស្រូវបានរហូតដល់ ៧០ហិកតា ក្នុងមួយថ្ងៃ និងអាចប្រើសម្រាប់បាញ់ជី និងបាញ់ថ្នាំបានទៀតផង»​។

ឯកឧត្តម ឃឹម ហ្វីណង់ បានគូសបញ្ជាក់​ថា ៖

«សហគមន៍​កសិកម្ម​ទំនើប​ស្រូវ​នាង​អំ ​មាន​មហិច្ឆតា​ក្លាយ​ទៅ​ជា​សហគមន៍​កសិកម្ម​ចម្រុះ​មួយ​ដែល​មាន​ចរិត​បរិយាបន្ន​ទូលំ​ទូលាយ និង​មាន​សមាហរណកម្ម​ខ្ពស់​ជា​មួយ​នឹង​ប្រព័ន្ធ​អេកូឡូហ្ស៊ី​នៅ​ជុំ​វិញ​ដែល​មាន​ស្រាប់​ ធានា​បាន​នូវ​ការ​អភិវឌ្ឍ​សហគមន៍ ​ដែល​មាន​ទាំង​និរន្តភាព​សេដ្ឋកិច្ច និងបរិស្ថាន។ លើស​ពី​នេះ​ សហគមន៍​នេះ​ អាច​ជួយ​លើក​ស្ទួយ​ជីវភាព​របស់​បង​ប្អូន​ប្រជាកសិករ​ជា​សមាជិក​សហគមន៍​នៅ​ក្នុង​តំបន់​នេះ​ប្រកប​ដោយ​សមធ​ម៌ផង​ដែរ»។

សូមជម្រាបថា ចក្ខុវិស័យនៃការអនុវត្តផលិតកម្មកសិកម្មរួមគ្នាក្នុងទ្រង់ទ្រាយធំ ដែលជាផ្នែកមួយនៃកម្មវិធីគោលនយោបាយវិស័យកសិកម្មក្នុងគោលបំណងការបង្កើត«សហគមន៍កសិកម្មទំនើប» គឺជាអាទិភាពរបស់រដ្ឋាភិបាលអាណត្តិទី៧  ដែលចាប់ផ្ដើមដាក់ឱ្យអនុវត្តចាប់តាំងពីឆ្នាំ២០២៣ គឺដើម្បីប្រែក្លាយវិស័យកសិកម្មពីលក្ខណៈគ្រួ​សារឱ្យទៅជាសហគ្រាស សេដ្ឋកិច្ចកសិកម្មដ៏រឹងមាំ មានសមាហរណកម្មខ្ពស់ មានសេដ្ឋកិច្ចមាត្រដ្ឋាន (Econo​mies of Scale) និងមានសមត្ថភាពប្រកួតប្រជែងទាំងបរិមាណ និងគុណភាព៕