បរទេស ៖ យោងតាមប្រភពពី CNN បានរាយការណ៍ថា សេដ្ឋកិច្ចរបស់ជប៉ុនបានធ្លាក់ចុះដោយមិននឹកស្មានដល់ដោយសារតែការប្រើប្រាស់ផលិតផលក្នុងស្រុកមានការចុះខ្សោយយ៉ាងខ្លាំង ជំរុញឱ្យប្រទេសនេះធ្លាក់ក្នុងវិបត្តិសេដ្ឋកិច្ចរហូតធ្វើឱ្យរបូតតំណែងជាប្រទេសដែលមានសេដ្ឋកិច្ចធំជាងគេទី៣របស់ពិភពលោក និងធ្លាក់ទៅឱ្យប្រទេសអាល្លឺម៉ង់ជាអ្នកកាន់កាប់ជំនួស។

កាលពីសប្ដាហ៍កន្លងទៅនេះ មានទិន្នន័យមួយបានបង្ហាញថា ផលិតផលក្នុងស្រុកសរុប (GDP)ជប៉ុន ក្នុងរយៈពេល៣ខែចុងក្រោយនៃឆ្នាំ២០២៣ បានធ្លាក់ចុះក្នុងល្បឿនប្រចាំឆ្នាំ ០,៤ ភាគរយ បន្ទាប់ពីបានធ្លាក់ចុះប្រចាំឆ្នាំ ៣,៣ នៅក្នុងត្រីមាសមុន។ ជាធម្មតា វិបត្តិសេដ្ឋកិច្ចត្រូវបានកំណត់ដោយការធ្លាក់ចុះសេដ្ឋកិច្ចក្នុងរយៈពេល ២ ត្រីមាសជាប់ៗគ្នា ហើយការធ្លាក់ចុះនេះគឺទាបជាងការព្យាករណ៍។ ក្នុងអំឡុងត្រីមាសទី ៤ ការប្រើប្រាស់ផលិតផលក្នុងស្រុកបានធ្លាក់ចុះ ០,៩ ភាគរយ និងការវិនិយោគសាជីវកម្មបានធ្លាក់ចុះ ០,៣ ភាគរយ។ បើគិតជាប្រាក់ដុល្លារអាម៉េរិក ផលិតផលក្នុងស្រុកសរុប (GDP) របស់ជប៉ុនមានចំនួន ៤,២ ទ្រីលានដុល្លារ ខណៈដែល GDP អាល្លឺម៉ង់មានចំនួន ៤,៥ ទ្រីលានដុល្លារកាលពីឆ្នាំ ២០២៣។ ទិន្នន័យ​នេះ​បានបញ្ជាក់​ថា ​​សេដ្ឋកិច្ចជប៉ុនមានចំណាត់ថ្នាក់​ធំ​ជាង​គេ​ទី​ ៤ ​របស់​ពិភពលោក​បន្ទាប់​ពី​​អាល្លឺម៉ង់។

លើសពីនេះ តម្រូវការក្នុងស្រុកគឺខ្សោយ ជាពិសេរប្រភេទតម្រូវការក្នុងស្រុកសំខាន់ៗទាំងអស់ រួមទាំងការចំណាយរបស់អ្នកប្រើប្រាស់គឺអវិជ្ជមាន។ ការប្រើប្រាស់ផលិតផលក្នុងស្រុកលក្ខណៈឯកជនដែលស្មើនឹងពាក់កណ្តាលនៃសេដ្ឋកិច្ចបានធ្លាក់ចុះ ០,៩ ភាគរយប្រចាំឆ្នាំ ដោយសារអ្នកប្រើប្រាស់ជប៉ុនបានប្រឈមនឹងតម្លៃខ្ពស់សម្រាប់ម្ហូបអាហារ ប្រេងឥន្ធនៈ និងទំនិញផ្សេងទៀត។ យ៉ាងណាមិញ តម្រូវការខាងក្រៅបានរួមចំណែកជាវិជ្ជមានជំរុញឱ្យប្រាក់យ៉េនទន់ខ្សោយ ដោយសារការនាំចេញទំនិញ និងសេវាកម្ម ជាពិសេស ​ការ​ចំណាយ​របស់​ភ្ញៀវ​ទេសចរ​បាន​កើន​ឡើង​យ៉ាង​ខ្លាំង។

