កំពង់ចាម ៖ ស្របពេលដែលប្រទេសកាន់តែអភិវឌ្ឍន៍ទៅមុខ ប្រជាជនក៏កាន់តែមមាញឹកជាមួយការងាររបស់ខ្លួន។ ទម្លាប់ដែលស្ត្រីជាម្ដាយ ត្រូវនៅផ្ទះមើលថែកូនក៏ចាប់ផ្ដើមសាបរលាបបន្តិចម្ដងៗ ជាពិសេស នៅតាមទីប្រជុំជន និងទីក្រុង។

បរិបថបច្ចុប្បន្ន ស្ត្រី និងបុរសមានសិទ្ធិ និងអាទិភាពស្មើគ្នា ដែលមានន័យថា ស្ត្រីក៏ធ្វើការ បុរសក៏ធ្វើការ។ ភាពឯករាជ្យរៀងៗខ្លួនរបស់ប្រជាជនសកម្មបែបនេះ នឹងជំរុញសេដ្ឋកិច្ចជាតិឱ្យកាន់តែរីក ចម្រើនថែមទៀត។ ប៉ុន្តែទន្ទឹមនឹងការអនុវត្តសិទ្ធិស្មើគ្នារវាងបុរស និងស្ត្រី ក៏មានផងដែរនូវកង្វល់មួយចំនួន ដូចជាកង្វះពេលវេលាសម្រាប់ថែទាំកូនតូចៗជាដើម។ ត្រង់ចំណុចនេះ រាជរដ្ឋាភិបាលក៏បាន និងកំពុងដោះស្រាយដោយធ្វើយ៉ាងណាអាចរក្សាបានទាំងកំណើនសេដ្ឋកិច្ចតាមរយៈការងារ និងធនធានមនុស្សរបស់កម្ពុជាទៅថ្ងៃខាងមុខផងដែរ។

ក្នុងឱកាសអញ្ជើញជួបសំណេះសំណាលជាមួយកម្មករនិយោជិតជាង១,២ម៉ឺននាក់នៅខេត្តកំពង់​ចាម នាព្រឹកថ្ងៃទី ២៥ ខែតុលា ឆ្នាំ២០២៣ សម្ដេចមហាបវរធិបតី ហ៊ុន ម៉ាណែត បានមានប្រសាសន៍ឱ្យដឹងពីការចាប់ផ្ដើមរៀបចំដាក់ចេញនូវផែនការមតេ្តយ្យ និងទារកដ្ឋាន។

សម្ដេចធិបតីបានគូសបញ្ជាក់ថា បច្ចុប្បន្ននេះឪពុកម្ដាយកាន់តែរវល់ជាមួយការងាររៀងខ្លួន ដើម្បីជួយគ្នារកចំណូលចូលគ្រួសារ។ វាជារឿងល្អហើយសម្រាប់សេដ្ឋកិច្ចគ្រួសារនីមួយៗ ប៉ុន្តែវានឹងប៉ះពាល់ដល់កុមារប្រសិនបើរដ្ឋាភិបាលមិនមានវិធានការច្បាស់លាស់។

សម្ដេចធិបតីបានមានប្រសាសន៍ផងដែរថា៖

«កូនជាអនាគតប្រទេសរបស់យើង បងប្អូន​គិតគូពីកូន រដ្ឋាភិបាលត្រូវដោះ​ស្រាយនូវកង្វល់នេះ។ កន្លងមក រាប់ពីចាប់​កំណើតរហូត​ដល់អាយុ​២ឆ្នាំ ​រដ្ឋាភិបាល​បង្កើតនូវកម្មវិធីផ្ដល់អាហារូបត្ថម្ភ ផ្ដល់សាច់ប្រាក់ផ្សេងៗជូន។»

យ៉ាងណាមិញ ទាំងនេះជាការប្ដេជ្ញាចិត្តរបស់រាជរដ្ឋាភិបាលក្នុងការ អនុវត្តសិទ្ធរបស់ប្រជាជនផង និងរក្សាកំណើនសេដ្ឋកិច្ចរបស់ជាតិផង។  

គួរបញ្ជាក់ថា ទារកដ្ឋានគឺជាទីតាំងដែលឪពុកម្ដាយ អាចយកកូនទៅផ្ញើរក្នុងអំឡុងពេលដែលខ្លួនជាប់បំពេញការងារ។ កុមារដែលត្រូវបានផ្ញើនៅទារកដ្ឋានគឺនឹងទទួលបានការមើលថែពីបុគ្គលិកជំនាញ ដែលត្រូវទៅតាមស្តង់ដារអភិវឌ្ឍន៍របស់កុមារ។

មិនត្រឹមតែប៉ុណ្ណោះ ទារកដ្ឋានអាចធានាបាននូវសុវត្ថិភាព និងការរីកចម្រើនតាមដំណាក់កាល អាយុរបស់កុមារ ហើយដែលការមើលថែកុមារតាមរបៀបនេះនឹងជំរុញឱ្យកុមារលូតលាស់បានល្អ មានភាពក្លាហាន មានការអភិវឌ្ឍ​ពុទ្ធិ​បញ្ញា ដើម្បីក្លាយជាធនធានដ៏មានសក្កានុពលសម្រាប់​ថ្ងៃ​អនាគត។

បច្ចុប្បន្ននេះ កម្ពុជាមានទារកដ្ឋាននៅក្នុងខេត្តកំពង់ស្ពឺ ជាខេត្តអាទិភាពដោយសារតែ​ប្រជាជន​ភាគច្រើនជាកម្មករ កម្មការិនីរោងចក្រ ដែលមមាញឹកជាមួយការងារ។ រដ្ឋាភិបាលគ្រោងនឹងបង្កើត បន្ថែមទៀត នូវទីតាំងទារកដ្ឋានសម្រាប់ខេត្តផ្សេង ជាពិសេសតំបន់ទីប្រជុំជន និងក្រុងភ្នំពេញតែ​ម្ដង៕