ក្រសួងកសិកម្ម បានបង្ហាញពីអត្ថប្រយោជន៍សំខាន់ៗ និងរយៈពេលដាំដុះ ព្រមទាំងរបៀបនៃការទទួលទិន្នផលផងដែរអំពីពូជស្រូវសែនក្រអូប០១ ដើម្បីឱ្យប្រជាកសិករនៅតាមមូលដ្ឋាន ឬសហគមន៍អាចស្វែងយល់អំពីពូជស្រូវមួយនេះ និងជំរុញការ​ដាំ​ដុះ ​ផលិត​បន្ថែម ជាពិសេសការបញ្ចេញ​ពូជ​សុទ្ធ​ ដើម្បី​ចែកជូន​ដល់​កសិករ​ ខណៈដែលតម្រូវការនៅលើទីផ្សារប្រទេសចិន អឺរ៉ុបមានការកើនឡើង។

ពូជស្រូវសែនក្រអូប០១ ជាប្រភេទស្រូវស្រាល ដែលការដាំដុះប្រើរយៈពេលខ្លីមិនប្រកាន់រដូវ ទទួលបានទិន្នផលខ្ពស់ ខណៈបច្ចុប្បន្នកសិករប្រមាណ ៤០ភាគរយ កំពុងតែដាំដុះ​ ស្របពេលដែលពូជនេះកំពុងមានតម្រូវការច្រើននៅទីផ្សារចិន និងនៅអឺរ៉ុប ។ ជាមួយគ្នានេះ ដើម្បីឱ្យប្រជាកសិករយល់កាន់តែច្បាស់ ក្រសួងកសិកម្មបានលើកឡើង និងពន្យល់ពីអត្ថប្រ​យោន៍នៃពូជស្រូវសែនក្រអូបរបស់លោក ឡោ ប៊ុណ្ណា នាយកវិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជា កាឌី (CARDI) ។

លោក​ ឡោ ប៊ុណ្ណា នាយក​វិទ្យា​ស្ថាន​ស្រាវជ្រាវ និង​អភិវឌ្ឍន៍​កសិកម្ម (CARDI) បាន​ជំរុញឱ្យមាន​ការប្រើប្រាស់​ពូជ​សុទ្ធ​នេះ ដែលជា​គម្រោង​របស់រ​ដ្ឋ​មន្ត្រី​ក្រសួងកសិកម្ម ឯក​ឧត្តម ឌិ​ត ទីណា ដោយ​គម្រោង​ប្រើប្រាស់​ពូជ​សុទ្ធ​នេះដែរ​គិត​ត្រឹម​ឆ្នាំ២០២៣​ នេះ ខាង​វិទ្យាស្ថាន​របស់លោក​បាន​បញ្ចេញ​ពូជ​សុទ្ធ​ផ្ការំដួល​ក្នុ​​ង​បរិមាណ​ប្រមាណ​ជាង២០​តោន​។

លោក​ ឡោ ប៊ុណ្ណា បានលើកឡើងថា ពូជស្រូវសែនក្រអូបស្រូប០១ ជាប្រភេទស្រូវស្រាល ប្រសិនបើព្រួសត្រូវប្រើរយៈពេល១០៥ថ្ងៃ តែបើកសិករយកវាទៅស្ទូង នោះនឹងទទួលបានផលរយៈពេល ១១៥ ថ្ងៃ។ ពូជនេះគេបានផលិតចេញពីពូជស្រូវសែនក្រអូបចំនួន ៤ ពូជ ដែលបានធ្វើការជាមួយប្រជាករសន្សុតពូជរយៈពេល៦ឆ្នាំ ទើបជ្រើសរើសបានស្រឡាយវាចំនួនបី ហើយពូជស្រូវល្អជាងគេចំនួន ៣ ស្រឡាយនេះគឺត្រូវដាំបន្សាំលើស្រែកសិករចំនួនពីរឆ្នាំ ទើបទទួលបានស្រឡាយមួយល្អជាងគេ គឺពូជសែនក្រូប០១ ដែលកសិករអាចដាំមិនប្រកាន់រដូវប្រសិនជាកសិករអាចគ្រប់គ្រងទឹកបានល្អ។

លោក​ ឡោ ប៊ុណ្ណា បានបញ្ជាក់ថា ពូជស្រូវសែនក្រអូប ជាពូជស្រូវមួយ ដែលមានតម្រូវការទីផ្សារនាំចេញទៅច្រើនប្រទេសលើពិភពលោក។ នេះជាពូជស្រូវមានលក្ខណៈល្អមួយ ដែលកសិករផលិតដោយមិនបារម្ភពីការខ្វះទីផ្សារ។ ចំណែកទិន្នផល ជាទូទៅមានការប្រែប្រួលពី ៣.៩ ទៅ ៦តោនក្នុងមួយហិកតា ។

