បរទេស ៖ គិតត្រឹមថ្ងៃពុធសប្តាហ៍នេះ ទំហំនៃការលក់បន្ទះឈីបរបស់ក្រុមហ៊ុនយក្ស Nvidia សម្រាប់ត្រីមាសទី២ ទទួលបានប្រាក់ចំណូលដល់ទៅទ្វេដង ប៉ុន្តែបើទោះជាបែបនេះក្តីដំណឹងនេះហាក់ដូចជានៅមិនទាន់ធ្វើឲ្យក្រុមអ្នកវិនិយោគលើទីផ្សារហ៊ុនរបស់ក្រុមហ៊ុនពេញចិត្តខ្លាំងនៅឡើយទេ។

ប្រតិបត្តិការលក់គិតចាប់ពីខែឧសភា ដល់ខែកក្កដា បានកើនឡើងដល់ទៅ ២០០ភាគរយ ធ្វើឲ្យអ្នកវិនិយោគភាគហ៊ុនទទួលបានប្រាក់ចំណេញជាច្រើន ប៉ុន្តែមូលហេតុដែលនាំឲ្យពួកគេមិនសូវសប្បាយចិត្ត ដោយសារតែក្រុមអ្នកវិនិយោគទាំងនោះមានការរំពឹងទុកខ្លាំងថា នឹងមានសកម្មភាពកើនឡើងខ្លាំងជាងនេះចំពោះក្រុមហ៊ុន Nvidia។

គួរឲ្យដឹងដែរថា ទីផ្សារភាគហ៊ុនរបស់ក្រុមហ៊ុនក្នុងឆ្នាំនេះបានកើនឡើងប្រមាណជា១៥០ភាគរយ ហើយបានធ្វើឲ្យតម្លៃក្រុមហ៊ុនសរុបទទួលបានកំណើនបន្ថែម ១,៨២ទ្រីលានដុល្លាររួចទៅហើយ។ តម្លៃហ៊ុនបានបន្តកើនឡើងដល់ទៅ ៣៧ដង ខ្ពស់ជាងពេលដែលវាត្រូវបានដាក់លក់ដំបូង ខណៈដែលក្រុមហ៊ុនបច្ចេកវិទ្យាធំៗទាំង៦របស់ពិភពលោកធ្វើបានត្រឹមតែ ២៩ដងប៉ុណ្ណោះ។

ក្រុមហ៊ុនបច្ចេកវិទ្យាលំដាប់កំពូលៗដែលរួមានទាំង Microsoft ជាដើម នៅរយៈពេលប៉ុន្មានឆ្នាំចុងក្រោយនេះ បានធ្វើការវិនិយោគយ៉ាងខ្លាំងទៅលើហេដ្ឋារចនាសម្ព័ន្ធបច្ចេកវិទ្យាឆ្លាតវ៉ៃ ឬ AI Infrastructure ប៉ុន្តែទោះជាយ៉ាងណាក្តី ពួកគេនៅតែបន្តទិញផលិតផលសម្រាប់ដំណើរការក្រាហ្វិករបស់ខ្លួនមួយចំនួនធំពីក្រុមហ៊ុន Nvidia នៅឡើយដើម្បីអាចឲ្យកំព្យូទ័រធ្វើការងារបានកាន់តែលឿន និងមានប្រសិទ្ធភាពខ្ពស់ ពីព្រោះថាបន្ទះឈីបរបស់ Nvidia គឺជាផលិតផលដែលពិបាកនឹងជំនួសបំផុតក្នុងស្ថានភាពទីផ្សារបច្ចុប្បន្នដែលវាជាកត្តាសំខាន់នាំឲ្យប្រាក់ចំណូល និងតម្លៃរបស់ក្រុមហ៊ុនមានការកើនឡើងឥតឈប់ឈរ។

យោងតាមតួលេខដែលបង្ហាញដោយ LSEG គិតត្រឹមថ្ងៃទី២៣ ខែសីហា ក្រុមហ៊ុន Nvidia អាចទទួលបានប្រាក់ចំណូលប្រមាណជា ២៨,៦៨ពាន់លានដុល្លារនៅក្នុងត្រីមាសទី២ ឬស្ថិតនៅក្នុងអត្រាកើនឡើងប្រមាណជា១១២ភាគរយធៀបទៅនឹងពេលវេលាដូចគ្នាកាលពីឆ្នាំទៅ។

ទោះបីជាយ៉ាងណាក្តី បណ្តាក្រុមអ្នកវិនិយោគិនមួយចំនួនបានបង្ហាញនូវការព្រួយបារម្ភអំពីសមត្ថភាពរបស់ក្រុមហ៊ុនក្នុងការបំពេញតាមការរំពឹងទុកដ៏ខ្ពស់ ហើយបានចោទសួរអំពីល្បឿននៃការចំណាយលើបច្ចេកវិទ្យា AI ដោយអតិថិជនធំៗរបស់ក្រុមហ៊ុន Nvidia ។

ជាលទ្ធផលនៃការព្រួយបារម្ភទាំងនេះវាបានធ្វើឱ្យមានការធ្លាក់ចុះប្រមាណជា២០ភាគរយនៃភាគហ៊ុនរបស់ Nvidia ចន្លោះពីខែកក្កដា ដល់ដើមខែសីហា ប៉ុន្តែវាបានងើបឡើងវិញបន្តិចក្នុងរយៈពេលប៉ុន្មានថ្ងៃចុងក្រោយនេះ និងធ្វើឲ្យតម្លៃភាគហ៊ុនកើនឡើងវិញដែរ ពោលគឺប្រមាណជា៥ភាគរយប៉ុណ្ណោះក្រោមតម្លៃកំណត់ត្រាខ្ពស់កាលពីក្នុងខែមិថុនាកន្លងទៅនេះ៕