សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ យោងតាមប្រភពព័ត៌មានពី The Nation បានរាយការណ៍ថា សាជីវកម្មចម្រុះជាតិសាសន៍ចំនួន ៦ បានបង្ហាញពីចំណាប់អារម្មណ៍ក្នុងការវិនិយោគលើកាស៊ីណូនៅក្នុងប្រទេសថៃបន្ទាប់ពីរដ្ឋាភិបាលថៃបានអនុម័តលើសេចក្តីព្រាងច្បាប់អនុញ្ញាតឲ្យមានអាជីវកម្មកាស៊ីណូដោយស្របច្បាប់។
កាលពីថ្ងៃចន្ទ គណៈរដ្ឋមន្ត្រីថៃបានអនុម័តលើសេចក្តីព្រាងច្បាប់ស្តីពីអាជីវកម្មកម្សាន្ត ដែលនឹងអនុញ្ញាតឲ្យមានអាជីវកម្មកាស៊ីណូស្របច្បាប់នៅក្នុងប្រទេសថៃ ដើម្បីបង្កើតប្រាក់ចំណូលពន្ធ ជំរុញវិស័យទេសចរណ៏ និងសេដ្ឋកិច្ច។
ក្រោយពីកិច្ចប្រជុំគណៈរដ្ឋមន្ត្រី នាយករដ្ឋមន្ត្រីថៃ លោកស្រី Paetongtarn Shinawatra បានលើកឡើងថា សេចក្តីព្រាងច្បាប់នេះក៏ជួយទាក់ទាញវិនិយោគបន្ថែមទៀត និងដោះស្រាយបញ្ហាល្បែងស៊ីសងខុសច្បាប់ផងដែរ ហើយវានឹងផ្តល់ប្រយោជន៍ដល់សង្គមទាំងមូលក្នុងពេលអនាគត។ នេះជាផ្នែកមួយនៃគោលនយោបាយរបស់រដ្ឋាភិបាល ដើម្បីគាំទ្រវិស័យទេសចរណ៍ប្រកបដោយនិរន្តរភាព ឬ ទិសដៅទេសចរណ៍ដែលបង្កើតឡើងដោយមនុស្ស។
លោក Prommin Lertsuridej អគ្គលេខាធិការនាយករដ្ឋមន្ត្រីថៃ បានបដិសេធមិនបញ្ចេញឈ្មោះភាគីដែលចាប់អារម្មណ៍វិនិយោគ ប៉ុន្តែបានបញ្ជាក់ថា អ្នកទាំងអស់នោះមានបទពិសោធន៍យ៉ាងទូលំទូលាយក្នុងការគ្រប់គ្រងកន្លែងកម្សាន្តលំដាប់ពិភពលោកនៅក្នុងប្រទេសមួយចំនួន។ យ៉ាងណាមិញ គេសង្ស័យថា ក្រុមហ៊ុនទាំង ៦ នោះរួមមាន៖ Genting Malaysia, Galaxy Entertainment Group, Las Vegas Sands, MGM Resorts, Wynn Resorts និង Melco Resorts and Entertainment ដែលជាក្រុមហ៊ុនមានសក្តានុពលក្នុងវិស័យនេះ។ ទន្ទឹមនឹងនេះ Melco Resorts បោះជំហានឆ្ពោះទៅរកការបង្កើតវត្តមាននៅក្នុងប្រទេសថៃ ដោយបានប្រកាសពីផែនការបើកការិយាល័យនៅទីក្រុងបាងកក។ ក្រុមហ៊ុននេះកំពុងដំណើរការនៅប្រទេស ឬ ទីក្រុងមួយចំនួនដូចជា៖ ស៊ីប ទីក្រុងម៉ានីល ស្រីលង្កា និងម៉ាកាវ។
