សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ នៅដំណើរបេសកកម្មរបស់សម្ដេចធបិតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជានាទីក្រុងតូក្យូប្រទេសជប៉ុនរយៈពេលជិត ១សប្ដាហ៍ កម្ពុជារំពឹងទទួលបានវិនិយោគិន និងធុរជនជប៉ុនថ្មីៗបន្ថែមទៀត ខណៈសម្ដេចធិបតីបានជួបជាមួយវិនិយោគិន និងធុរជនជប៉ុនជាច្រើននៅទីនោះ ។
នៅក្នុងដំណើរបេសកកម្មចូលរួមប្រជុំអាស៊ាន-ជប៉ុន រយៈពេល៥ថ្ងៃ ចាប់ពីថ្ងៃទី១៥ ដល់ថ្ងៃទី១៩ នាទីក្រុងតូក្យូ ប្រទេសជប៉ុន សម្ដេចធិបតី ហ៊ុន ម៉ាណែត បានជួបជាមួយថ្នាក់ដឹកនាំក្រុមហ៊ុនជប៉ុនធំៗ ដែលកំពុងមានប្រតិបត្តិការនៅក្នុងប្រទេសកម្ពុជាស្រាប់ និងក្រុមហ៊ុនជប៉ុនដែលមិនទាន់មានប្រតិបត្តិការនៅក្នុងប្រទេសកម្ពុជា ។ ក្នុងនោះ ក្រុមហ៊ុនដែលកំពុងមានប្រតិបត្តិការក្នុងប្រទេសកម្ពុជាបានបង្ហាញពីគម្រោងពង្រីកការវិនិយោគនៅក្នុងប្រទេសកម្ពុជាបន្ថែម ។ ក្រៅពីនេះក៏មានក្រុមហ៊ុន និងសហគ្រាសជប៉ុនមួយចំនួនបានបង្ហាញពីការចង់បានពលករកម្ពុជាទៅធ្វើការនៅប្រទេសជប៉ុននាពេលខាងមុខ ស្របពេលដែលប្រទេសជប៉ុនក៏កំពុងត្រូវការកម្លាំងពលករបន្ថែមទៀតផងដែរ ។
នៅក្នុងជំនួបជាមួយវិនិយោគិន និងធុរជនជប៉ុន សម្ដេចធិបតី ហ៊ុន ម៉ាណែត បានសាទរចំពោះការបោះទុនវិនិយោគ និងគ្រោងវិនិយោគនៅក្នុងប្រទេសកម្ពុជា ដោយសម្ដេចបានគូសបញ្ជាក់ថា រាជរដ្ឋាភិបាលកម្ពុជាបាន និងកំពុងយកចិត្តទុកដាក់នៅក្នុងការធានានិរន្តរភាពនៃបរិយាកាសធុរកិច្ច និងវិនិយោគ តាមរយៈការដាក់ចេញនូវគោលនយោបាយ យន្តការអនុវត្ត និងក្របខ័ណ្ឌគតិយុត្តថ្មីៗ ព្រមទាំងហេដ្ឋារចនាសម្ព័ន្ធគាំទ្រចាំបាច់នានា ដើម្បីផ្តល់នូវការលើកទឹកចិត្ត ដែលមានលក្ខណៈអនុគ្រោះ តម្លាភាព និងទាក់ទាញចំពោះវិនិយោគិនទាំងក្នុង និងក្រៅស្រុក ។ មួយវិញទៀត សម្តេចធិបតី ក៏បានរំលេចបន្ថែមថា បច្ចុប្បន្ន កម្ពុជាកំពុងប្រើប្រាស់ថាមពលស្អាតរហូតដល់ ៦២% ដែលជាកម្រិតឈានមុខមួយនៅក្នុងតំបន់ ទន្ទឹមការសម្រេចបញ្ឈប់ទាំងស្រុងនូវការបង្កើតរោងចក្រដំណើរការដោយថាមពលធ្យូងថ្ម ក៏ដូចជាបានដាក់ចេញនូវទិសដៅជំរុញការប្រើប្រាស់ថាមពលស្អាតឱ្យបានដល់ ៧០% ត្រឹមឆ្នាំ២០៣០ ។
កាលពីចុងខែវិច្ឆិកា ឆ្នាំ២០២៣កន្លងទៅនេះ សមាគមពាណិជ្ជកម្មជប៉ុន កម្ពុជាក៏បានដឹកនាំ វិនិយោគិន និងធុរជនជប៉ុនមកស្វែងរកឱកាសវិនិយោគនៅកម្ពុជា ដោយបានជួបជាមួយមន្ត្រីជាន់ខ្ពស់ជាច្រើនរូបរបស់កម្ពុជា ក៏ដូចជាជួបជាមួយវិនិយោគិន និងធុរជនកម្ពុជាផងដែរ ។
លោកបណ្ឌិត អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា បានមានប្រសាសន៍ថា ជប៉ុនជាប្រទេសដែលមានសហគ្រាសខ្នាតតូច និងមធ្យម( SME ) រាប់សិបម៉ឺនសហគ្រាស ហើយបើសិនជាកម្ពុជាទទួលបានតែមួយចំណែកតូចក៏ឃើញថាមានចំនួនច្រើនដែរ។ ជប៉ុនក៏ជាវិនិយោគិនដែលមានគម្រោងច្បាស់លាស់ និងគិតគូរច្បាស់លាស់មុននឹងបណ្ដាក់ទុនវិនិយោគនៅប្រទេសណាមួយ ។
គួរបញ្ជាក់ថា បច្ចុប្បន្ននេះ គម្រោងវិនិយោគជប៉ុននៅកម្ពុជាបានផ្ដល់ឱកាសការងារដល់ប្រជាពលរដ្ឋកម្ពុជាជាច្រើន ដោយក្នុងនោះគ្រាន់តែផ្សារទំនើបរបស់ជប៉ុនអ៊ីម៉នម៉ល ទាំង៣ទីតាំង បានផ្ដល់ការងាររាប់ពាន់នាក់ដល់ប្រជាពលរដ្ឋកម្ពុជាទៅហើយ ហើយនៅមានគម្រោងវិនិយោគជាច្រើនទៀតដែលបានដំណើរការ ដូចជារោងចក្រផលិតគ្រឿងអេឡិចត្រូនិក សំណង់ អចលនទ្រព្យ ហិរញ្ញវត្ថុ ដែលសុទ្ធតែផ្ដល់ឱកាសការងារច្រើនដល់ប្រជាពលរដ្ឋកម្ពុជា ៕
Account
Security
Favourite Content