លោក Neil Newman អ្នកយុទ្ធសាស្រ្តមកពី Japan​macro បានលើកឡើងថា ជប៉ុនបាននាំចូល ៩៤ ភាគរយនៃតម្រូវការថាមពលមូលដ្ឋានរបស់ខ្លួន និង ៦៣ ភាគរយនៃអាហាររបស់ខ្លួន ហើយការចុះខ្សោយនេះបានរួមចំណែកយ៉ាងសំខាន់ដល់តម្លៃខ្ពស់នៃការរស់នៅ។ នៅដើមឆ្នាំនេះ ប្រាក់យ៉េនបានធ្លាក់ចុះ ៦,៦ ភាគរយធៀបនឹងប្រាក់ដុល្លារអាម៉េរិក ដែលធ្វើឱ្យវាក្លាយជារូបិយប័ណ្ណខ្សោយបំផុតមួយក្នុងចំណោមរូបិយប័ណ្ណដែលប្រើប្រាស់ដោយក្រុមប្រទេសឧស្សាហកម្មទាំង ១០ ។ លើសពីនេះ ការ​ប្រើ​ប្រាស់​ឯកជន​មាន​ភាព​ទន់​ខ្សោយ​ ហើយសេដ្ឋកិច្ចនឹងកាន់តែអាក្រក់បន្ទាប់ពីរញ្ជួយដីនៅសមុទ្រជប៉ុន។

ទន្ទឹមនឹងនេះ ជប៉ុន និងអាល្លឺម៉ង់ មានធនធានក្រីក្រ ប្រជាជនវ័យចំណាស់ និងពឹងផ្អែកខ្លាំងលើការនាំចេញដូចគ្នា។ អាល្លឺម៉ង់ គឺជាសេដ្ឋកិច្ចដ៏ធំបំផុតរបស់អឺរ៉ុបក៏ត្រូវបានរង្គោះរង្គើផងដែរដោយការកើនឡើងតម្លៃថាមពលដែលបណ្តាលមកពីសង្គ្រាមរបស់រុស្ស៊ី-អ៊ុយក្រែន ការកើនឡើងអត្រាការប្រាក់នៅក្នុងតំបន់ចាយប្រាក់អឺរ៉ូ និងកង្វះខាតកម្លាំងពលកម្មជំនាញរ៉ាំរ៉ៃ។ ស្របពេលនេះដែរ ប្រាក់យ៉េនទន់ខ្សោយបានជួយក្រុមហ៊ុននាំចេញរបស់ជប៉ុន និងក្រុមហ៊ុនផលិតរថយន្ត កាត់បន្ថយថ្លៃដើមទំនិញរបស់ពួកគេនៅបរទេស ប៉ុន្តែជប៉ុនកំពុងប្រឈមមុខនឹងកង្វះកម្លាំងពលកម្មធំជាងអាល្លឺម៉ង់ ព្រមទាំងកំពុងជួបការលំបាកក្នុងការបង្កើនអត្រាកំណើតទាបរបស់ខ្លួនថែមទៀតផង។ ការបរាជ័យរបស់រដ្ឋាភិបាលជប៉ុនក្នុងការជំរុញអត្រាកំណើតមានន័យថា កង្វះកម្លាំងពលកម្មរ៉ាំរ៉ៃត្រូវបានរំពឹងថានឹងកាន់តែអាក្រក់ទៅៗ បើទោះបីជាប្រទេសនេះស្វាគមន៍ចំនួនពលករបរទេសច្រើនក៏ដោយ៕