ភ្នំពេញ ៖ ព្រឹត្តិការណ៍​ពិព័រណ៍​ផលិតផលខ្មែរ ក្រោមប្រធានបទ « ពង្រឹង និងពង្រីក សមត្ថភាពផលិតក្នុងស្រុក » ​នឹងមានការចូលរួមពីសហគ្រាស​ ឧស្សហករ សិប្បករ មកតាំងបង្ហា​ញ​ផលិតផល​ខ្មែរ ដោយក្នុងនោះផលិតក្នុងស្រុក​សរុបជាង​១០០ប្រភេទ នឹងត្រូវដាក់បង្ហាញ ​ដើម្បីផ្សព្វផ្សាយ​​ដល់ពលរដ្ឋ​កម្ពុជា ដែលជាឱកាស​ដ៏​កម្រ ស្របពេលដែល​ពលរដ្ឋកម្ពុជាភាគច្រើន​ស្ទើរតែទូទាំង​ប្រទេស ​បាន និងកំពុងធ្វើ​ពហិការ​លើផលិតផលនាំចូល ​ឬផលិតចេញពីប្រទេសថៃ ក្រោយពីមានជម្លោះព្រំដែន ។

បើតាម​សម្ព័ន្ធសមាគម​សហគ្រាសធុន​តូច និងមធ្យមកម្ពុជា បានឱ្យដឹងថា នៅថ្ងៃទី១១ ដល់ថ្ងៃទី១៣ ខែកញ្ញា ២០២៥ ផលិតផល​ខ្មែរ​ជាង​១០០ប្រភេទ មកពី​ជាង​៣០០​សហគ្រាស​ក្នុងប្រទេសកម្ពុជា ​នឹង​ដាក់តាំង​បង្ហាញ​នៅក្នុងពិព័រណ៍ផលិតផល​ខ្មែរ​ នៅមជ្ឈមណ្ឌល​សន្និបាត និងពិព័រណ៍កោះពេជ្រ រាជធានីភ្នំពេញ ។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានថ្លែងថា ការធ្វើពិព័រណ៌ផលិតផលក្នុងស្រុក ផលិតផលខ្មែរ គឺជារឿងល្អដែលក្រសួងពាណិជ្ជកម្ម និងសភាពពាណិជ្ជកម្មតែងធ្វើជារៀងរាល់ឆ្នាំ ហើយឆ្នាំនេះកាន់តែល្អប្រសើរជាងឆ្នាំមុនៗសម្រាប់ការទាក់ទាញនូវស្មារតីជាតិនិយម ដើម្បីគាំទ្រផលិតផលខ្មែរដែលកំពុងមានកំណើន។

អ្នកឧកញ៉ា លឹម ហេង បានបញ្ជាក់ថា៖

« ការធ្វើពហិការចំពោះផលិតផលថៃ ប្រសិនបើក្នុងស្មារតីរបស់ប្រជាពលរដ្ឋគាត់ធ្វើដោយខ្លួនគាត់…. អត់មានពីណាឃាត់គាត់បានទេ ជាសិទ្ធិរបស់គាត់ ….។ យើងធ្វើពហិការបាន សម្រាប់ទំនិញគេនាំចូល តែបើគេធ្វើពហិការទំនិញយើងវិញ ក៏បានដូចគ្នា​​​។ ជាក់ស្ដែង ដូចជាប្រមាណជាងមួយខែកន្លងមកនេះ ទំនិញកម្ពុជាត្រូវនាំចេញ អង្ករ ស្រូវ ពោត សណ្ដែក គ្រប់មុខ ដែលកន្លងមកនាំចេញទីថៃ មានទំហំតម្លៃ ប្រមាណ ១០០០ លានដុល្លារមួយឆ្នាំ។ តើត្រូវទៅច្រកណា? នេះជាចំណុចសំខាន់ ដែលយើងត្រូវដោះស្រាយ»។

ដោយឡែក សម្រាប់អ្នកជំនាញសេដ្ឋកិច្ច បានបង្ហាញទស្សនៈថា ពិព័រណ៍​ផលិតផលខ្មែរ គឺជាកាលានុវត្តភាពដ៏សំខាន់របស់ឧស្សា​ហករ សិប្បករ ផលិតករកម្ពុជា ដែលអាចយកឱកាសនេះ ដើម្បីបង្ហាញ ឬបញ្ចេញផលិតផលរបស់ខ្លួន ដែលនឹងផ្ដល់គុណប្រយោជន៍​ដល់អ្នកប្រើប្រាស់ ក៏ដូចជាការផ្ដល់ទំនុកចិត្តនានាផ្សេងទៀត។

លោកបណ្ឌិត ហុង វណ្ណៈ បានបញ្ជាក់ថា៖

« មិនត្រឹមតែផ្ដល់គុណប្រយោជន៍​ដល់អ្នកប្រើប្រាស់ ហើយថែមទាំងបង្កើតនូវតម្លៃបន្ថែមជាច្រើនដល់បងប្អូនប្រជាពលរដ្ឋខ្មែរ ក្នុងការរួមចំណែកអភិវឌ្ឍន៍សង្គមជាតិ អ៊ីចឹងជាចំណុចមួយ ដែលអាចនឹងជំនួសឱ្យនូវផលិតផលនាំចូល ជាពិសេសផលិតផល នាំចូល ហូរចូលពីប្រទេសថៃ និងបណ្ដាទីផ្សារផ្សេងៗមកកាន់កម្ពុជាផងដែរ»។

លោកបណ្ឌិត បានគិតថា ពិព័រណ៌បង្ហាញផលិតលផល ឱកាសល្អសម្រាប់ផលិតករ ឧស្សហករ ដែលកន្លងមកយើងមិនទាន់មាន សិប្បកម្ម ឧស្សហកម្ម ឬរោងចក្រ សហគ្រាសដែលឆ្លើយតប ទៅនឹងការដាំដុះ ផលិតនៅកម្ពុជានៅឡើយ ។ ហេតុនេះជាឱកាសមួយ ដែលពលរដ្ឋខ្មែរ ងាកទៅគាំទ្រផលិតផលខ្មែរមួយកម្រិត​ថែមទៀត និងជាអំណោយផលរបស់កម្ពុជាត្រឡប់មកវិញ គឺការមិនសូវចាប់អារម្មណ៍ ផលិតផលរខ្មែរ ឥឡូវយើងចាប់ផ្ដើមងាកមកប្រើប្រាស់នូវផលិតផលខ្មែរ។

បណ្ឌិត ហុង វណ្ណៈ បានបញ្ជាក់ថា៖ ពាក់ព័ន្ធទៅនឹងផលិតផលខ្មែរ ក៏សូមឱ្យឧស្សាហករ ដែលជាអ្នកផលិតទាំងអស់រួមគ្នាបង្ហាញពីសុឆន្ទៈ «ខ្មែរស្រឡាញ់ខ្មែរ» តាមរយៈការយកចិត្តទុកដាក់លើគុណភាពពិតប្រាកដ ឱ្យទៅដល់ផលិតផលសម្រេចរបស់ខ្លួន ដោយកុំផ្ដល់ ឬបង្កនូវផលអវិជ្ជមាន ត្រូវគិតជាអាទិភាព ដើម្បីសុខុមាលភាពជូនដល់បងប្អូនប្រជាពលរដ្ឋ។ កាលណាពួកប្រជាពលរដ្ឋប្រើប្រាស់ និងទទួលបានអត្ថប្រយោជន៍ពិត វានឹងផ្តល់ផលចំណេញទាំងអ្នកផលិត ទាំងផ្នែកសេដ្ឋកិច្ចជាតិ៕