ភ្នំពេញ ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានប្រកាសពីការបន្ធូរបន្ថយ និងបន្តលើកលែងពន្ធសម្រាប់អាជីវកម្មទេសចរណ៍ក្នុងឱកាសថ្លែងសារពិសេសរបស់លោក ស្តីពី “សមិទ្ធផលរយៈពេលមួយឆ្នាំរបស់រាជរដ្ឋាភិបាល នីតិកាលទី៧ នៃរដ្ឋសភា” ដែលបានផ្សាយកាលពីពេលថ្មីៗនេះ ដោយរំពឹងថាការបន្តសុពលភាពនៃការលើកលែងពន្ធនេះអាចជួយសម្រាលបន្ទុកប្រតិបត្តិករក្នុងវិស័យទេសចរណ៍។

ក្នុងគោលបំណងគាំទ្រដល់ប្រតិបត្តិករទេសចរណ៍ និងធ្វើឱ្យវិស័យទេសចរណ៍រស់ឡើងវិញ សម្តេចធិបតី ហ៊ុន ម៉ាណែត បានថ្លែងប្រកាសពន្យារពេលលើការលើកលែងពន្ធសម្រាប់វិស័យទេសចរណ៍រយៈពេលមួយឆ្នាំទៀត។ ការលើកលែងនេះនឹងរួមបញ្ចូលពន្ធប្រចាំខែគ្រប់ប្រភេទក្រៅពីអាករលើតម្លៃបន្ថែម និងពន្ធលើប្រាក់ចំណូល ជាពិសេសការបន្ធូរបន្ថយពន្ធសម្រាប់អាជីវកម្មទេសចរណ៍ក្នុងខេត្តសៀមរាប ដោយសម្តេចធិបតី បានបញ្ជាក់ថា ការធ្វើសវនកម្មលើអាជីវកម្មទេសចរណ៍នឹងត្រូវពន្យារពេលដល់ខែមិថុនា ឆ្នាំ២០​២៥។

សម្តេចធិបតីបានមានប្រសាសន៍ដែរថា ក្រៅពីការងារលើកលែងពន្ធ រាជរដ្ឋាភិបាលក៏បានផ្តល់ថវិកាចំនួន ៥០ លានដុល្លារ តាមរយៈធនាគារ SME ដើម្បីផ្តល់ប្រាក់កម្ចី ជាពិសេសដល់ប្រតិបត្តិករទេសចរណ៍ក្នុងខេត្តសៀម​រាប ដោយក្រុមការងារកំពុងធ្វើការសិក្សា និងវាយតម្លៃសកម្មភាព និងសេវាកម្មទេសចរណ៍។

សូមជម្រាបថា របាយការណ៍ក្រសួងទេសចរណ៍ បានបង្ហាញថា កម្ពុជាបានទាក់ទាញភ្ញៀវទេសចរបរទេសចំនួន ៣.៧៤ លាននាក់ នៅក្នុងរយៈពេល៧ខែកន្លងមក នេះ ដោយបានកើនឡើង ២៣ ភាគរយ បើធៀបក្នុងរយៈពេលដូចគ្នាកាលពីឆ្នាំមុន។

ភ្ញៀវទេសចរជនជាតិថៃមានចំនួនប្រមាណ ១,១៤៧,៥៣៤នាក់ ដោយចំនួននេះបានកើនឡើង ១១.៦ ភាគរយ។ ក្រៅពីនេះគឺប្រទេសជាប់ចំណាត់ថ្នាក់កំពូលទាំង ១០ ដែលមានលេខរៀងបន្ទាប់ ប្រទេសវៀតណាមចំនួន ៧៥៧ ៤៣៧ នាក់ កើនឡើង ៣៧.៤ ភាគរយ និងជនជាតិចិនចំនួន ៤៦៣ ៩៨០ នាក់ កើនឡើង ៤៥.៦ ភាគរយ ក្រៅពីនេះក៏មានមកពីប្រទេសឡាវ អាមេរិក កូរ៉េខាងត្បូង ឥណ្ឌូនេស៊ី បារាំង ចក្រភពអង់គ្លេស និងជប៉ុន ដែលមកទស្សនាប្រទេសកម្ពុជាក្នុងរយៈពេលប្រាំពីរខែនៃឆ្នាំ២០២៤។

លោក ហូ វណ្ណឌី ទីប្រឹក្សាសមាគមទេសចរណ៍កម្ពុជា បានប្រាប់ AMS ថា កាលពីពេល​កន្លងមកនេះ ធ្លាប់មានទង្វើខ្លះបានធ្វើឱ្យមានប្រតិកម្មពីអ្នកជំនាញ​ និងមិនមែនជំនាញរហូតទៅដល់អ្នកទេសចរទាំងក្នុងស្រុក និងបរទេស។ ចំណុចមួយចំនួនដែលត្រូវតែកែតម្រូវឱ្យបានលឿន រួមដូចជា បញ្ហាអនាម័យ ក៏ដូចជាគោលការណ៍មួយចំនួនដែលមិនគួរហាមឃាត់ ខណៈដែលរាជរដ្ឋាភិបាលបានណែនាំដល់ថ្នាក់ដឹកនាំដែលពាក់ព័ន្ធ និងឈានដល់ការសម្រេចលុបចោលគោលការណ៍ទាំងឡាយណា​ដែលនាំឱ្យប៉ះពាល់ដល់ទេសចរ។

លោក ហូ វណ្ណឌី បានបញ្ជាក់ថា ៖ ការកែប្រែទាំងនេះ នឹងជារឿងល្អ ដែលយើងបានកែប្រែពីភាពអវិជ្ជមានមួយចំនួន ទៅជាវិជ្ជមានវិញ។ ការកាត់បន្ថយបន្ទុកហិរញ្ញវត្ថុ ដូចជាការលើកលែងពន្ធក្នុងវិស័យទេសចរណ៍ គឺជាការជួយមួយផ្នែក និងជាការលើកទឹកចិត្តដល់អ្នកប្រកបមុខរបរដែលពាក់ព័ន្ធនៅក្នុវិស័យទេសចរណ៍៕