សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពីរ៉យទ័របានរាយការណ៍ថា សេដ្ឋកិច្ចរបស់ មីយ៉ាន់ម៉ា អាចនឹងធ្លាក់ចុះ ២,៥% ឆ្នាំ២០២៥ ដោយសារតែផលប៉ះពាល់នៃការរញ្ជួយដីដ៏ខ្លាំងក្លាកាលពីខែមីនាកន្លងទៅនេះ។
ធនាគារពិភពលោក (World Bank) បានលើកឡើងនៅក្នុងរបាយការណ៍របស់ខ្លួនថា គ្រោះរញ្ជួយដីកម្រិត ៧.៧ រិចទ័រ នឹងបង្កការខូចខាតដោយផ្ទាល់ចំពោះទ្រព្យសម្បត្តិ និងហេដ្ឋារចនាសម្ព័ន្ធក្នុងតម្លៃប្រមាណ ១១ ពាន់លានដុល្លារ ឬ ១៤% នៃផលិតផលក្នុងស្រុកសរុបរបស់ខ្លួន។ លើសពីនេះ គ្រោះរញ្ជួយដីនេះបានប៉ះពាល់ដល់មនុស្សជាង ១៧ លាននាក់ ដោយ ៩ លាននាក់បានរងការប៉ះពាល់យ៉ាងធ្ងន់ធ្ងរ ហើយចំនួនអ្នកស្លាប់បានកើនឡើងដល់ ៣ ៧០០នាក់។ មិនត្រឹមតែប៉ុណ្ណោះ គ្រោះរញ្ជួយដីបានបណ្តាលឱ្យបាត់បង់ជីវិត និងការផ្លាស់ទីលំនៅច្រើនគួរឱ្យកត់សម្គាល់ ខណៈពេលដែលធ្វើឱ្យស្ថានភាពសេដ្ឋកិច្ចកំពុងលំបាករួចទៅហើយ ដែលកាន់តែបន្ថែមសម្ពាធលើពលរដ្ឋមីយ៉ាន់ម៉ា។ ទន្ទឹមនឹងនេះ កិច្ចខិតខំប្រឹងប្រែងស្តារសេដ្ឋកិច្ចឡើងវិញគឺចាំបាច់ចំផុត ដើម្បីជួយដល់ពលរដ្ឋដែលងាយរងគ្រោះ។
កាលពីខែធ្នូ ឆ្នាំ២០២៤កន្លងទៅ ធនាគារពិភពលោកបានព្យាករណ៍ថា សេដ្ឋកិច្ចមីយ៉ាន់ម៉ានឹងធ្លាក់ចុះ ១% នៅក្នុងឆ្នាំ២០២៥ ដោយសារទឹកជំនន់ធ្ងន់ធ្ងរនៅក្នុងប្រទេស។ ជាមួយគ្នានេះ ស្របពេលដែលមីយ៉ាន់ម៉ាកំពុងទទួលរងផលប៉ះពាល់ពីគ្រោះធម្មជាតិ ប្រទេសនេះក៏ស្ថិតក្នុងភាពចលាចលចាប់តាំងពីយោធាបានដណ្តើមអំណាចនៅក្នុងរដ្ឋប្រហារនាឆ្នាំ២០២១ ដែលបង្កឱ្យមានសង្រ្គាមស៊ីវិល។ យ៉ាងណាក៏ដោយ ទោះបីជាមានកិច្ចខិតខំប្រឹងប្រែងអន្តរាគមន៍ពីសំណាក់អន្តរជាតិក្នុងការបញ្ឈប់ជម្លោះក៏ដោយ ប៉ុន្តែសង្រ្គាមស៊ីវិលនៅតែបន្តរហូតដល់បច្ចុប្បន្ន ដោយសាររបបយោធារំលោភលើបទឈប់បាញ់។
ធនាគារពិភពលោកបានព្យាករណ៍ថា តំបន់ដែលរងផលប៉ះពាល់ខ្លាំងបំផុតគឺទីក្រុងម៉ាន់ដាឡាយ និងណៃពិដោ។ របាយការណ៍បានបញ្ជាក់ថា ការរញ្ជួយដីអាចបង្កើនអត្រាភាពក្រីក្រជាតិដល់ទៅ ២,៨% ដែលជំរុញឱ្យគ្រួសារមីយ៉ាន់ម៉ាកាន់តែធ្លាក់ក្នុងស្ថានភាពក្រីក្រ។ មុនពេលមានគ្រោះរញ្ជួយដី ការស្ទង់មតិមួយប៉ាន់ប្រមាណថា អត្រានៃភាពក្រីក្រមីយ៉ាន់ម៉ានឹងកើនឡើង ៣១% ក្នុងឆ្នាំ២០២៤ ហើយសម្រាប់ឆ្នាំ២០២៥នេះ អត្រានៃភាពក្រីក្រអាចនឹងកើនឡើងលើសពីនេះ ដោយសារគ្រោះរញ្ជួយដី៕
Account
Security
Favourite Content