ភ្នំពេញ ៖ ក្នុងគោលបំណងជំរុញ ​និងអភិវឌ្ឍន៍​តំបន់​ទីក្រុងរណបមេគង្គឃី ក្រុ​ងអរិយក្សត្រ ខេត្ត​កណ្ដាល ក៏ដូចជាក្រុងរណបកោះនរា រាជធានីភ្នំពេញ កាន់តែមានសក្ដានុពល និ​ងមានភាពទាក់ទាញ បង្កើនសន្ទុះនៃការ​វិនិយោគបន្ថែម​​ ក្រុមហ៊ុន​ OCIC គ្រោងនឹង​សាងសង់​ស្ពាន​ឆ្លងកាត់ទន្លេ​មេគង្គ​តភ្ជាប់ពីកោះនរា រាជធានីភ្នំពេញ ទៅក្រុងរណប​មេគង្គឃី ក្រុងអរិយក្សត្រ ខេត្តកណ្តាល ។

ជាក់ស្ដែង នៅថ្ងៃទី ២៨ ខែមករា ឆ្នាំ២០២៦ រដ្ឋមន្ត្រីក្រសួង​សាធារណការ​ និងដឹកជញ្ជូន ឯកឧត្តម ​ប៉េង ពោធិ៍នា បាន​ដឹក​នាំ​​កិច្ច​ប្រជុំ​ ពិនិត្យ​ និងពិភាក្សា​លើ​គម្រោងសិក្សា និង​សាងសង់​ស្ពាន​ឆ្លងកាត់​ទន្លេ​មេគង្គ តភ្ជាប់ពីកោះនរា​ រាជធានីភ្នំពេញ ទៅក្រុង​រណប​មេគង្គ​ឃី នៃក្រុង​អរិយក្សត្រ​ខេត្តកណ្ដាល​ ដោយមានមន្ត្រីជំនាញពាក់ព័ន្ធចូលរួមជាច្រើននាក់។

ឯកឧត្តម​ ផន រឹម អ្នកនាំពាក្យ​ក្រសួង​សាធារណការ​ និងដឹកជញ្ជូន​ បានមានប្រសាសន៍ឱ្យដឹងថា គម្រោង​ស្ពា​ន​​ឆ្លងទន្លេ​មេគង្គ​កោះនរាទៅក្រុងរណប​មេគង្គ​ឃី ក្រុងអរិយក្សត្រ​ ជាគម្រោងរបស់​វិស័យឯកជន ពោល គឺជាគម្រោងរបស់​ក្រុមហ៊ុន​ OCIC ដូចគ្នាទៅ​នឹង​គម្រោងស្ពាន​ឆ្លងទន្លេកោះពេជ្រ កោះនរា និងស្ពាន​ឬស្សីកែវ ភ្ជាប់ក្រុងរណបជ្រោយចង្វារជាដើម ។​

ឯកឧត្តម​បន្តថា​ បើទោះបីជា​គម្រោង​នេះជា​គម្រោ​ង​របស់វិស័យឯកជន តែរាល់ការអភិវឌ្ឍ​ហេដ្ឋារចនាសម្ព័ន្ធអ្វីមួយ គឺត្រូវមកសិក្សា​បច្ចេកទេស​ជាមួយ​ក្រសួង​ ដើម្បីទទួលបានធាតុ​ចូល និងក្រឹតក្រម​នៃការអនុវត្ត​ការដ្ឋាន ឬការងារ​ផ្សេងៗទៀត ។

ឯកឧត្តមបញ្ជាក់ថា នៅពេល​ស្ពាននេះ​លេច​ជារូបរាង និង​ស្ថាបនា​រួច នឹងធ្វើឱ្យ​ក្រុង​អរិយក្សត្រ​កាន់តែខិតជិត​រាជធានីភ្នំពេញ ការ​ធ្វើដំណើរកាន់តែងាយស្រួល ប្រជាជន​កាន់តែច្រើន​នឹង​ផ្លាស់​ប្តូរទៅរស់នៅ​ទីនោះ​ ហើយអាច​ធ្វើឱ្យតម្រូវការ​លំនៅឋាន​នៅតំបន់ក្រុង​អរិយក្សត្រ​មានកំណើន​ខ្ពស់ ។​

