សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ យោងទៅតាមប្រភពព័ត៌មានពីរ៉យទ័រ បានរាយការណ៍ថា ប៉ាគីស្ថានបាននាំចូលប្រេងឆៅរុស្ស៊ីដោយប្រើប្រាស់ប្រាក់យ័នចិនដើម្បីទទួលបានការបញ្ចុះតម្លៃ ដែលវាជាការផ្លាស់ប្តូរមួយនៅក្នុងគោលនយោបាយទូទាត់ប្រាក់ដែលគ្រប់គ្រងដោយប្រាក់ដុល្លារអាមេរិក។
ស្របពេលដែលប៉ាគីស្ថានទទួលបានបញ្ចុះតម្លៃពីការទិញប្រេងឆៅពីរុស្ស៊ី វាបានជួយសម្រួលដល់ប្រទេសដែលកំពុងប្រឈមមុខនឹងវិបត្តិសេដ្ឋកិច្ច និងបញ្ហាទូទាត់សងបំណុលខាងក្រៅរបស់ខ្លួន។ មិនត្រឹមតែប៉ុណ្ណោះ ការនាំចូលប្រេងឆៅបញ្ចុះតម្លៃរបស់រុស្ស៊ីបានមកដល់ទីក្រុង Karachi កាលពីថ្ងៃអាទិត្យកន្លងទៅនេះ អនុវត្តទៅតាមកិច្ចព្រមព្រៀងដែលបានធ្វើឡើងរវាងទីក្រុង Islamabad និងទីក្រុងម៉ូស្គូកាលពីដើមឆ្នាំនេះ ។ បច្ចុប្បន្ននេះ ប្រេងឆៅរបស់រុស្ស៊ីត្រូវបាននាំចូលមកកាន់កំពង់ផែក្នុងទីក្រុង Karachi ភាគខាងត្បូង។
រដ្ឋមន្ត្រីប្រេងរបស់ប៉ាគីស្ថាន លោក Musadik Malik បាននិយាយថា ការទូទាត់ប្រាក់ត្រូវបានប្រើប្រាស់ជាប្រាក់យ័ន ឬ RMB។ ការទិញនេះជាកិច្ចព្រមព្រៀងរវាងរដ្ឋាភិបាលរវាងប៉ាគីស្ថានជាមួយនឹងរុស្ស៊ីជាលើកដំបូងជាមួយនឹងចំនួននាំចូល ១០០ ០០០ តោន ដែលក្នុងនោះ ៤៥ ០០០ តោនបានចូលចតនៅកំពង់ផែ Karachi រួចហើយ។ ប៉ាគីស្ថានបានធ្វើការទិញប្រេងឆៅប្រភេទ Urals ពីរុស្ស៊ីតាំងពីខែមេសាមកម្ល៉េះ។ ទោះជាយ៉ាងណាក្តី រដ្ឋមន្ត្រីរូបនេះមិនបានបង្ហាញពីព័ត៌មានលម្អិតពាណិជ្ជកម្មនៃកិច្ចព្រមព្រៀងនេះ រួមទាំងតម្លៃ ឬការបញ្ចុះតម្លៃដែលប៉ាគីស្ថានទទួលបាននោះទេ។
លើសពីនេះ ការទិញរបស់ប៉ាគីស្ថានផ្តល់ឱ្យទីក្រុងមូស្គូនូវកន្លែងលក់ ឬ អតិថិជនថ្មីមួយដើម្បីបន្ថែមការកើនឡើងនៃការលក់ទៅកាន់ប្រទេសឥណ្ឌា និងចិន ព្រោះរុស្ស៊ីបានប្តូរទិសដៅទីផ្សារប្រេងពីលោកខាងលិចដោយសារតែជម្លោះអ៊ុយក្រែន។ យ៉ាងណាក៏ដោយ ទោះបីរុស្ស៊ីជាសម្ព័ន្ធមិត្តលោកខាងលិចដ៏យូរ និងជាគូប្រជែងនៃប្រទេសជិតខាងឥណ្ឌាក៏ដោយ ប៉ុន្តែអ្នកវិភាគនិយាយថា កិច្ចព្រមព្រៀងប្រេងឆៅនេះនឹងបង្ហាញពីផ្លូវថ្មីមួយសម្រាប់ប៉ាគីស្ថាននៅពេលដែលខ្លួនត្រូវការហិរញ្ញប្បទាន។ នៅដើមខែមិថុនានេះ ទីក្រុង Islamabad បានគូសបញ្ជាក់អំពីដំណើរនៃការធ្វើពាណិជ្ជកម្មជាមួយរុស្ស៊ី អាហ្វហ្គានីស្ថាន និងអ៊ីរ៉ង់ ដែលជាសញ្ញាមួយផ្សេងទៀតបង្ហាញថា សេដ្ឋកិច្ចអាស៊ីខាងត្បូងកំពុងស្វែងរកមធ្យោបាយទិញ និងលក់ទំនិញដោយមិនមានការជួញដូរជាប្រាក់ដុល្លារ។ កាលពីឆ្នាំមុនកន្លងទៅនេះ ប៉ាគីស្ថានបាននាំចូលប្រេងចំនួន ១៥៤ ០០០ បារ៉ែលក្នុងមួយថ្ងៃ ដោយប្រហែល ៨០ ភាគរយនៃការផ្គត់ផ្គង់របស់ខ្លួនបានមកពីប្រទេសអារ៉ាប៊ីសាអូឌីត អារ៉ាប់រួម និងប្រទេសឈូងសមុទ្រដទៃទៀត។ ឥឡូវនេះ ប៉ាគីស្ថានកំពុងដាក់គោលដៅនាំចូលប្រេងឆៅរុស្ស៊ីចំនួនមួយភាគបីនៃប្រេងសរុបរបស់ខ្លួន។ ស្របពេលនេះដែរ គេសង្ឃឹមថាការបញ្ចុះតម្លៃប្រេងឆៅរបស់រុស្ស៊ីនឹងជួយរក្សាស្ថិរភាពតម្លៃប្រេងនៅក្នុងប្រទេសមួយចំនួនដែលកំពុងប្រឈមនឹងបំណុលខាងក្រៅខ្ពស់ រូបិយប័ណ្ណក្នុងស្រុកចុះខ្សោយ និងទុនបម្រុងរូបិយប័ណ្ណបរទេសទាប៕
Account
Security
Favourite Content