សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ រាជរដ្ឋាភិបាលបានសម្រេចបន្តលើកទឹកចិត្តផ្នែកពន្ធដារលើផលិតផលស៊ីម៉ង់ត៍ដែលផលិតក្នុងស្រុករយៈពេល២ឆ្នាំបន្ថែមទៀត ពោលគឺរហូតដល់ដំណាច់ឆ្នាំ២០២៨ ដើម្បីជំរុញឱ្យវិនិយោគិនក្នុងស្រុកពង្រីកការផលិតបន្ថែម ក៏ដូចជាជំរុញឱ្យប្រជាពលរដ្ឋងាកមកប្រើប្រាស់ផលិតផលស៊ីម៉ង់ត៍ក្នុងស្រុកបានកាន់តែច្រើន។ នេះបើតាមសេចក្ដីប្រកាសព័ត៌មានក្រោយជំនួបរវាងសម្ដេចមហាបវរធិបតី ហ៊ុន ម់ាណែត នាយករដ្ឋមន្ត្រីនៃកម្ពុជា ជាមួយសមាគមឧស្សាហកម្មស៊ីម៉ង់ត៍កម្ពុជាកាលពីព្រឹកថ្ងៃទី ២៣ ខេមិថុនា ឆ្នាំ២០២៦ ។
សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាបានលើកឡើងថា ភាពជោគជ័យរបស់ក្រុមហ៊ុនដែលមានស្រាប់នៅកម្ពុជា គឺជាការផ្សព្វផ្សាយប្រកបដោយសក្ដានុពលបំផុតក្នុងការទាក់ទាញការវិនិយោគថ្មីៗបន្ថែមទៀតមកកម្ពុជា ដើម្បីធានាបានភាពប្រកួតប្រជែង និងការទាក់ទាញការគាំទ្រពីប្រជាពលរដ្ឋដែលជាអ្នកប្រើប្រាស់ចំពោះផលិតផលរបស់ខ្លួន, អ្នកផលិតត្រូវផ្ដោតការយកចិត្តទុកដាក់ខ្ពស់លើការធានាបាននូវគុណភាពល្អជាមួយតម្លៃសមរម្យ។
សម្ដេចធិបតី បានមានប្រសាសន៍បន្តថា រាជរដ្ឋាភិបាលបន្តផ្តល់ការលើកទឹកចិត្តផ្នែកពន្ធដារលើផលិតផលស៊ីម៉ងត៍ក្នុងស្រុក ដែលរាជរដ្ឋាភិបាលធ្លាប់បានផ្តល់ជូនជាច្រើនឆ្នាំកន្លងមក ដោយចាត់ទុកជាបន្ទុករបស់រដ្ឋសម្រាប់សហគ្រាសផលិតស៊ីម៉ងត៍ក្នុងស្រុក សម្រាប់រយៈពេល ២ ឆ្នាំទៀត ពោលគឺរហូតដល់ដំណាច់ឆ្នាំ ២០២៨ ។
នៅក្នុងឱកាសនោះ អ្នកឧកញ៉ា វិញ ហួរ ប្រធានក្រុមប្រឹក្សាភិបាល សមាគមឧស្សាហកម្មស៊ីម៉ង់ត៍កម្ពុជា បានជម្រាបជូនសម្ដេចធិបតីអំពីការងារ និងប្រតិបត្តិការអាជីវកម្មរបស់សមាគមឧស្សាហកម្មស៊ីម៉ងត៍កម្ពុជា ដោយបញ្ជាក់ថា បច្ចុប្បន្ននេះ បណ្តាក្រុមហ៊ុនដែលជាសមាជិកសមាគម បាន និងកំពុងបោះទុនវិនិយោគសរុបប្រមាណ ១,២ ពាន់លានដុល្លារអាម៉េរិក និងមានសមត្ថភាពផលិតស៊ីម៉ងត៍សរុបបានប្រមាណ ១២ លានតោនក្នុងមួយឆ្នាំ និងបានបង្កើតការងារសម្រាប់បុគ្គលិក និងកម្មករសរុបចំនួន ២ ១១៩ នាក់ ក្នុងនោះបុគ្គលិក និងកម្មករខ្មែរមាន ១ ៩០០ នាក់ ស្មើនឹង ៩០ភាគរយ។
