ភ្នំពេញ ៖ ក្នុង​រយៈពេល​ ៩ខែ​កន្លងទៅនេះ គម្រោ​ងវិនិយោគចំនួន​១៣ ជាមួយដើមទុនសរុប​ប្រមាណ ៦៦០លានដុល្លារ​ ត្រូវ​បានរាជរដ្ឋាភិបាលអនុម័ត​ឱ្យ​ដំណើរការវិនិយោគនៅភូមិភាគ​ឦសាន​នៃប្រទេស​កម្ពុជា ដោយ​អាច​បង្កើតការងារ​បានជាង ១ម៉ឺន ២ពាន់​នាក់ ។ នេះ​បើតាមរបាយការណ៍របស់ក្រុមការងារជំរុញការ​វិនិយោគ​ខេត្ត​ភូមិភាគឦសាន កាលពីពេលថ្មីនេះ ។

នៅក្នុង​របាយការណ៍បាន​ឱ្យដឹងថា គិតចាប់ពី​កម្មវិធីពិសេស​ជំរុញការ​វិនិយោគ​ខេត្តទាំង៤ នៅភូមិភាគ​​ឦសាន ត្រូវបានដាក់​ឱ្យ​អនុវត្ត​ជាផ្លូវការ​ កាលពីថ្ងៃទី០៩ ខែមេសា ឆ្នាំ២០២៥ រហូតមកដល់ពេលនេះ ក្រុមការងារជំរុញការ​វិនិយោគ​ខេត្តភូមិភាគឦសានបាន​អនុម័ត​គម្រោង​វិនិយោគ​ចំនួន ១៣ ​ដែលមាន​ ៦គម្រោង​នៅខេត្ត​ក្រចេះ ៤គម្រោង​នៅខេត្ត​មណ្ឌលគិរី និង​ ៣គម្រោង​នៅខេត្ត​រតនគិរី ជាមួយ​នឹង​ទុនវិនិយោគ​ប្រមាណ ​៦៦៨,៧​លានដុល្លារអាម៉េរិក បង្កើតការងារ​បានចំនួន ១២ ៧៧៧កន្លែង ។ គម្រោង​ទាំង​១៣​នេះ នឹង​ចាប់ផ្ដើម​អនុវត្ត​នៅឆ្នាំ​២០២៦នេះ គ្របដណ្ដប់​លើ​វិស័យ​មួយចំនួន ដូចជា ​ការ​ដាំដុះ និងកែច្នៃដាំណាំកសិ-ឧស្សាហកម្ម ការសាងសង់​សណ្ឋាគារ រីសត ការ​បង្កើត​គ្រឹះស្ថានអប់រំ គ្រឹះស្ថាន​ថែទាំសុខភាព​ឯកជន និង​ការសាងសង់​ហេដ្ឋា​រច​នាស​ម្ព័ន្ធ ដូចជា​កំពង់ផែពហុបំណង និង​ ការកសាងហេដ្ឋារចនាសម្ព័ន្ធ​តភ្ជាប់ជាដើម​។

សូមបញ្ជាក់ដែរថា ៖ បើ​គិតចាប់តាំងពីពេលចាប់ផ្ដើម​រហូតដល់​ខែមករា ឆ្នាំ២០២៦នេះ ក្រុមការងារ​ជំរុញការ​វិនិយោគក្នុងភូមិ​ភាគ​ឦសាន បានពិនិត្យ ​វាយតម្លៃ​ និង​សម្របស​ម្រួល​នីតិវិធី​ជូន​គម្រោង​វិនិយោគចំនួន ៣៥ ក្រោម​ទុន​វិនិយោគ​ប្រមាណ ១,០៦ពាន់លានដុល្លារអាម៉េរិក ដែលរំពឹងថា នឹង​បង្កើតការងារ​រហូតចំនួន ១៧ពាន់​កន្លែង ។