លោក​បានបញ្ជាក់ទៀតថា ស្រូវពូជសែនក្រអូប០១នេះ វាមិនមានលក្ខណៈធន់អ្វីជាសំខាន់ទេ តែវាមានលក្ខណៈសមស្របទៅនឹងតំបន់ទំនាប ជាពិសេសគឺការធ្វើស្រែនៅដើមរដូវ ឬមួយក៏ក្នុងចុងរដូវវស្សា នៅពេលដែលមានទឹកគ្រប់គ្រាន់ពូជស្រូវសែនក្រអូបនេះមានលក្ខណៈសមស្របសម្រាប់តំបន់នេះ។

លោក​ ឡោ ប៊ុណ្ណា បានបញ្ជាក់ថា ៖

«ស្រូវសែនក្រអូបនេះគឺយើងបានបញ្ចេញឱ្យកសិករប្រើតាំងពីឆ្នាំ២០១៩ តែឥឡូវនេះកសិករគាត់ធ្វើការដាំដុះច្រើននៅតាមស្រែ ជារួមគឺប្រមាណជា ៤០ភាគរយ គឺដោយសារវាមានលក្ខណៈងាយស្រួល ទីមួយ សមស្របសម្រាប់កសិករដាំដុះនៅតំបន់ទិវាទំនាប ។ ទីពីរ វាមានទីផ្សារល្អ ដូចសព្វថ្ងៃនេះគឺទីផ្សារ​​នៅអឺរ៉ុប និងទីផ្សារប្រទេសចិន មានតម្រូវការច្រើន។ អញ្ចឹងកសិករយើងត្រូវផលិតពូជស្រូវនេះឱ្យបានល្អ គុណភាពល្អ ដើម្បីផ្គត់ផ្គង់ទៅក្រុមហ៊ុនដែលធ្វើការនាំចេញ។ កាលណាយើងមានទីផ្សារទូលាយ សេដ្ឋកិច្ចក៏ធូរធារទៅតាមហ្នឹងដែរ»។

សូមរំលឹកថា ស្រូវសែនក្រអូប ០១ នេះគឺជាគោលនយោបាយរបស់រាជរដ្ឋាភិបាល តាមរយៈក្រសួងកសិកម្មដែលចង់ជំរុញឱ្យកសិករធ្វើការដាំដុះឱ្យបានច្រើន ។ កាលណាកសិករដាំដោយប្រើពូជសុទ្ធ ងាយស្រួលដល់សហគមន៍ ពិសេសសហព័ន្ធស្រូវអង្ករក្នុងការប្រមូលទិញ និងធានាបាននូវពូជសុទ្ធ ពូជស្រូវល្អដែលមានស្តង់ដារសម្រាប់ការនាំចេញ។

លោក​ ឡោ ប៊ុណ្ណា បានលើកឡើងដែរថា កាលណាកសិករយកពូជសុទ្ធទៅប្រើ គឺចំណេញច្រើន ។ ទី១កសិករអាចបង្កើនទិន្នផលបានដល់ទៅ១៥ភាគរយ ហើយនៅពេលផលិតពូជសុទ្ធគឺស្រូវមានគុណភាពល្អ ហើយមានទីផ្សារ។

ទី២ ដើម្បីទទួលបានទិន្នផលខ្ពស់ ចំណេញច្រើន ហើយសំខាន់ផុតកសិករត្រូវរៀបចំការកៀសដី។ ដូច្នេះចាប់ពីកសិករចាប់ផ្តើមកៀសដីបានស្មើគឺអាចសន្សំសំចៃទឹក កាត់បន្ថយការរាតត្បាតជំងឺ ឬកណ្ដុរបំផ្លាញ។

ទី៣ ស្រូវលូតលាស់ល្អ ទុំស្មើគ្នា ការប្រមូលផលអត់មានការបាត់បង់ ដែលចំណុចទីបីនេះសំខាន់ណាស់ គឺការប្រមូលផលតែម្ដង ដែលកសិករត្រូវតែដឹងថាស្រូវទុំពេលណា ប្រមូលផលពេលណា។ តាមការណែនាំទាំងនេះ កសិករត្រូវប្រមូលផលនៅពេលមានសំណើមពី ២៥ ទៅ២៧ភាគរយ ដើម្បីប្រមូលផលទុក ដែលអាចទទួលបានគុណភាពអង្ករល្អ និងទុកជាពូជសម្រាប់ដាំដុះបន្តទៅទៀត។