បរទេស៖ យោងតាមប្រភពព័ត៌មានពីរ៉យទ័របានរាយការណ៍ពីការអះអាងរបស់រដ្ឋមន្ត្រីរតនាគារសហរដ្ឋអាម៉េរិកថា វិស័យឧស្សាហកម្មរបស់ប្រទេសចិនបានផលិតទំនិញច្រើនជាងតម្រូវការទីផ្សារក្នុងស្រុករបស់ខ្លួន។

កាលពីថ្ងៃសុក្រ សប្ដាហ៍កន្លងទៅនេះ រដ្ឋមន្ត្រីរតនាគារសហរដ្ឋអាម៉េរិក លោកស្រី Janet Yellen បានថ្លែងនៅក្នុងសហគមន៍ធុរកិច្ចអាមេរិកនៅទីក្រុងក្វាងចូវ ដោយបានព្រមានថា ការឧបត្ថម្ភធនរបស់ទីក្រុងប៉េកាំងកំពុងបង្កើតអតិរេកនៃទំនិញទូទាំងពិភពលោក។ បន្ថែមពីនេះ អាម៉េរិកចាត់ទុកថា ភាពលើសចំណុះក្នុងឧស្សាហកម្ម និងការអនុវត្តពាណិជ្ជកម្មអយុត្តិធម៌កំពុងបង្កគ្រោះថ្នាក់ក្រុមហ៊ុនអាមេរិក និងក្រុមហ៊ុនបរទេសដទៃទៀត។

លោកស្រី Yellen បានបន្ថែមថា ការគាំទ្រពីរដ្ឋាភិបាលដោយផ្ទាល់ និងដោយប្រយោលនាពេលបច្ចុប្បន្នកំពុងនាំទៅដល់សមត្ថភាពផលិតកម្មដែលលើសពីតម្រូវការក្នុងស្រុករបស់ប្រទេសចិនយ៉ាងខ្លាំង។ មិនត្រឹមតែប៉ុណ្ណោះ ភាពលើសចំណុះបង្កើតបរិមាណដ៏ធំនៃការនាំចេញក្នុងតម្លៃថោក ដែលអាចនាំឱ្យមានការផលិតលើសនៅក្នុងខ្សែសង្វាក់ផ្គត់ផ្គង់។ បញ្ហនេះនឹងបង្កហានិភ័យដល់ភាពធន់នឹងសេដ្ឋកិច្ចពិភពលោក។

ការចោទប្រកាន់នេះគឺជាផ្នែកមួយនៃជម្លោះពាណិជ្ជកម្មររវាងទីក្រុងវ៉ាស៊ីនតោន និងទីក្រុងប៉េកាំង ដោយសេតវិមានធ្លាប់បានចាត់វិធានការប្រឆាំងនឹងក្រុមហ៊ុនចិន និងការរឹតបន្តឹងការវិនិយោគនៅក្នុងប្រទេស។ ជាការឆ្លើយតប រដ្ឋាភិបាលចិនបានរិះគន់ក​ម្តង​ហើយ​ម្តង​ទៀតចំពោះគោលនយោបាយពាណិជ្ជកម្ម និងបច្ចេកវិទ្យារបស់សហរដ្ឋអាមេរិក​។

