ពោធិ៍សាត់ ៖​​ សម្ដេចបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជណាចក្រកម្ពុជា បានថ្លែងថា រាជរដ្ឋាភិបាលសូមលើកទឹកចិត្តដល់បណ្តាក្រុមហ៊ុនទាំងឡាយណាដែលមានបំណងមកផលិតគ្រឿងបង្គុំរថយន្តនៅកម្ពុជា ដើម្បីជួយកាត់បន្ថយការនាំចូលគ្រឿងបង្គុំ និងបង្កើតការងារជូនប្រជាពលរដ្ឋឱ្យបានកាន់តែច្រើន។

ក្នុងឱកាសអញ្ជើញជាអធិបតីសម្ពោធដាក់ឱ្យដំណើរការខ្សែសង្វាក់ផលិតកម្មថ្មីរថយន្ត Ford របស់ក្រុមហ៊ុន RMA Cambodia ស្ថិតនៅ ភូមិសារវ័ន ឃុំស្នាអន្សា ស្រុកក្រគរ ខេត្តពោធិ៍សាត់ នាព្រឹកថ្ងៃអង្គារ ថ្ងៃទី២២ ខែមេសា ឆ្នាំ២០២៥ សម្ដេចធិបតី ហ៊ុន ម៉ាណែត បានកោតសរសើរដល់ដំណើរការនៃការផលិតរថយន្តនៅកម្ពុជាថា បានប្រើប្រាស់គ្រឿងបង្គុំមួយចំនួនដែលផលិតនៅក្នុងស្រុក ហើយទន្ទឹមនេះរាជរដ្ឋាភិបាលក៏សូមលើកទឹកចិត្ត និងជំរុញឱ្យមានការផលិតគ្រឿងបង្គុំក្នុងស្រុកឱ្យបានច្រើនមុខទៀត។

សម្តេចធិបតី ហ៊ុន ម៉ាណែត មានប្រសាសន៍ថា ៖

«ផលិតកម្មរបស់ក្រុមហ៊ុន Ford នៃសហរដ្ឋអាមេរិកនៅលើទឹកដីស្រុកក្រគរ ខេត្តពោធិ៍សាត់ គឺជាមោទនភាពរួមរបស់ប្រជាជនកម្ពុជានៅទូទាំងប្រទេស ក្នុងការទទួលបាននូវវត្តមានរបស់ឧស្សាហកម្មធុនធ្ងន់ទំនើប ដែលបាន និងកំពុងចូលរួមបង្កើនឱកាសកំណើនការងារ  ការអភិវឌ្ឍធនធានមនុស្ស ការផ្ទេរបច្ចេកវិទ្យា ព្រមទាំងការអនុវត្តផ្ទាល់ផងដែរ។ វាពិតជាមានមោទនភាព និងវាយតម្លៃខ្ពស់ចំពោះគ្រប់ភាគីពាក់ព័ន្ធនៅក្នុងការចូលរួមចំណែកដល់ការអភិវឌ្ឍវិស័យយានយន្តនៅកម្ពុជា ជាពិសេស ចំពោះក្រុមហ៊ុនអន្តរជាតិ RMA ដែលជាក្រុមហ៊ុនឈានមុខមួយក្នុងការផ្តល់សេវា និងផលិតជូនដល់ប្រជាពលរដ្ឋកម្ពុជា»។

គួរកត់សម្គាល់ថា ៖ បច្ចុប្បន្ននេះ រាជរដ្ឋាភិបាលកម្ពុជាកំពុងតែដាក់ចេញនូវទិសដៅរៀបចំគោលនយោ​បាយដើម្បីលើកទឹកចិត្តអ្នកដែលមកផលិតគ្រឿងបង្គំឱ្យបានច្រើននៅកម្ពុជា។ កម្ពុជាមិនមែនគ្រាន់តែជាប្រ​ទេសដែលប្រមូលទិញគ្រឿងបង្គុំមកពីក្រៅដើម្បីផលិតនាំចេញទេ ប៉ុន្តែផលិតឱ្យបានកាន់តែច្រើនអតិបរមានៅកម្ពុជា។

