ភ្នំពេញ ៖ មន្រ្តី​អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានប្រាប់ឱ្យដឹងថា គិតត្រឹមថ្ងៃទី១០ ខែធ្នូ ឆ្នាំ២០២៣ មានយុវជន និងយុវនារីជាង ១ម៉ឺននាក់ នៅទូទាំងប្រទេស​ ​​បានចុះឈ្មោះចូលរៀនវគ្គបណ្តុះបណ្តាលជំនាញវិជ្ជាជីវៈ និងប​ច្ចេកទេស។

លោក កត្តា អ៊ន អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានប្រាប់ឱ្យដឹងនៅថ្ងៃទី១១ ខែធ្នូ ឆ្នាំ២០២៣ ​ថា ​មានយុវជន និងយុវនារីចំនួន​ ១១ ៦១០ នាក់ហើយ ដែល​មកពីគ្រួសារ​ក្រីក្រ និងគ្រួសារងាយរងហានិភ័យ ​បានចុះឈ្មោះចូលរៀនវគ្គបណ្តុះ​បណ្តាលជំនាញវិជ្ជាជីវៈ និងបច្ចេកទេស នៅទូទាំងប្រទេស។

លោកបានបន្ថែមថា អ្នកចុះឈ្មោះសរុបមានចំនួន ១១ ៦១០នាក់ ក្នុងនោះមាន​ស្រីចំនួន​ ៤០០១នាក់ ដែល​មកពី​រាជធានីភ្នំពេញចំនួន ៥ ១១៤ នាក់ (ស្រី ១ ៦៥៧ នាក់), ខេត្ត​បាត់ដំបង ចំនួន១ ២០៣ នាក់ (ស្រី ៥៦៧នាក់), សៀមរាប ៧៣៦នាក់ (ស្រី ១៥៥នាក់), ពោធិ៍សាត់ ៤១៥នាក់ (ស្រី ២០៨នាក់), ព្រះសីហនុ ៤១១នាក់ (ស្រី ១៣៥នាក់) និងបណ្ដាខេត្តផ្សេងៗចំនួន ៣ ៧៣១នាក់ (ស្រី ១២៧៩នាក់)។

លោក កត្តា អ៊ន ​បានបញ្ជាក់ថា ៖ «យើងឃើញថា កម្រិតនៃការចាប់អារម្មណ៍របស់យុវជនទូទាំងប្រទេស ​និងការចុះឈ្មោះចូ​លរៀនពីសំណាក់យុវជនរបស់យើងមានចំនួនកើនឡើងជារៀងរាល់ថ្ងៃ ដែលនេះជាដំណើរមួយឆ្ពោះទៅមុខបានល្អ ដោ​យ​យើងសង្ឃឹមថា យុវជនយើងនឹងបន្តចុះឈ្មោះបន្ថែមទៀតនៅគ្រប់ទីតាំងទាំងអស់ទូទាំងរាជធានីខេត្ត»។

បើតាម​អ្នកនាំពាក្យ​ដដែលេនះបានឱ្យដឹង​ថា តាម​វិស័យនានាដែល​យុវជន​យុវនារី​បាន​ចុះឈ្មោះរៀនរួមមាន ៖ វិស័យសំណង់សរុបមានចំនួន ១ ៦១៩នាក់ (ស្រី ២២៦នាក់), អគ្គិសនី និងថាមពល ៤៥៩នាក់ (ស្រី ៤៩នាក់), អេឡិចត្រូនិក ៣០៩នាក់ (ស្រី ៤៤នាក់), កម្មន្តសាល ៧៩នាក់ (ស្រី ៥នាក់), មេកានិចទូទៅ/មេកានិចរថយន្ត ១៧០០នាក់ (ស្រី ៨៤នាក់), ធុរកិច្ច និងព័ត៌មានវិទ្យា ៣៧៧៥នាក់ (ស្រី ១៩៨២នាក់)។ វិស័យសេវាកម្ម ៦២៧នាក់ (ស្រី ៥៤០នាក់), បរិក្ខារត្រជាក់ និងកម្តៅ ១៧២២នាក់ (ស្រី ៧៥នាក់), ទេសចរណ៍ ៧១៨នាក់ (ស្រី ៥៣៤នាក់), និងកសិកម្ម និងកសិ-ឧស្សាហកម្ម ៦០២នាក់ (ស្រី ៤៦២នាក់)។ ដោយឡែក សម្រាប់ការបើកវគ្គបណ្តុះបណ្តាល លោក កត្តា អ៊ន បានបញ្ជាក់ថា គឺមិនទាន់ចាប់ផ្តើមនៅឡើយទេ ។

លោក កត្តា អ៊ន បានបញ្ជាក់ថា ៖

«ខ្ញុំសូមលើកទឹកចិត្តដល់យុវជននៅទូទាំងប្រទេស ទាំងយុវជនមកពីគ្រួសារក្រីក្រ និងគ្រួ​សារងាយរងហានិភ័យ ទាំងយុវជន និងយុវនារី​ដែលកំពុងធ្វើការនៅតាមរោងក្រសហគ្រាសនានា សូមពិចារណាចាប់យ​កឱកាសដ៏ល្អនេះ ដែលឱកាសមាស ដែលរដ្ឋាភិបាលបានផ្តល់យុវជនយើង ក្នុងការបណ្តុះបណ្តាលជំនាញវិជ្ជាជីវៈដល់យុវ​ជនឱ្យមានជំនាញមួយច្បាស់លាស់នៅក្នុងជីវិត ដើម្បីអាចទទួលបានការងារមួយសមរម្យ និងមានស្ថិរភាពប្រាក់ក្នុងការទ្រទ្រ​ង់ជីវភាពគ្រួសារ​ និងរួមចំណែកក្នុងការអភិវឌ្ឍប្រទេសជាតិ»។