អ្នកឧកញ៉ាបានបន្តថា សមាជិកសមាគមឧស្សាហកម្មស៊ីម៉ងត៍កម្ពុជាបានផ្គត់ផ្គង់ស៊ីម៉ងត៍នៅក្នុងទីផ្សារក្នុងស្រុកសរុបពី ៨ ទៅ ៩ លានតោនក្នុងមួយឆ្នាំ ដោយប្រើប្រាស់វត្ថុធាតុដើមក្នុងស្រុកប្រមាណ ៨៥ភាគរយ នៃខ្សែច្រវាក់ផលិតកម្មស៊ីម៉ងត៍ ដែលការណ៍នេះជួយរក្សាបាននូវភាពប្រកួតប្រជែងរបស់សមាគម។ ក្រៅពីប្រតិបត្តិការអាជីវកម្ម, សមាគមក៏បានចូលរួមអភិវឌ្ឍសហគមន៍ តាមរយៈការរួមចំណែកក្នុងសកម្មភាពមនុស្សធម៌ និងកិច្ចការសង្គមផ្សេងៗ ដូចជាការសាងសង់ និងជួសជុលហេដ្ឋារចនាសម្ព័ន្ធ, សាលារៀន, មណ្ឌលសុខភាព និង ការបំពាក់ភ្លើងបំភ្លឺផ្លូវសាធារណៈ ជាដើម ។
បើតាមលោក ពុត ចិន្ដារឹទ្ធ អគ្គលេខាធិការសមាគមឧស្សហកម្មស៊ីម៉ង់ត៍កម្ពុជា បានមានប្រសាសន៍ថា ក្នុងរយៈពេលប៉ុន្មានចុងក្រោយនេះ ផលិតផលស៊ីម៉ង់ត៍របស់កម្ពុជាបានវាយលុកលើទីផ្សារសំណង់កាន់តែខ្លាំង ដោយបានកាត់បន្ថយការនាំចូលស៊ីម៉ង់ត៍ពីក្រៅប្រទេសស្ទើរតែទាំងស្រុងទៅហើយ ។ សម្រាប់ការលើកទឹកចិត្តផ្នែកពន្ធដារពី សំណាក់រាជរដ្ឋាភិបាល នឹងផ្ដល់ឱកាសដល់អ្នកផលិតស៊ីម៉ង់ត៍ក្នុងស្រុក អាចមានសមត្ថភាពបន្ថែមពង្រីការផលិតឱ្យកាន់តែច្រើន ។
លោកបន្តថា មិនយូរទេ ផលិផលតស៊ីម៉ង់ត៍ដែលផលិតនៅក្នុងប្រទេសកម្ពុជានឹងអាចបំពេញតម្រូវការលើកទីផ្សារបានទាំងស្រុង បន្ទាប់ពីរោងចក្រផលិតស៊ីម៉ង់ត៍ថ្មីៗជាច្រើនបានដំណើរការខ្សែច្រវាក់ផលិតកម្មរបស់ខ្លួន ។
គួរបញ្ជាក់ថា កាលពីដើមខែមិថុនា ២០២៦នេះ ក្រុមការងារអភិវឌ្ឍវិស័យឯកជន របស់រាជរដ្ឋាភិបាលក៏បានពិភាក្សាលើវិធានការគាំទ្រឧស្សាហកម្មផលិតស៊ីម៉ង់ត៍ក្នុងស្រុក ដោយបានពិនិត្យលើសាវតារនៃការដាក់ឱ្យអនុវត្តវិធានការរបស់រាជរដ្ឋាភិបាល ស្ថានភាពឧស្សាហកម្មផលិតស៊ីម៉ង់ត៍ក្នុងស្រុក និងការវិវត្តថ្មីៗ នៃស្ថានភាពសេដ្ឋកិច្ចសកល ព្រមទាំងលក្ខខណ្ឌតម្រូវការនានា របស់រដ្ឋាភិបាលទៅលើក្រុមហ៊ុនផលិតស៊ីម៉ង់ត៍ដូចជាការបង់មូលនិធិបរិស្ថាន ការបង់សួយសាររ៉ែ ការផ្ទេរជំនាញ និងការបណ្ដុះបណ្ដាលនិយោជិត ការប្រើប្រាស់ធាតុផ្សំក្នុងស្រុកជាដើម ។
Account
Security
Favourite Content