សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ វេទិការាជរដ្ឋាភិបាល-វិស័យឯកជន គ្រោងនឹងធ្វើនៅថ្ងៃទី១៣ ខែវិច្ឆិកា ឆ្នាំ២០២៣ ខាងមុខ ដើម្បីដោះស្រាយបញ្ហាប្រឈមសំខាន់ៗរបស់វិស័យឯកជន។ ក្នុងនោះ វិស័យជាច្រើននឹងក្លាយជាប្រធានបទសម្រាប់ជជែកពិភាក្សារកដំណោះស្រាយ។
នៅក្នុងជំនួបជាមួយឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍កាលពីដើមសប្តាហ៍នេះ លោកឧកញ៉ា តែ តាំងប៉រ សហប្រធានក្រុមការងារវិស័យ “កម្មន្តសាល សហគ្រាសធុនតូច និងមធ្យម និងសេវា” បានមានប្រសាសន៍ថា តំណាងផ្នែកឯកជនវិស័យកម្មន្តសាល សហគ្រាសធុនតូចនិងមធ្យម និងសេវាបានប្រមូលបញ្ហាប្រឈមនានាពីសមាជិករបស់ខ្លួននៅទូទាំងប្រទេសដាក់ជាសំណើចំនួន ២៩ ចំណុច ដើម្បីស្វែងរកដំណោះស្រាយពីរាជរដ្ឋាភិបាល។
លោកឧកញ៉ាបានឱ្យដឹងថា៖បញ្ហាទាំងនោះរួមមាន ការចូលទីផ្សាររបស់ផលិតផលក្នុងស្រុក និងការហូរចូលផលិតផលក្រៅស្រុក ការនាំចូលវត្ថុធាតុដើម គ្រឿងចក្រម៉ាស៊ីន និងសារធាតុគីមី ពន្ធដារសម្រាប់សហគ្រាសធុនតូច ការប្រើប្រាស់ថាមពល និងការទទួលបានហិរញ្ញប្បទាន។
បន្ទាប់មកទៀតគឺ ការប្រើប្រាស់បច្ចេកវិទ្យាគាំទ្រក្នុងផលិតកម្ម និងទីផ្សារ គឺការបង្កើតតំបន់ប្រមូលផ្តុំសហគ្រាសធុនតូច និងមធ្យម ការនាំចេញផលិតផលទៅទីផ្សារអន្តរជាតិ ការទទួលបានស្តង់ដារផលិតផលទាំងចំណីអាហារ និងមិនមែនចំណីអាហារ ការងារមាត្រាសាស្ត្រ ការភ្ជាប់ទំនាក់ទំនងរវាងសហគ្រាសធុនតូច និងមធ្យមជាមួយសហគ្រាសវិនិយោគ ប្រសិទ្ធភាពទទួលបានការលើកទឹកចិត្តពីរាជរដ្ឋាភិបាល ការទទួលបានព័ត៌មាន និងការបណ្តុះបណ្តាល ព្រមទាំងកម្មវិធីគាំទ្រនានា និងចុងក្រោយគឺដោះស្រាយបញ្ហាជាន់អណត្តិកិច្ចរវាងស្ថាប័នរដ្ឋ ព្រមទាំងបញ្ហាមួយចំនួនទៀត។
ពាក់ព័ន្ធនឹងចំណុចនេះ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍បានមានប្រសាសន៍ថា៖
«យើងព្យាយាមដោះស្រាយបញ្ហាប្រឈមរបស់វិស័យឯកជនឱ្យបានច្រើនតាមដែលអាចធ្វើបាន ហើយនឹងបន្តការសន្ទនាដោយបើកចំហ និងដោះស្រាយបញ្ហាផ្សេងៗទៀតដែលវិស័យឯកជនមាន។»
ឯកឧត្តមបានមានប្រសាសន៍បន្តទៀតថា ក្រសួងក៏កំពុងធ្វើកំណែទម្រង់សេវាសាធារណៈសំខាន់ៗរបស់ខ្លួនដែលនឹងរួមបញ្ចូលការធ្វើឱ្យសេវាទាំងនោះផ្តោតលើអតិថិជន កាត់បន្ថយចំណាយ និងកាត់បន្ថយរយៈពេលផ្តល់សេវាជាដើមដើម្បីគាំទ្រដល់វិស័យឯកជនឱ្យបានកាន់តែល្អប្រសើរ៕ អត្ថបទដោយ ៖ ញ៉ែម សុផល
Account
Security
Favourite Content