កាលពីខែមុន Yellen បាននិយាយថា ប្រទេសចិនកំពុងផលិតអាគុយ បន្ទះស្រូបពន្លឺព្រះអាទិត្យ និងរថយន្តអគ្គិសនីក្នុងបរិមាណច្រើនពេក។ មិនត្រឹមតែប៉ុណ្ណោះ ការផលិតក្នុងបរិមាណច្រើននេះកំពុងបង្កគ្រោះថ្នាក់ដល់ក្រុមហ៊ុនអាមេរិក ដោយសារទីក្រុងប៉េកាំងផ្តល់ការគាំទ្រមិនសមាមាត្រដល់ក្រុមហ៊ុនផលិតក្នុងស្រុកដើម្បីរក្សាផលិតកម្ម និងការងារក្នុងស្រុករបស់ខ្លួន ខណៈដែលឧស្សាហកម្មពិភពលោកកំពុងធ្លាក់ចុះ។ មិនត្រឹមតែប៉ុណ្ណោះ សហភាពអឺរ៉ុបបានលើកឡើងថា ចំណែកនៃការលក់រថយន្តអគ្គិសនី EVs របស់ចិនដែលលក់នៅអឺរ៉ុបអាចឈានដល់ ១៥ ភាគរយនៃទីផ្សារអឺរ៉ុបក្នុងឆ្នាំ ២០២៥ ដោយសាររថយន្ត EVs របស់ចិនទទួលបានអត្ថប្រយោជន៍ពីការឧបត្ថម្ភធនរបស់រដ្ឋយ៉ាងច្រើន។ បច្ចុប្បន្នេះ នសហភាពអឺរ៉ុបកំពុងពិចារណាថាតើត្រូវអនុវត្តដាក់ទណ្ឌកម្មពន្ធលើរថយន្ត EV របស់ចិនដែរឬទេ?

លើសពីនេះ អ្នកវិភាគបានលើកហេតុផលផ្សេងៗទៀតដែលបានរួមចំណែកដល់ការកាត់បន្ថយតម្លៃរួមមានការច្នៃប្រឌិត ការប្រកួតប្រជែងដ៏ខ្លាំងក្លានៅក្នុងទីផ្សារដែលមានអ្នកប្រើប្រាស់ច្រើន និងឥទ្ធិពលចិនក្នុងខ្សែសង្វាក់ផ្គត់ផ្គង់ថ្មថាមពល។

ជាការឆ្លើយតប រដ្ឋមន្ត្រីពាណិជ្ជកម្មចិន Wang Wento បានលើកឡើងនូវជំហររបស់ទីក្រុងប៉េកាំងវិញថា ក្រុមហ៊ុន EV របស់ចិនមិនពឹងផ្អែកលើការឧបត្ថម្ភធនរបស់រដ្ឋដើម្បីទទួលបានអត្ថប្រយោជន៍ប្រកួតប្រជែងនោះទេ ហើយការចោទប្រកាន់ដោយសហរដ្ឋអាមេរិក និងអឺរ៉ុបអំពីភាពលើសចំណុះ គឺគ្មានមូលដ្ឋានច្បាស់លាស់។ លើសពីនេះ ក្រុមហ៊ុនរថយន្តអគ្គិសនីរបស់ចិនពឹងផ្អែកលើការច្នៃប្រឌិតបច្ចេកវិទ្យាជាបន្តបន្ទាប់ ប្រព័ន្ធផលិតកម្ម និងខ្សែសង្វាក់ផ្គត់ផ្គង់ដ៏ល្អឥតខ្ចោះ និងការប្រកួតប្រជែងទីផ្សារពេញលេញសម្រាប់ការអភិវឌ្ឍន៍យ៉ាងឆាប់រហ័ស ដោយមិនពឹងផ្អែកលើការឧបត្ថម្ភធនដើម្បីទទួលបានអត្ថប្រយោជន៍ប្រកួតប្រជែងនោះទេ។

កាលពីលើកមុន ប្រទេសចិនបានដាក់ពាក្យបណ្តឹងទៅអង្គការពាណិជ្ជកម្មពិភពលោក (WTO) ជុំវិញបញ្ហាដែលខ្លួនគិតថា តម្រូវការរបស់ទីក្រុងវ៉ាស៊ីនតោនមានភាពរើសអើងសម្រាប់ការឧបត្ថម្ភធនដល់រថយន្តអគ្គិសនី។ ជាការឆ្លើយតបទៅនឹងបញ្ហានេះ រដ្ឋាភិបាលអាម៉េរិកបាននិយាយថា ទោះបីជាការឧបត្ថម្ភធនបានរួមចំណែកដល់អនាគតនៃថាមពលស្អាត ប៉ុន្តែការបន្តប្រើប្រាស់គោលនយោបាយ និងការអនុវត្តមិនយុត្តិធម៌របស់ចិនអាចប៉ះពាល់ដល់ការប្រកួតប្រជែងរបស់ទីផ្សារពិភពលោក៕