​ឯកឧត្តម ហ៊ាន សាហ៊ីប រដ្ឋលេខាធិការ​ក្រសួងសេដ្ឋកិច្ច​ និងហិរញ្ញវត្ថុ និងជា​ប្រធានក្រុមការងារ​ជំរុ​ញ​ការ​វិនិយោគ​ ក្នុងភូមិភាគឦសាន បានណែនាំឱ្យក្រុមការងារ​ខិតខំបំពេញភារកិច្ច​របស់ខ្លួន​ប្រកបដោយ​ស្មារ​តីទទួល​ខុស​ត្រូវ​ខ្ពស់ តាមរយៈយន្តការ​ច្រក​ចេញចូល​តែមួយ​ និង​អភិក្រម ជវភាពនៃប្រព័ន្ធតួអង្គ​តែមួយ ព្រម​ទាំង​គោរព​គោលការណ៍ចូលរួម​សម្រេច​ចិត្ត​រួម​គ្នា ប្រកបដោយប្រសិទ្ធភាព និងតម្លាភាព​ និង​ត្រូវ​ខិតខំធ្វើយ៉ាងណា​ជួយ​សម្របសម្រួល​ដល់​វិនិយោគិន​ នៅពេលដែល​វិនិយោគិន​ជួបបញ្ហា​ និងផ្ដល់​ការគាំទ្រ​ចាំ​បាច់​នានា តាមដែនសមត្ថកិច្ច​រៀងៗខ្លួន​ដើម្បីឱ្យវិនិយោគិន​អាច​ដំណើរការ​អាជីវកម្ម តាមផែនការ​វិនិយោគរបស់ខ្លួន ក្នុងគោលដៅរួមចំណែក​ដល់ការជំរុញ​កំណើនសេដ្ឋកិច្ច បង្កើន​ការងារ​ និង​បង្កើន​ជំនាញ​សម្រាប់​តំបន់​ភូមិភាគឦសានទាំង​មូល សម​ស្រប​តាមគោល​បំណង​ និង​បេសកកម្ម​របស់​ កម្មវិធីពិសេស​ជំរុញការ​វិនិយោគក្នុងខេត្ត​ទាំង​៤ នៅភូមិភាគឦសាននៃ​ព្រះរាជាណាចក្រកម្ពុជា​ឆ្នាំ ២០២៥-២០២៨​។​

ឯកឧត្តម​ សាយ សំអាល់ ឧបនាយករដ្ឋមន្ត្រី​ និងជារដ្ឋមន្ត្រី ​ក្រសួងរៀបចំដែនដី នគរូបនីយកម្ម​ និងសំណង់ បានថ្លែងថា រាជរដ្ឋាភិបាលកម្ពុជា​អាណត្តិទី​៧នេះ បាន​បន្ត​យកចិត្តទុកដាក់​អភិវឌ្ឍន៍តំបន់​ភូមិ​ភាគ​​ឦ​សាន​ឱ្យ​​កាន់តែរីកចម្រើន​ និងទាក់ទាញ ដោយ​ជំហាន​ដំបូង ក្រសួង​រៀបចំដែនដី​ នគរូបនីយកម្ម​ និង​សំណង់ ត្រូវ​វាស់វែង ចុះបញ្ជីចេញ​បណ្ណ​ជូនពលរដ្ឋ​ឱ្យបានគ្រប់ៗគ្នា ដើម្បីបញ្ចប់ភាពចម្រូង​ចម្រាស់ និងទំនាស់ដីធ្លី​​ និងជាការជួយស​ម្រួល​ដល់ការ​វិនិយោគ​នានាដែលមានប្រភពទុនទាំងក្នុង និងក្រៅប្រទេស ។​

ឯកឧត្តម​បន្តថា នៅជំហាន​​បន្ទាប់​ ត្រូវ​សាងសង់​ហេដ្ឋារចនាសម្ព័ន្ធ​ភ្ជាប់ពីតំបន់មួយទៅតំបន់មួយ ពី​ស្រុក​មួយទៅស្រុកមួយ និង​ត្រូវ​សាងសង់​តភ្ជាប់ទៅកាន់​បណ្ដា​ខេត្តទូទាំង​ប្រទេស ដើម្បីសម្រួល​ដល់​ការ​ធ្វើដំណើរ ជាពិសេសការដឹកជញ្ជូន​កសិករ ក៏ដូចជាផលិតផលដែលផលិតបានឆ្ពោះទៅកាន់ទីផ្សារ៕