សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ តំបន់សេដ្ឋកិច្ចពិសេស ជាតំបន់ប្រមូលផ្ដុំទៅដោយបណ្តាសហគ្រាស រោងចក្រចម្រុះជាច្រើន ហើយក៏ជាមជ្ឈមណ្ឌលមួយសម្រាប់អ្នកវិនិយោគក្នុងការដាក់ទីតាំងរបស់ខ្លួនដោយមានការគាំទ្រ និងជួយសម្រួលជាពិសេសពីរាជរដ្ឋាភិបាល។
បើតាមទិន្នន័យដែលចេញផ្សាយដោយក្រុមប្រឹក្សាអភិវឌ្ឍន៍កម្ពុជា បច្ចុប្បន្នកម្ពុជាមានតំបន់សេដ្ឋកិច្ច ពិសេសចំនួន ២៤ ទីតាំង និងមានគម្រោងវិនិយោគសរុបចំនួន ៥៦១គម្រោង ព្រមទាំងអាចបង្កើតការងារដល់ប្រជាជនក្នុងតំបន់បានប្រមាណជា ១៦ម៉ឺនកន្លែង។
ក្នុងន័យនេះ បើកាលណាប្រទេសមួយមានតំបន់សេដ្ឋកិច្ចពិសេសកាន់តែច្រើន សេដ្ឋកិច្ចនៃប្រទេសនោះក៏នឹងរីកចម្រើនកាន់តែឆាប់រហ័សដូចគ្នា។ ប៉ុន្តែយ៉ាងណា វិនិយោគិនដែលចូលមកបណ្ដាក់ទុន នៅក្នុងតំបន់សេដ្ឋកិច្ចពិសេសរបស់កម្ពុជាបច្ចុប្បន្ននេះច្រើនតែជាជនបរទេស រីឯប្រភេទអាជីវកម្មវិញ គឺសុទ្ធសឹងតែជាសហគ្រាសធុនធ្ងន់តែម្ដង។
អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជាបានលើកឡើងថា ការចូលមកបណ្ដាក់ទុនជាបន្តបន្ទាប់ពីបណ្ដាសហគ្រាសធំៗ មានតែផ្ដល់ផលចំណេញដល់កម្ពុជា គ្រាន់តែថាវាមិនទាន់គ្រប់ជ្រុងជ្រោយ។ មិនទាន់គ្រប់ជ្រុងជ្រោយ ព្រោះកម្ពុជាពេលនេះចាំបាច់ត្រូវពង្រឹងការកែច្នៃ និងការផលិតក្នុងស្រុកឱ្យបានច្រើន ពោលគឺពង្រឹងវិស័យ SME ។ តិច ឬច្រើន ការកែច្នៃក្នុងស្រុកក៏បានរួមចំណែកធ្វើឱ្យសេដ្ឋកិច្ចមានចរន្ដល្អ។
ផ្អែកលើមូលហេតុនេះ អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជាបានមានប្រសាសន៍យ៉ាងដូច្នេះថា ៖
« ខ្ញុំចង់ឱ្យមានតំបន់ឧស្សាហកម្មសហគ្រាសធុនតូច និងមធ្យមនៅកម្ពុជា ដែលមានលទ្ធភាពធ្វើបានលើទំហំផ្ទៃដីតូច (ក្រោម ៥០ ហិកតា) ព្រោះនេះជាការបង្កើតលទ្ធភាពដល់អ្នកធ្វើការក្នុងវិស័យ SME ក្នុងការជំរុញការកែច្នៃ និងវិនិយោគ នៅក្នុងស្រុកឱ្យកាន់តែច្រើន»។
អ្នកឧកញ៉ាបន្តថា ការបង្កើតតំបន់បែបនេះ វាងាយស្រួលដល់ប្រជាពលរដ្ឋក្នុងការទទួលបានការលើកទឹកចិត្តពីរាជរដ្ឋាភិបាល តាមរយៈការបន្ធូរបន្ធយតម្លៃបណ្ដាញអគ្គិសនី ទឹក បច្ចេកវិទ្យា ដែលនាំឱ្យថ្លៃដើមផលិតទាប។
ប្រសិនបើកម្ពុជាអាចបង្កើតនូវតំបន់សេដ្ឋកិច្ចពិសេសខ្នាតតូចសម្រាប់វិស័យ SME ពិតមែននោះ វាអាចធ្វើឱ្យមានភាពចម្រុះនៅក្នុងការធ្វើអាជីវកម្ម ជួយជំរុញចលនាផលិតផលក្នុងស្រុកឱ្យកាន់តែ ផុសផុល និងជាពិសេសទាក់ទាញវិនិយោគបន្ថែមទៀត។
បើតាមអ្នកឧកញ៉ា លឹម ហេង តំបន់សេដ្ឋកិច្ចពិសេសប្រៀបដូចជាតំបន់ស្វយ័តមួយ ដែលមានការផ្ដល់សេវារដ្ឋបាល ហេដ្ឋារចនាសម្ព័ន្ធ ប្រព័ន្ធគ្រប់គ្រង និងសូម្បីតែពន្ធក៏មានការលើកលែង ពោលគឺតំបន់នេះ ប្រៀបបានទៅនឹងច្រកចេញចូលតែមួយ ដែលញុំាងភាពងាយស្រួលដល់វិនិយោគិន។
ដោយឡែក រាជរដ្ឋាភិបាលកម្ពុជានាអាណត្តិថ្មីនេះ ក៏មានគោលដៅក្នុងការទាក់ទាញអ្នកវិនិយោគឱ្យចូលមកកម្ពុជាឱ្យកាន់តែច្រើនផងដែរ ហេតុដូច្នេះ ការបង្កើតតំបន់សេដ្ឋកិច្ចពិសេសប្រភេទនេះ ទំនងជាអាចចូលរួមសម្រេចបំណងរបស់រាជរដ្ឋាភិបាលផងដែរ៕
Account
Security
Favourite Content