ស្វាយរៀង ៖ អាចនិយាយបានថា ជាការបំបែកកំណត់ត្រាថ្មីល្អផ្តាច់គេក្នុងឆ្នាំ២០២៥​ ដែលខេត្តស្វាយរៀងបានទាក់ទាញគម្រោងវិនិយោគយ៉ាងសន្ធឹកសន្ធាប់រហូតដល់ ១៣៩គម្រោង ជាមួយទំហំទុនសរុបជាង ១ ២០០លានដុល្លារអាម៉េរិក និងអាចបង្កើតឱកាសការងារសម្រាប់ប្រជាពលរដ្ឋរាប់ម៉ឺនកន្លែង។

យោងតាមរបាយការណ៍ក្រុមប្រឹក្សាអភិវឌ្ឍន៍កម្ពុជា (CDC) ចេញផ្សាយនៅដើម ខែមករា ឆ្នាំ២០២៦ នេះបានឱ្យដឹងថា ស្វាយរៀង ជាខេត្តដែលទទួលបានទុនវិនិយោគច្រើនជាងខេត្តផ្សេងៗទៀត ដោយក្នុងរយៈពេលពេញមួយឆ្នាំ២០២៥ ទទួលបានទុនវិនិយោគសរុបចំនួនជាង ១២០០លានដុល្លារសហរដ្ឋអាម៉េរិក ដែលគម្រោងទាំងនោះរួមមានដូចជា គម្រោងវិនិយោគសណ្ឋាគារលំដាប់ផ្កាយ៥ គម្រោងរោងចក្រផលិតបរិក្ខាពេទ្យ គម្រោងពង្រីករោងចក្រវាយណភណ្ឌកាត់ដេរ និងគម្រោងវិនិយោគបង្កើតរោងចក្រផលិតសំបកកង់រថយន្តសម្រាប់នាំចេញជាដើម ខណៈដែលគម្រោងមួយចំនួនស្ថិតនៅក្នុងតំបន់សេដ្ឋកិច្ចពិសេស ហើយខ្លះទៀតដាក់ទីតាំងនៅក្រៅតំបន់សេដ្ឋកិច្ចពិសេស។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានមានប្រសាសន៍ថា ក្រោយរាជរដ្ឋាភិបាលជំរុញឱ្យមានការបង្កើតតំបន់សេដ្ឋកិច្ចពិសេសក្នុងខេត្តជាប់ព្រំដែន ក៏ដូចជាបង្កើនកិច្ចសហប្រតិបត្តិការជាមួយប្រទេសជិតខាង បានជំរុញឱ្យវិនិយោគិនបរទេសមានភាពជឿជាក់ មើលឃើញពីឱកាសចំណេញ និងចូលទៅបណ្តាក់ទុននៅទីនោះជាហូរហែ ជាពិសេស ក្នុងឆ្នាំ២០២៥ តែម្ដង។

អ្នកឧកញ៉ាបានបញ្ជាក់យ៉ាងដូច្នេះថា ៖

«ដល់ចឹងទៅយើងឃើញថា លំហូរវិនិយោគចូលទៅខេត្តស្វាយរៀងមានច្រើន ដូចជា រោងចក្រផលិតសំបកកង់រថយន្ត គ្រឿងបង្គំ និងរោងចក្រកាត់ដេរសម្រាប់នាំចេញតាមច្រកនៅកំពង់ផែប្រទេសវៀតណាម ដើម្បីបន្តចេញទៅទីផ្សារអន្តរជាតិនាំគ្នាទៅច្រើន»។

អ្នកឧកញ៉ាបន្តថា វិនិយោគិនទាំងក្នុង និងក្រៅប្រទេស បានសំឡឹងឃើញខេត្តស្វាយរៀងជាទីតាំងមានសក្តានុពលវិនិយោគលើវិស័យផ្សេងៗជាច្រើន ដោយសារលក្ខខណ្ឌភូមិសាស្រ្តមានភាពអំណោយផល និងមានវត្ថុធាតុដើមផ្សេងៗជាច្រើនងាយស្រួលទាំងការផ្គត់ផ្គង់សង្វាក់ផលិតកម្ម ហើយងាយស្រួលទាំងការនាំចេញផលិតផលក្រោយការផលិត។

ស្រដៀងគ្នានេះដែរ លោកបណ្ឌិត ជ័យ តិច អ្នកវិភាគសេដ្ឋកិច្ចបានមើលឃើញថា ស្វាយរៀង ជាខេត្តមានសក្តានុពលវិនិយោគលើវិស័យបដិសណ្ឋារកិច្ច វាយនភណ្ឌកាត់ដេរ និងកម្មន្តសាល ក៏ដូចជា រោងចក្រផលិតគ្រឿងបង្គំ និងផលិតសំបកង់រថយន្តជាដើម។

លោកបណ្ឌិតបញ្ជាក់ថា ៖

«ភាពទាក់ទាញរបស់ខេត្តស្វាយរៀង ដោយសារតែខេត្តនេះមានលក្ខខណ្ឌល្អក្នុងការដឹកជញ្ជូន និងងាយស្រួលភ្ជាប់ទៅនឹងប្រទេសវៀតណាម ….មានកំពង់ផែននៅសៃហ្គន…. ដែលងាយស្រួលដឹកជញ្ជូនពីស្វាយ ទៅច្រកសមុទ្រ និងចេញទៅទីផ្សារអន្តរជាតិតែម្ដង»។

សូមជម្រាប់ថា តាមរបាយការណ៍ក្រុមប្រឹក្សាអភិវឌ្ឍន៍កម្ពុជា បានឱ្យដឹងថា ក្នុងឆ្នាំ២០២៥ កម្ពុជាបានចុះបញ្ជីគម្រោងវិនិយោគសរុបចំនួន ៦៣០ មានទំហំទុនវិនិយោគសរុបប្រមាណជាង ១០ ០០០លានដុល្លារអាម៉េរិក និងអាចបង្កើតការងារបានប្រមាណ ៤៣៨ពាន់កន្លែង។ ជាការកត់សម្គាល់ ការចុះបញ្ជីគម្រោងវិនិយោគមានការកើនឡើងចំនួន ២១៦គម្រោង ស្មើនឹង ៥២% ខណៈទំហំទុនវិនិយោគមានការកើនឡើងប្រមាណ ៣០០០លានដុល្លារអាម៉េរិក ស្មើនឹង ៤៥% ធៀបនឹងរយៈពេលដូចគ្នាក្នុងឆ្នាំ២០២៤ ដែលជាកំណត់ត្រាថ្មីមួយទៀតនៃការចុះបញ្ជីគម្រោងវិនិយោគនៅកម្ពុជាក្នុងឆ្នាំ២០២៥៕