សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ មន្រ្តីជាន់ខ្ពស់ក្រសួងកសិកម្ម រុក្ខាប្រមាញ់ និងនេសាទ បានអះអាងថា ផលិតផលជលផលនាពេលបច្ចុប្បន្ននេះ កំពុងត្រូវបានយកចិត្តទុកដាក់លើខ្សែច្រវាក់ផលិតកម្មនៃការផលិត ក៏ដូចជាតម្លៃឱ្យកាន់តែទូលំទូលាយ ដើម្បីនាំទៅកាន់ផ្សារក្នុងស្រុក ជាពិសេស ការនាំចេញទៅកាន់ប្រទេសជិតខាងកម្ពុជា រួមទាំងទីផ្សារអន្តរជាតិ ដូចជា ប្រទេសចិន សហរដ្ឋអាមេរិក ហើយគោលដៅបន្ទាប់គឺបណ្តាប្រទេសសហគមន៍អឺរ៉ុប។
លោកជំទាវ អ៊ឹម រចនា អ្នកនាំពាក្យ និងជាអនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានបានគូសបញ្ជាក់ថា វិស័យជលផលក្រោយប្រមូលផល (CAPFISH-Capture) បាន និងកំពុងធ្វើការអភិវឌ្ឍខ្សែច្រវាក់តម្លៃលើផលិតផលជលផល ដោយផ្តោតលើការពង្រឹងសមត្ថភាពស្ថាប័ននៃអាជ្ញាធរមានសមត្ថកិច្ចក្នុងការបង្កើតប្រព័ន្ធត្រួតពិនិត្យគុណភាព សុវត្ថិភាព ផលិតផលជលផល ជួយគាំទ្រដល់វិស័យឯកជន។
លោកជំទាវ អ៊ឹម រចនា បានបញ្ជាក់ថា ក្នុងកិច្ចអភិវឌ្ឍការកែច្នៃផលជលផលតាមរយៈការកសាងសមត្ថភាពជំនាញ ដោយរួមទាំងការអនុវត្តប្រព័ន្ធសុវត្ថិភាពចំណីអាហារ ការគាំទ្រថវិកា វិនិយោគ និងការបង្កើតយន្តការគាំទ្រ ដល់ធុរកិច្ចធានាបាននូវនិរន្តរភាពសម្រាប់វិស័យនេះ។
អ្នកនាំពាក្យរូបនេះបានថ្លែងដែរថា ក្នុងចំណោមសហគ្រាសដែលទទួលបានវិញ្ញាបនបត្រនិមិត្តសញ្ញាគុណភាព ផលិតផល ជលផលកម្ពុជា ហៅកាត់ថា (CQS) ពួកគាត់តែងមានទីផ្សារល្អជាងមុន និងក្រៅពីនេះផលិតផលជលផលរបស់គាត់ក៏មានតម្លៃល្អប្រសើរដែរ។
ដោយឡែកលោក សេតធី ស៊ីថារ៉ាម៉ា ប្រធានទីប្រឹក្សាបច្ចេកទេសរបស់អង្គការសហប្រជាជាតិ ដើម្បីអភិវឌ្ឍន៍ឧស្សាហកម្ម(UNIDO)បានឱ្យដឹងថា អង្គការមួយនេះទទួលបានថវិកាបដិភាគពីសហគមន៍អឺរ៉ុប ដើម្បីអនុវត្តន៍គម្រោងការអភិវឌ្ឍជលផលក្រោយប្រមូលផល ដែលមានធាតុចេញសំខាន់ៗចំនួន ៤ រួមមាន៖
ធាតុចេញទី១- ពង្រឹងសមត្ថភាព បច្ចេកទេស និងនិរន្តរភាពនៃអាជ្ញាធរមានសមត្ថកិច្ច និងសេវាត្រួតពិនិត្យផ្លូវការ ដែលគាំទ្រដល់ជលផលក្រោយប្រមូលផល។
ធាតុចេញទី២- ពង្រឹងសមត្ថភាពវិស័យឯកជន ដើម្បីឱ្យមានលទ្ធភាពអនុវត្តន៍តាមស្តង់ដារ សុវត្ថិភាពអាហារ និងឆ្លើយតបតាមតម្រូវការទីផ្សារសមស្រប។
ធាតុចេញទី៣- ការលើកកម្ពស់ការប្រកួតប្រជែងអាជីវកម្មជលផលក្រោយប្រមូលផល តាមរយៈការសិក្សាស្រាវជ្រាវ និងអភិវឌ្ឍន៍។
ធាតុចេញទី៤- ការគ្រប់គ្រងគម្រោង ការត្រួតពិនិត្យ និងការវាយតម្លៃ។
លោក ប្រាយ អិន ហ្វរណាវី ប្រធានកិច្ចសហប្រតិបត្តិការនៃស្ថានប្រតិភូសហភាពអឺរ៉ុបប្រចាំនៅកម្ពុជាគូសបញ្ជាក់ថា៖ សម្រាប់កិច្ចការនេះ សហភាពអឺរ៉ុបគាំទ្រទាំងបច្ចេកទេស និងជំនាញឯកទេស ហើយការនាំចេញក៏ត្រូវការនីតិវិធី និងលក្ខខណ្ឌបច្ចេកទេសជាច្រើនផ្គួបផ្សំ និងត្រូវមានការទទួលស្គាល់ផងដែររវាងអាជ្ញាធរកម្ពុជា និងអាជ្ញាធរប្រទេសអឺរ៉ុប ទើបផលិតផលទាំងនេះអាចនាំចេញទៅកាន់ប្រទេសអឺរ៉ុបបាន។
គួររំលឹកថា សហគមន៍នេសាទនៅកម្ពុជាមានប្រជាជនប្រមាណ ១.៥លាននាក់ ដែលក្នុងចំណោមនេះដែរមានប្រហែល ១ ៣៩៥ ០០០នាក់ ប្រកបរបរពាក់ព័ន្ធទៅនឹងការនេសាទទឹកសាប ខណៈប្រមាណ ១០៥ ០០០នាក់ទៀត កំពុងប្រកបរបរនេសាទសមុទ្រ។ ប្រជានេសាទកម្ពុជា ក៏បានបង្កើតសហគមន៍នេសាទសរុបចំនួន៥១៦ ក្នុងនោះ ៤៧៥ ទីតាំងស្ថិតនៅលើគោក និង៤១ នៅតាមបណ្តោយឆ្នេរសមុទ្រ៕
Account
Security
Favourite Content