ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងថា កម្ពុជាមានចក្ខុវិស័យប្រែក្លាយខ្លួនជាមជ្ឈមណ្ឌលប្រមូលផ្តុំសកម្មភាពផលិតគ្រឿងបង្គុំយានយន្ត និងបរិក្ខារអេឡិចត្រូនិកសម្រាប់នាំចេញទៅទីផ្សារក្នុងតំបន់ និងសកលលោក ដែលការសម្រេចបានចក្ខុវិស័យនេះនឹងនាំមកជាផ្លែផ្កាវិជ្ជមានជាច្រើន សម្រាប់ការអភិវឌ្ឍសង្គម និងសេដ្ឋកិច្ចជាតិ។

សម្ដេចធិបតី បានថ្លែងបែបនេះ ក្នុងឱកាសពិធីសម្ពោធរោងចក្រដំឡើងរថយន្តតូយ៉ូតា ដែលមានទុនវិនិយោគ៣៧លានដុល្លារ ក្នុងតំបន់សេដ្ឋកិច្ចពិសេស រ៉ូយ៉ាល់គ្រុប ភ្នំពេញ នាព្រឹកថ្ងៃទី២ ខែឧសភា ឆ្នាំ២០២៤។

សម្ដេចធិបតី ហ៊ុន ម៉ាណែត បានបញ្ជាក់ថា ៖ ការសម្ពោធរោងចក្រដំឡើងរថយន្តរបស់ក្រុមហ៊ុនតូយូតានាពេលនេះ គឺនាំផលប្រយោជន៍ជាច្រើនជូនទៅដល់សេដ្ឋកិច្ចជាតិ និងប្រជាពលរដ្ឋកម្ពុជា ហើយសំខាន់គឺលើកកម្ពស់លទ្ធភាព និងកិត្យានុភាពរបស់កម្ពុជា ក៏ដូចជាមោទនភាពរបស់ជាតិ និងប្រជាជនខ្មែរផងដែរ។

សម្ដេចធិបតីក៏បានបង្ហាញអារម្មណ៍រីករាយនៅពេលបានឃើញផលិតផលជាច្រើនផលិតនៅកម្ពុជា ព្រោះបានបញ្ជាក់ថា កម្ពុជាកាន់តែពង្រីកសមត្ថភាព អាចដកដង្ហើមខ្លួនឯង ធ្វើជាម្ចាស់ការខ្លួនឯងបានកាន់តែទូលំទូលាយ។

សម្តេចធិបតី ហ៊ុន ម៉ាណែត បានថ្លែងថា រោងចក្រដំឡើងរថយន្តតូយ៉ូតា មិនត្រឹមតែជាវឌ្ឍនភាពថ្មីដ៏ល្អសម្រាប់ វិស័យឧស្សាហកម្ម នៅកម្ពុជាប៉ុណ្ណោះទេ ប៉ុន្ដែថែមទាំងជាសញ្ញាដ៏វិជ្ជមានមួយសម្រាប់ការធ្វើពិពិធកម្មសេដ្ឋកិច្ចកម្ពុជាទៀតផង។ សម្រាប់រោងចក្រដំឡើងរថយន្តដែលបានបោះទុនវិនិយោគប្រមាណ ៣៦,៨លានដុល្លាអាមេរិក និងមានបុគ្គលិកសរុបចំនួន ១៥០នាក់ ជាមួយសមត្ថភាពដំឡើងរថយន្តពីរប្រភេទ បានចំនួន ១,៣២០ គ្រឿង សម្រាប់ឆ្នាំ២០២៤ ក្នុងនោះ ទី១- ប្រភេទ SUV ម៉ាក Toyota Fortuner ចំនួន២៩០គ្រឿង និង ទី២- ប្រភេទមួយបាំងកន្លះ Pick-up truck ម៉ាក Toyota Hilux ចំនួន១០៣០គ្រឿង។

សម្តេចធិបតី ហ៊ុន ម៉ាណែត បានថ្លែងបន្តថា ៖ ដើម្បីសម្រេចបាននូវចក្ខុវិស័យនៃផែនទីបង្ហាញផ្លូវលើការអភិវឌ្ឍវិស័យយានយន្ត និងអេឡិចត្រូនិកនៅកម្ពុជា បានកំណត់វិធានការគន្លឹះជាអាទិភាពតាមផ្នែកចំនួន៥រួមមាន ៖

ទី១- យុទ្ធសាស្ត្រនៃការសម្របសម្រួលអន្តរស្ថាប័ន ទី២-ធនធានមនុស្សនិងនវានុវត្តន៍ ទី៣- ហេដ្ឋារចនាសម្ព័ន្ធ ទី៤- កិច្ចសម្រួលពាណិជ្ជកម្ម និងទី៥-បរិយាកាសធុរកិច្ច និងការវិនិយោគ។

ដូច្នេះនៅក្នុងស្មារតីបុរេសកម្ម និងការឆ្លើយតបទៅនឹងចក្ខុវិស័យនេះ រាជរដ្ឋាភិបាលបានដាក់ចេញយុទ្ធនាការគាំទ្រមួយចំនួនពាក់ព័ន្ធនឹងវិធានការគន្លឹះដែលមានរំលេចនៅក្នុងយុទ្ធសាស្ត្របញ្ចកោណដំណាក់កាលទី១ ច្បាប់ស្ដីពីវិនិយោគនៃព្រះរាជាណាចក្រកម្ពុជា ស្ដីពីការបង្កើត និងការគ្រប់គ្រងតំបន់សេដ្ឋកិច្ចពិសេស កម្មវិធីបណ្ដុះបណ្ដាលជំនាញវិជ្ជាជីវៈ និងបច្ចេកទេសដោយយុវជន-យុវនារីមកពីគ្រួសារជួបការលំបាក និងគ្រួសារងាយរងហានិភ័យនៅទូទាំងប្រទេស ។ មូលនិធិអភិវឌ្ឍន៍ជំនាញ ព្រមទាំងគោលនយោបាយ និងយុទ្ធសាស្ត្រពាក់ព័ន្ធផ្សេងៗ ដែលជាក្បាល​ម៉ាស៊ីននៃកំណើនសេដ្ឋកិច្ច និងជាដៃគូសំខាន់ក្នុងការបង្កើតការងារ ការបង្កើតគំនិតច្នៃប្រឌិត ការលើកកម្ពស់ផលិតភាព និងការពង្រឹងសមត្ថភាពប្រកួតប្រជែងរបស់កម្ពុជាក្នុងទីផ្សារតំបន់ និងសកលលោក៕