បរទេស ៖ យោងតាមប្រភពព័ត៌មានពីរ៉យទ័រ បានរាយការណ៍ថា តម្លៃប្រេងបានកើនឡើងប្រហែល ៣ ភាគរយ ដែលជាកម្រិតខ្ពស់បំផុតចាប់តាំងពីខែធ្នូ បន្ទាប់ពីទិន្នន័យសេដ្ឋកិច្ចរបស់សហរដ្ឋអាមេរិកបានបង្ហាញពីកំណើនលឿនជាងការរំពឹងទុកនៅក្នុងត្រីមាសចុងក្រោយ និងដោយសារភាពតានតឹងនៅសមុទ្រក្រហមបានបន្តរំខានដល់ពាណិជ្ជកម្មពិភពលោក។

តម្លៃប្រេងឆៅម៉ាក Brent បានកើនឡើង ២,៩៩ ភាគរយ ឬ ៨២,៤៣ ដុល្លារក្នុងមួយបារ៉ែល ខណៈដែលប្រេងឆៅម៉ាក West Texas Intermediate បានកើនឡើង ៣,០២ ភាគរយ ឬ ៧៧,៣៦ ដុល្លារក្នុងមួយបារ៉ែល។

ទន្ទឹមនឹងនេះ ភាពតានតឹងភូមិសាស្ត្រនយោបាយនៅមជ្ឈិមបូព៌ា និងការរំខាននៃការដឹកជញ្ជូននៅសមុទ្រក្រហមកំពុងស្ថិតនៅក្នុងការយកចិត្តទុកដាក់។ ក្រុមហ៊ុនដឹកជញ្ជូន Maersk (MAERSKb.CO) បានលើកឡើងថា នាវា ២គ្រឿង ដែលដំណើរការដោយក្រុមហ៊ុនបុត្រសម្ព័ន្ធរបស់ខ្លូននៅសហរដ្ឋអាមេរិក និងផ្ទុកការផ្គត់ផ្គង់គ្រឿងសម្ភារៈយោធារបស់សហរដ្ឋអាមេរិកបានដកថយនៅពេលពួកគេកំពុងឆ្លងកាត់ច្រកសមុទ្រ Bab al-Mandab ចេញពីប្រទេសយេម៉ែន។

លោក Joshua Mahony ប្រធានអ្នកវិភាគទីផ្សារនៅ Scope Markets បាននិយាយថា ទីផ្សារថាមពលដែលកំពុងរំខានដល់ខ្សែសង្វាក់ផ្គត់ផ្គង់ទាំងនេះនឹងបន្តកើតមានជាច្រើនខែទៀត ខណៈដែលកាលពីថ្ងៃព្រហស្បតិ៍កន្លងទៅនេះ មេដឹកនាំ Houthi របស់យេម៉ែនបាននិយាយថា ក្រុមរបស់ខ្លួននឹងបន្តកំណត់គោលដៅលើនាវាដែលពាក់ព័ន្ធជាមួយនឹងអ៊ីស្រាអែលរហូតដល់មានជំនួយទៅដល់ប្រជាជនប៉ាឡេស្ទីននៅតំបន់ហ្គាហ្សា។

លោក Bob Yawger នាយកផ្នែកទីផ្សារថាមពលនៅ Mizuho បាននិយាយថា ការវាយប្រហារដោយយន្តហោះគ្មានមនុស្សបើករបស់អ៊ុយក្រែនទៅលើរោងចក្រចម្រាញ់ប្រេងនៅភាគខាងត្បូងនៃប្រទេសរុស្ស៊ីពេញមួយយប់ក៏បានបង្កឱ្យមានការព្រួយបារម្ភអំពីការផ្គត់ផ្គង់ផងដែរ។ កាលពីសប្តាហ៍មុន ភាពត្រជាក់ខ្លាំងបានរួមចំណែកដល់ការថយចុះខ្លាំងនៅក្នុងស្តុកប្រេងឆៅរបស់សហរដ្ឋអាម៉េរិក ដោយស្តុក​ប្រេង​របស់​អាម៉េរិក​បាន​ធ្លាក់​ចុះ ៩,២ លាន​បារ៉ែល។ លើសពីនេះ ទិន្នន័យកាលពីថ្ងៃព្រហស្បតិ៍បានបង្ហាញថា សេដ្ឋកិច្ចអាមេរិកបានកើនឡើងក្នុងល្បឿនលឿនជាងការរំពឹងទុកនៅក្នុងត្រីមាសទី ៤។

ស្របពេលនេះដែរ ការរំពឹងទុកបានជួយជំរុញតម្លៃប្រេងផងដែរ ដោយគេរំពឹងថាសេដ្ឋកិច្ចរបស់ចិនកំពុងស្ទុះងើបឡើងវិញបន្ទាប់ពីការប្រកាសរបស់ធនាគារកណ្តាលអំពីការថយចុះគួរឱ្យកត់សម្គាល់នៃទុនបម្រុងធនាគារ។

លោក John Kilduff ដៃគូស្ថាបនិកមកពី Again Capital LLC បាននិយាយថា ទីផ្សារបានរង់ចាំការជំរុញសេដ្ឋកិច្ចពីប្រទេសចិនអស់រយៈពេលជាច្រើនខែកន្លងមកនេះ ហើយការធ្លាក់ចុះនៃ​​ប្រាក់​បម្រុង​របស់​ធនាគារ​អាច​ជំរុញ​តម្រូវ​ការ​ប្រេង៕