ទាក់ទងនឹង​រឿងនេះ​ដែរ​ លោក អាត់ ធន ប្រធាន​សហភាព​ការងារ​កម្ពុជា ​បានមើលឃើញថា គោលនយោបាយបណ្តុះប ណ្តា​លជំនាញវិជ្ជាជីវៈ​ និងបច្ចេកទេសនេះ មានសារៈសំខាន់ណាស់ សម្រាប់កម្លាំងពលកម្មបច្ចុប្បន្ន ខណៈកម្ពុជានៅមានភា​ពខ្វះខាតពលកម្មជំនាញនៅឡើយ។ កន្លងមកសាលាបង្រៀនជំនាញវិជ្ជាជីវៈ និងបច្ចេកនានា មានត្រឹមខ្នាតតូច​ ខណៈដែលការរៀនត្រូវបង់ប្រាក់ច្រើន។

លោក អាត់ ធន់ បានថ្លែងថា ៖

«ខ្ញុំគិតថា នេះជាឱកាសល្អហើយ សម្រាប់យុវជនយើងក្នុងការគិតគូរពង្រឹងសមត្ថភាពខ្លួនឯងបន្ថែមទៀត ជាពិសេសឱកាសចាប់យកជំនាញបច្ចេកទេសសំខាន់ៗ ដែលទីផ្សារការងារកំពុងតែមានតម្រូវការ ព្រោះថា នៅពេលដែលយើងមានជំនាញមួយច្បាស់លាស់ យើងមានអាទិភាពជាងអ្នកដទៃក្នុងការទទួលបានការងារដែលមានប្រា​ក់​បៀវត្សខ្ពស់»។

សូមរម្លឹកថា កាលពីថ្ងៃទី១៤ ខែ​វិច្ឆិកា ឆ្នាំ២០២៣ សម្ដេចនាយករដ្ឋមន្រ្តី​ ហ៊ុន ម៉ាណែត ​បានប្រកាសដាក់ឱ្យអនុវត្តកម្មវិធីបណ្តុះបណ្តាលជំនាញបច្ចេកទេសវិជ្ជាជីវៈ ដល់យុវជន​មកពីគ្រួសារក្រីក្រ និងគ្រួសារងាយរងហានិភ័យនៅទូទាំងប្រទេស ចំ​នួ​នប្រមាណ​ ១.៥លាននាក់ គឺជាអាទិភាពមួយក្នុងចំណោមអនុសាសន៍ជាអាទិភាពទាំង ៦ចំណុចរបស់​នា​យករដ្ឋមន្ត្រី ក្នុងវិស័យការងារ និងបណ្តុះបណ្តាលបច្ចេកទេស វិជ្ជាជីវៈ។

ទាក់ទងនឹង​​ការបណ្តុះបណ្តាលវិជ្ជាជីវៈនេះដែរ ឯកឧត្តម ហេង សួរ រដ្ឋមន្រ្តី​ក្រសួងការងារ ​ក៏បានថ្លែងក្នុងពិធីចែកវិញ្ញាបនបត្រវិជ្ជាជីវៈដល់យុវជននៃមជ្ឈមណ្ឌលបណ្តុះបណ្តាលវិជ្ជាជីវៈ និងមុខរបររបស់អង្គការមិត្តសំឡាញ់នា​ថ្ងៃទី៧ ខែធ្នូ កន្លងទៅ​​ថា យុវជនដែលធ្លាក់បាក់ឌុប ឬឌីប្លូម កុំ​អស់សង្ឃឹម​ គឺក្រសួងនឹងប្រើភាពបត់បែនដើម្បីជួយយុវជនឱ្យមានជំនាញវិជ្ជាជីវៈផ្ទាល់ខ្លួន។​

លោក​បានថ្លែងថា ៖

«ក្រសួងការងារនឹងខិតខំធ្វើម៉េចផ្តល់នូវ​ជម្រើស​បត់បែនជូនក្មួយៗ ទោះបីជាក្មួយៗមិនមាន​សញ្ញាបត្របាក់ឌុប មិនមានសញ្ញាបត្រឌីប្លូម ក៏ប៉ុន្តែអនាគតក្មួយៗដែលស្រលាញ់នូវ​ការអប់រំ គឺមិនទាល់នោះទេ គឺក្មួយៗអាចចាប់​ផ្តើម​ចេញពីសញ្ញាបត្រជំនាញ​ដែលក្មួយៗមាននៅថ្ងៃនេះ ហើយចេញ​ធ្វើការ ហើយក្មួយៗចង់បន្តទៀត ក្រសួង​មាន​ផ្លូវ​ មានយន្តការសម្រាប់​ឱ្យក្មួយៗអាចបន្តឡើងបន្តិចម្តងៗ​ផងដែរ​»៕

អត្ថបទ (CPA) : វណ្ណ សុជាតា