សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងឱកាសអញ្ជើញបិទសន្និបាតបូកសរុបការងាររបស់ក្រសួងអធិការកិច្ច នាថ្ងៃទី១៣ កុម្ភៈ ឆ្នាំ២០២៣ សម្ដេចធិបតីបានលើកឡើងពីសារៈសំខាន់នៃការងារអធិការកិច្ច ដែលប្រៀបបានទៅនឹងការរៀបចំផ្ទះឱ្យស្អាត និងមានរបៀបរៀបរយផងដែរ។
សម្ដេចនាយករដ្ឋមន្ត្រីបានថ្លែងដែរថា ជាមួយនឹងឆន្ទៈសម្រេចឱ្យបាននូវចក្ខុវិស័យនៅក្នុងការប្រែក្លាយកម្ពុជាទៅជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលកម្រិតខ្ពស់នៅឆ្នាំ២០៥០ រាជរដ្ឋាភិបាលនិតិកាលទី ៧ នៃរដ្ឋសភាបានដាក់ចេញនូវយុទ្ធសាស្ត្របញ្ចកោណដើម្បីកំណើនការងារសមធម៌ ប្រសិទ្ធភាព ចីរភាព និងបន្តផ្ដោតជាចម្បងលើរបៀបវារៈធានាប្រសិទ្ធភាពសមិទ្ធកម្ម។
គោលដៅដែលបានដាក់ចេញនេះនឹងសម្រេចបានតាមរយៈការអនុវត្តអភិក្រម ឆ្លុះកញ្ចក់ ងូតទឹក ដុះក្អែល ព្យាបាល និងវះកាត់ និងអភិក្រមប្រព័ន្ធតួអង្គតែមួយដែលផ្ដោតសំខាន់លើការអភិវឌ្ឍស្ថាប័ន ការពង្រឹងអភិបាលកិច្ច និងការពង្រីកប្រសិទ្ធភាពការងារនៅក្នុងវិស័យសាធារណៈ ដូចមានកំណត់នៅត្រង់ស្នូលនៃយុទ្ធសាស្ត្របញ្ចកោណដំណាក់កាលទី ១។
ជាមួយគ្នានោះ សម្ដេចបានប្រកាសគាំទ្រលើអាទិភាពសំខាន់ៗរបស់ក្រសួងអធិការកិច្ចដែលរួមមានការពង្រឹងសមត្ថភាពស្ថាប័ន ការកសាង និងអភិវឌ្ឍន៍មូលធនមនុស្ស ការរៀបចំច្បាប់ លិខិតបទដ្ឋានគតិយុទ្ធនៅក្នុងសមត្ថកិច្ចក្រសួងដែលរាជរដ្ឋាភិបាលបានប្រគល់ជូន និងចុងក្រោយគឺការថែរក្សាបរិស្ថានសុខដុមរូមនីយកម្មនៅក្នុងក្រសួង និងអង្គភាពចំណុះ ទាំងថ្នាក់ជាតិ និងក្រោមជាតិ។
ក្នុងនោះសម្ដេចបានសង្កត់ធ្ងន់លើការងារអធិការកិច្ចថា៖
«ការងារអភិបាលកិច្ច គឹប្រៀបបានទៅនឹងការរៀបចំផ្ទះយើងឱ្យស្អាត មុននឹងចេញទៅមើលផ្ទះគេ…រៀបចំផ្ទះយើងឱ្យស្អាត ទើបមានផាសុកភាពល្អ ទើបអាចធ្វើការបម្រើប្រជាជនបានល្អ»។
ជាចុងក្រោយ សម្ដេចបានផ្ដល់អនុសាសន៍មួយចំនួនដល់ក្រសួងក្នុងការយកទៅអនុវត្តបន្តដូចជា៖
១. ក្រសួងអធិការកិច្ចមានតួនាទីគន្លឹះក្នុងការជួយរាជរដ្ឋាភិបាលអនុវត្តយុទ្ធសាស្ត្របញ្ចកោណដំណាក់កាលទី១ សំដៅលើកកម្ពស់អភិបាលកិច្ច និងពង្រឹងភាពស្អាតស្អំក្នុងវិស័យសាធារណៈ ដោយផ្ដោតអាទិភាពលើយន្ដការគ្រប់គ្រង និងផ្ដល់សេវាសាធារណៈ ការផ្ដល់ការលើកទឹកចិត្ត ផ្អែកលើគុណធិបតេយ្យ និងការអនុវត្តតឹងរឹងក្នុងការចាត់វិធានការវិន័យ វិធានការច្បាប់ចំពោះមន្ត្រីសាធារណៈដែលប្រព្រឹត្តបំពានក្រមសីលធម៌វិជ្ជាជីវៈ ឬបំពានអំណាចនៅពេលអនុវត្តតួនាទី
២. ក្រសួងត្រូវផ្ដួចផ្ដើម និងនាំមុខនៅក្នុងការរៀបចំយន្ដការត្រួតពិនិត្យប្រកបដោយគុណភាព និងប្រសិទ្ធភាព
៣. ក្រសួងត្រូវបន្តលើកកម្ពស់ និងពង្រឹងស្ថាប័នបន្ថែមទៀត ដោយផ្ដោតទៅលើការកសាងមូលធនមនុស្ស ដោយពង្រឹងសមត្ថភាពមន្ត្រីដែលមានមនសិការ និងក្រមសីលធម៌វិជ្ជាជីវៈ ស័ក្កសមជាទីពឹងរបស់ពលរដ្ឋ
៤. នៅក្នុងទស្សនៈអធិការកិច្ចដើម្បីទាំងអស់គ្នា ទាំងអស់គ្នាឆ្ពោះទៅកាន់អភិបាលកិច្ចល្អ រដ្ឋាភិបាលសូមស្នើរឱ្យគ្រប់ក្រសួងស្ថាប័ន រដ្ឋបាលថ្នាក់ក្រោមជាតិ ចូលរួមសហការឱ្យបានល្អក្នុងការងារអធិការកិច្ច ស្របតាមពាក្យស្លោក “អធិការកិច្ចជាភ្នែក ជាត្រចៀករបស់ថ្នាក់លើ និងជាមិត្តជិតស្និតរបស់ថ្នាក់ក្រោម”
៥. ក្រសួងត្រូវរៀបចំច្បាប់ សម្រាប់វិស័យអធិការកិច្ចឱ្យបានគ្រប់គ្រាន់
៦. ក្រសួងត្រូវពង្រឹងការអនុវត្តសមត្ថភាពមន្ត្រី ដោយយកចិត្តទុកដាក់លើការជ្រើសរើសអ្នកមានជំនាញ ច្បាស់លាស់ ជាពិសេសត្រូវជំរុញកិច្ចការស្រាវជ្រាវរបស់សិក្ខាកាម
៧. ក្រសួងត្រូវសហការជាមួយក្រសួងប្រៃសនីយ៍ ពង្រឹងសមត្ថភាពមន្ត្រីរបស់ខ្លួនលើអក្ខរកម្មឌីជីថល និងធ្វើទំនើបកម្មស្ថាប័ន សំដៅធ្វើអធិការកិច្ចឌីជីថល៕
Account
Security
Favourite Content