អ្នកឧកញ៉ាបណ្ឌិត ​សំ សុខ​នឿន ប្រធានក្រុមប្រឹក្សាភិបាលសម្ព័ន្ធក្រុមហ៊ុន SAM SN GROUP បានលើកឡើង​ថា នៅពេលដែលមាន​ស្ពាន​តភ្ជាប់ទីភ្នំពេញ ទៅកាន់​ក្រុង​អរិយក្សត្រ​ អ្វីដែលរដ្ឋាភិបាល​គួរអភិវឌ្ឍន៍​នៅតំបន់​អរិយក្សត្រ​មុនគេ​នោះគឺ​ហេដ្ឋារចនាសម្ព័ន្ធ ព្រោះនៅពេលមានស្ពាន​ឆ្លងកាត់​ ងាយស្រួលធ្វើដំណើរ ពលរដ្ឋ​នឹងទៅរស់នៅទីនោះច្រើន ដែលធ្វើឱ្យការធ្វើដំណើរមានភាពមមាញឹកជាង​មុន ​ទាមទារ​ឱ្យមានការអភិវឌ្ឍ​លើ​ហេដ្ឋារចនាសម្ព័ន្ធ​ ផ្លូវ បណ្តាញទឹកស្អាត និងបណ្តាញអគ្គិសនី​។

អ្នកឧកញ៉ាក៏បានលើកឡើងផងដែរថា​ សម្រាប់​សក្ដានុពល​នៃការវិនិយោគ​នៅតំបន់អរិយក្សត្រ​ គឺ​លំនៅឋាន ព្រោះថានៅពេលគម្រោងសាងសង់ និង​ស្ពានរួចរាល់ ពលរដ្ឋផ្លាស់ពីទីក្រុង​ទៅកាន់​អរិយក្សត្រ​កាន់តែច្រើន ​ធ្វើឱ្យតម្រូវការ​លំនៅឋាន​នៅទីនោះកើនឡើង​ ដូច្នេះ​ហើយ​ការ​វិនិយោគលើ​លំនៅឋាន​គឺជា​អ្វីដែល​វិនិយោគិនគួរ​ពិចារណា​គិតគូរមុន​គេ ។​

គួររម្លឹកថា បច្ចុប្បន្ន​នេះ នៅជាយរាជធានីភ្នំពេញ មានគម្រោ​ងស្ពានចំនួន​២​កំពុងមមាញឹក​សាងសង់ ក្នុងនោះមានស្ពាន​ឆ្លងទន្លេបាសាក់​ចាក់​អង្រែ​- ព្រែក​ប្រា ដែល​គ្រោងនឹង​ចំណាយថវិកា​ប្រមាណ ៦០លានដុល្លារអាម៉េរិក និង​ស្ពានឆ្លង​តភ្ជាប់ពីផ្លូវជាតិលេខ​១ ទៅ​ល្វាឯម លើ​គម្រោងផ្លូវល្បឿនលឿន​ភ្នំពេញ-បាវិត ដែល​គ្រោងនឹង​ចំណាយថវិកា​ប្រមាណជាង​២០០លានដុល្លារអាម៉េរិក ។​ ដោយឡែក​ គិតត្រឹម​បច្ចុប្បន្ន​នេះ មានស្ពាន​ឆ្លងទន្លេ​ និងតភ្ជាប់​តំបន់​សំខាន់ៗចំនួន ២ហើយ ត្រូវបាន​សាងសង់​ដោយក្រុមហ៊ុន ​OCIC រួមមានស្ពាន​កោះពេជ្រ​-កោះនរា និង​ស្ពាន​ឆ្លងទន្លេសាប ឬស្សីកែវ ទៅកាន់ក្រុងរណបជ្រោយចង្វារ​ និង​បន្តទៅ​ផ្លូវជាតិលេខ​៦ ។ បើសរុប​ស្ពាន​ឆ្លងទន្លេមេគង្គពី​កោះនរា ទៅ​ក្រុងអរិយក្សត្រ​មួយទៀត​ នោះក្រុមហ៊ុន OCIC បានសាងសង់ស្ពាន​ឆ្លងទន្លេសរុប​ចំនួន ​៣ នៅក្នងរាជធានីភ្នំពេញ ៕​