សម្ដេចធិបតី ហ៊ុន ម៉ាណែត បានមានប្រសាសន៍ថា ៖

«នេះជាគោលដៅដែលយើងដាក់ចេញ ហើយសង្ឃឹមថា យើងនឹងបន្តទៅទៀត។ បច្ចុប្បន្ននេះយើងឃើញមានហើយ ឧទាហរណ៍ជាក់ស្ដែងក្រុមហ៊ុន Ford នេះដែលដំបូងចាប់ផ្ដើមយក(គ្រឿងបង្គំ)ទាំងអស់ពីក្រៅ»។

សួមជម្រាបជូនថា ក្រុមហ៊ុន RMA CAMBODIA មានវត្តមាននៅក្នុងព្រះរាជាណាចក្រកម្ពុជាអស់រយៈពេល ៣៣ ឆ្នាំមកហើយ គិតចាប់ពីឆ្នាំ១៩៩២។ ក្រុមហ៊ុន RMA CAMBODIA ជាក្រុមហ៊ុនផ្គត់ផ្គង់ផលិតផល និងសេវាកម្មល្បីៗលើពិភពលោក ព្រមទាំងមានអាជីវកម្មស្ទើរគ្រប់វិស័យ រួមមាន៖ វិស័យយានយន្ត កសិកម្ម ហេដ្ឋារចនាសម្ព័ន្ធ ដំណោះស្រាយក្នុងឃ្លាំងសេវាកម្មភតិសន្យាហិរញ្ញវត្ថុ សេវាកម្មជួលរថយន្ត និងឧស្សាហកម្មចំណីអាហារ។ ក្រុមហ៊ុនមានបុគ្គលិកសរុបជាង៤,០០០ នាក់ ហើយបុគ្គលិកនារីមានចំនួន ១,១៧៨ នាក់ និងបុគ្គលិកជំនាញបច្ចេកទេសមានចំនួន ២,៣០៣ នាក់។

ចាប់ផ្តើមដំបូងរោងចក្ររបស់ក្រុមហ៊ុនមានបុគ្គលិកបម្រើការងារតែចំនួន ១៦០នាក់ប៉ុណ្ណោះ ដោយទទួលបានប្រាក់បៀវត្សចន្លោះពី ២៥០ ទៅ ៦០០ដុល្លារអាមេរិក តែមកដល់ឆ្នាំ២០២៥នេះបុគ្គលិកបម្រើការងារនៅក្នុងរោងចក្រមួយនេះបានកើនឡើងរហូតដល់ ៤០៤នាក់ ហើយចំពោះប្រាក់បៀវត្សបានកើនឡើងចន្លោះពី ៣២០ ទៅ ៨០០ ដុល្លារអាមេរិក។

សម្តេចបានហៅក្រុមហ៊ុន RMA ថាជាក្រុមហ៊ុនយក្សរបស់សហរដ្ឋអាមេរិក ហើយជាមោទនភាពខ្លាំងណាស់ដែលក្រុមហ៊ុនមួយនេះបានសម្រេចចិត្តមកបោះទុនវិនិយោគនៅកម្ពុជា។ សម្ដេចក៏បានអរគុណចំពោះស្ថាប័នពាក់ព័ន្ធ រួមមាន ក្រុមប្រឹក្សាអភិវឌ្ឍន៍កម្ពុជា (CDC) អាជ្ញាធរខេត្ត រួមនឹងផ្នែកពាក់ព័ន្ធដទៃ ទៀតក្នុងការជួយរៀបចំឱ្យក្រុមហ៊ុន RMA អាចដំណើរការបើករោងចក្របាននៅលើទឹកដីនៃស្រុកក្រគរ ខេត្តពោធិ៍សាត់នេះ។