លោក Prommin បានច្រានចោលមតិយល់ឃើញថា គោលដៅចម្បងនៃច្បាប់ថ្មីគឺដើម្បីធ្វើឱ្យការលេងល្បែងមានភាពស្របច្បាប់។ រដ្ឋាភិបាលថៃចង់លុបបំបាត់ការយល់ឃើញថា កាស៊ីណូ គឺជាការផ្តោតសំខាន់នៅក្នុងសេចក្តីព្រាងច្បាប់នេះ ដោយជាក់ស្តែង កាស៊ីណូ នឹងមានចំណែកត្រឹមតែ ៥ ភាគរយនៃផ្ទៃដីសរុបរបស់កន្លែងកម្សាន្តទាំងមូលប៉ុណ្ណោះ។ គាត់បន្ថែមថា ថៃចង់បង្កើតគោលដៅទេសចរណ៍ដ៏ទូលំទូលាយដែលស័ក្តិសមសម្រាប់លក្ខណៈគ្រួសារ ស្រដៀងនឹងគំរូជោគជ័យនៅ សិង្ហបុរី ម៉ាកាវ និងឡាសវេហ្គាស។ នៅក្នុងគម្រោងនេះ កន្លែងកម្សាន្តនីមួយៗនឹងមានសណ្ឋាគារលំដាប់ផ្កាយ ៤ ឬ ៥ រួមមាន បន្ទប់យ៉ាងតិច ៥ ០០០ បន្ទប់, មជ្ឈមណ្ឌលសន្និបាត និងពិព័រណ៍, ពហុដ្ឋាន ឬ ទីលានកីឡា indoor ដែលមានកៅអីរហូតដល់ ១ ៦០០, កន្លែងប្រគុំតន្ត្រីលំដាប់ពិភពលោក, ផ្សារទំនើប, ហាងទំនិញគ្មានពន្ធ, សួនកម្សាន្ត, ភោជនីយដ្ឋានលំដាប់ Michelin, និងកន្លែងសម្រាប់សកម្មភាពពិសេសជាដើម។
លោក Prommin លើកឡើងថា ក្រុមហ៊ុនចំនួន ៦ ទាំងនោះបានបំពេញតាមលក្ខណៈវិនិច្ឆ័យសម្រាប់ការវិនិយោគរួចហើយ ដែលមានដើមទុនចុះបញ្ជីយ៉ាងហោចណាស់ ១០ ពាន់លានបាត (២៨៩ លានដុល្លារ) នៅក្នុងដើមទុនចុះបញ្ជី, មានលទ្ធភាពក្នុងការវិនិយោគអប្បបរមា ១០០ ពាន់លានបាត (២,៨៩ លានដុល្លារ) និងមានផែនការអាជីវកម្មសម្រាប់កន្លែងកម្សាន្តដ៏ទូលំទូលាយ។ មិនត្រឹមតែប៉ុណ្ណោះ មជ្ឈមណ្ឌលកម្សាន្តនឹងមានទីតាំងនៅជិតគោលដៅទេសចរណ៍ ជាមួយនឹងការតភ្ជាប់ផ្លូវដឹកជញ្ជូនអ្នកដំណើរងាយស្រួល និងហេដ្ឋារចនាសម្ព័ន្ធឌីជីថល និងហិរញ្ញវត្ថុ។ ទន្ទឹមនឹងនេះ ថៃត្រូវធ្វើសកម្មភាពឱ្យបានឆាប់រហ័ស ជាមួយនឹងគោលដៅប្រកួតប្រជែងជាមួយទីក្រុងអូសាកា ប្រទេសជប៉ុន ដែលមានគម្រោងនឹងបើកមជ្ឈមណ្ឌលកម្សាន្តស្រដៀងគ្នានេះ។ ឥឡូវនេះ អាជីវកម្មនានាកំពុងមើលឃើញសក្តានុពលខ្ពស់នៅក្នុងប្រទេសថៃ ដោយសារវិស័យទេសចរណ៍ និងហេដ្ឋារចនាសម្ព័ន្ធដែលមានស្រាប់។
ក្រសួងហិរញ្ញវត្ថុថៃ ប៉ាន់ប្រមាណថា គម្រោងសាងសង់មជ្ឈមណ្ឌលកម្សាន្តនេះនឹងជំរុញផលិតផលក្នុងស្រុកសរុប (GDP) ០,២ ភាគរយក្នុងអំឡុងពេលសាងសង់ និង ០,៧ ភាគរយនៅពេលដំណើរការ។ វាត្រូវបានរំពឹងថានឹងបង្កើតការងារចំនួន ២០ ០០០ កន្លែង និងទាក់ទាញភ្ញៀវទេសចរណ៍ក្នុងរដូវទាបពី ៥ ទៅ ១០ ភាគរយដែលនាំឱ្យចំណូលពីទេសចរណ៍កើនឡើងដល់ ១៣ ភាគរយ៕
Account
Security
Favourite Content