សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងគាំទ្រអំពីការពង្រីកសក្តានុពលនៃវិស័យស្រូវអង្ករកម្ពុជា ដោយរាជរដ្ឋាភិបាល បានដាក់ចេញវិធានការសំខាន់ៗមួយចំនួន ក្នុងនោះ មានការលើកទឹកចិត្តគ្រប់ប្រភេទទៅលើផ្នែកពន្ធដារ និងពន្ធគយ លើការនាំចេញអង្ករ និងនាំចូលគ្រឿងបរិក្ខារម៉ាស៊ីនកិនស្រូវ ជាពិសេសរោងម៉ាស៊ីនកិនស្រូវ ដើម្បីមានលទ្ធភាពអាចពង្រឹង និងពង្រីកសក្តានុពលរបស់ខ្លួនលើសមត្ថភាពនៃការបំពាក់ឡសម្ងួតជាដើម។
សម្តេចធិបតីបានសម្តែងការគាំទ្រនេះ ក្នុងឱកាសអញ្ជើញជាអធិបតីក្នុងពិធីបិទវេទិកាស្រូវអង្ករកម្ពុជា លើកទី៧ ឆ្នាំ២០២៤ នៅរសៀលថ្ងៃទី១០ ខែកញ្ញា ឆ្នាំ២០២៤។ វេទិកាស្រូវអង្ករកម្ពុជា បានរៀបចំឡើងក្រោមប្រធានបទ «ការប្រែក្លាយច្រវាក់ផ្គត់ផ្គង់ស្រូវអង្គរ កម្ពុជាឱ្យកាន់តែមានភាពធន់ បរិយាបន្ន និងនិរន្តរភាព»។
សម្តេចធិបតី បានគូសបញ្ជាក់ថា៖ ដើម្បីជួយដល់វិស័យស្រូវ អង្ករកម្ពុជា រាជរដ្ឋាភិបាល បានដាក់ចេញវិធានការសំខាន់ៗមួយចំនួន ដែលក្នុងនោះរួមមានការលើកទឹកចិត្តគ្រប់ប្រភេទ ទៅផ្នែកពន្ធដារ និងពន្ធគយ លើការនាំចេញអង្ករ និងនាំចូលគ្រឿងបរិក្ខារម៉ាស៊ីនកិនស្រូវចាប់តាំងពីឆ្នាំ២០១១ រហូតដល់បច្ចុប្បន្ន ។ គោលនយោបាយនេះ ក៏បានជំរុញឱ្យមានការរីកចម្រើនជាជំហានៗ ហើយផលិតកម្មស្រូវបានកើនដល់១២,៤៥លានតោន (ស្រូវសើម) នៅឆ្នាំ២០២២- ២០២៣ និងបាននាំចេញអង្ករចំនួន ៦៥៦ពាន់តោន ដែលគិតជាទឹកប្រាក់បានចំនួន ៤៦៦លានដុល្លារសហរដ្ឋអាមេរិក ខណៈដែលការនាំចេញស្រូវចំនួន៤,៣៩លានតោន គិតជាទឹកប្រាក់បានចំនួន១,៣២ពាន់លានដុល្លារសហរដ្ឋអាមេរិក។
ឆ្នាំ២០២៣ ការនាំចេញស្រូវ និងអង្ករ មានទឹកប្រាក់សរុបចំនួន ១,៧៩ពាន់លានដុល្លារសហរដ្ឋអាមេរិក ហើយអ្វីដែលរឹតតែប្រសើរឡើងថែមទៀតនោះ គឺក្នុងរយៈពេល ១២ខែ (ខែសីហាឆ្នាំ២០២៣ ដល់ខែសីហា ឆ្នាំ២០២៤) រាជរដ្ឋាភិបាលអាណត្តិទី៧ បានជំរុញ និងលើកកម្ពស់វិស័យស្រូវអង្ករកម្ពុជាឱ្យមានការរីកចម្រើនគួរឱ្យកត់សម្គាល់ គឺការនាំចេញអង្ករបានចំនួន ៧០៥,៦៣៨ តោន និងការនាំចេញស្រូវបានចំនួន៥,០២៧,៣៦៩តោន។
សម្តេចធិបតី ហ៊ុន ម៉ាណែត បានគូសបញ្ជាក់ថា ជាមួយនឹងវិធានការគោលនយោបាយឥណទានរបស់រាជរដ្ឋាពិបាលតាមរយៈធនាគារអភិវឌ្ឍនិងកសិកម្ម ARDB បានធ្វើឱ្យវិស័យស្រូវអង្គរកម្ពុជា ជាពិសេសរោងម៉ាស៊ីនកិនស្រូវមានលទ្ធភាពពង្រឹង និងពង្រីកសក្តានុពលរបស់ខ្លួន លើសមត្ថភាពនៃការបំពាក់ឡសម្ងួត ដែលអាចសម្ងួតស្រូវបានចំនួន៥០ ពាន់តោនក្នុងមួយថ្ងៃ ឃ្លាំងស្តុកស្រូវបានចំនួន២លានតោន ក្នុង១វគ្គ បំពាក់បរិក្ខារកិន កែឆ្នៃអង្ករ ដែលមានភាពទំនើប និងបច្ចេកវិទ្យាចុងក្រោយរបស់ពិភពលោក ដូចបណ្ដាប្រទេសនានា ដែលផលិតអង្ករសម្រាប់កិនកែច្នៃ និងនាំចេញផងដែរ។
សូមបញ្ជាក់ថា រាជរដ្ឋាភិបាលអាណត្តិទី៧ បានដាក់ចេញនូវ កម្មវិធីគោលនយោបាយាអាទិភាព ចំនួន៣សម្រាប់វិស័យកសិកម្មគឺ៖ ទី១-ការលើកស្ទួយផលិតកម្មកសិកម្ម រកទីផ្សារ និងរក្សាលំនឹងថ្លៃផលិតផល តាមរយៈកម្មវិធីហិរញ្ញប្បទាន។ ទី២-ការដាក់ពង្រាយមន្ត្រីកសិកម្ម នៅតាម ឃុំ-សង្កាត់ និងទី៣-ការអភិវឌ្ឍសហគមន៍កសិកម្មទំនើប ដែលកម្មវិធីគោលនយោបាយទាំងបីនេះ បាននឹងកំពុងអនុវត្តយ៉ាងសកម្ម ដែលក្នុងនោះមានកម្មវិធីហិរញ្ញ ប្បទានចំនួន ១០០ លានដុល្លារ របស់រាជរដ្ឋាភិបាលសម្រាប់រក្សាលំនឹងតម្លៃស្រូវផងដែរ ៕
Account
Security
Favourite Content