ភ្នំពេញ ៖​ ក្នុ​ងរយៈពេលប៉ុន្មានឆ្នាំចុងក្រោយនេះ ខេត្ត​តាកែវ ចាប់ផ្ដើម​មានសក្ដានុពលក្នុងការទាក់ទាញ​គម្រោងវិនិយោគលើវិស័យឧស្សាហកម្ម​ជា​បន្តបន្ទាប់ ជាក់ស្ដែង នៅ​ក្នុងឆ្នាំ២០២៥​កន្លងទៅនេះ ខេត្ត​ភាគខាង​ត្បូងរាជធានីភ្នំពេញមួយនេះ បានទទួលការអនុម័ត​គម្រោងវិនិយោគ​សរុប​ចំនួន៦៤​គម្រោង ដែលមានកំណើន​ខ្ពស់​ធៀបនឹង​ឆ្នាំ២០២៤​ ។​

ឯកឧត្តម វុី សំណាង អភិបាល​នៃគណៈអភិបាលខេត្ត​តាកែវបានមានប្រសាសន៍ថា ក្នុងឆ្នាំ២០២៥កន្លងទៅ​ គម្រោង​វិនិយោគបង្កើត​រោងចក្រ​ក្នុង​ខេត្ត​តាកែវ​ តាមរយៈការចុះបញ្ជីនៅ​ក្រុមប្រឹក្សាអភិវឌ្ឍន៍កម្ពុជា​មានចំនួន ៤៤ក្រុមហ៊ុន​ បើធៀបនឹងឆ្នាំ២០២៤ មានការកើនឡើង​១២០ភាគរយ ។ ដោយឡែក ​អនុគណៈកម្មការ​វិនិយោគ​ខេត្តតាកែវ ក៏បាន​ចុះបញ្ជី​គម្រោង​វិនិយោគ​មានចំនួន​៥១ក្រុមហ៊ុន​ផងដែរនិងមានកំណើន​រហូតដល់ ២៩២ភាគរយ ។

ឯកឧត្ត​ម​បន្តថា លទ្ធផលទាំង​អស់នេះ គឺកើត​ចេញពីការ​ខិត​ខំប្រឹង​ប្រែងរបស់រាជរដ្ឋាភិបាល​នីតិកាលពី៧ នៃរដ្ឋសភា ក្នុងការ​ថែរក្សា​សន្តិភាព ស្ថិរភាព​នយោបាយ កា​រថែរក្សា​សន្តិសុខសុវត្ថិភាព​ ផ្ដល់​ឱកាស​ដល់​អ្នកវិនិយោគ​គ្រប់ជាតិសាសន៍ ក្នុងការ​បណ្ដាក់ទុនវិនិយោគនៅលើទឹកដី​នៃព្រះរាជាណាចក្រកម្ពុជា ។

ជាការកត់សម្គាល់​ ក្រោយសម្ដេចមហា​បវរធិបតី​ ហ៊ុន​ ម៉ាណែត បានដាក់គោលនយោបាយជំរុញឱ្យ​ថ្នាក់ដឹកនាំ​តាមខេត្ត​នានា​​ប្រកួត​ប្រជែង​ទាក់ទាញ​វិនិយោគិនចូលទៅកាន់ខេត្តរបស់ខ្លួន អភិបាលខេត្ត​និងថ្នាក់​ដឹកនាំខេត្ត​តាកែវ បានចេញទស្សនកិច្ច​នៅក្រៅប្រទេស​ ជាពិសេស​ប្រទេស​ចិន ដើម្បីផ្សព្វផ្សាយពីសក្ដានុពល និងទាក់ទាញ​វិនិយោគិនមក​បណ្ដាក់ទុនវិនិយោគនៅខេត្ត​តាកែវ ។ ជាលទ្ធផល​ខេត្ត​ដែលសំបូរអ្នកផលិតស្រូវនៅកម្ពុជា បានទទួលការ​វិនិយោគ​លើវិស័យឧស្សាហកម្មថ្មីៗ​ដោយបង្កើតជារោងចក្រ​ ផ្ដល់ការងារ​ដល់ពលរដ្ឋ​ក្នុងមូលដ្ឋាន ជាមួយប្រាក់ចំណូលសមរម្យ​សម្រាប់ផ្គត់ផ្គង់ជីវភាព​គ្រួសារ​ ។

អ្នកជំនាញអចលនទ្រព្យ​បានមើលឃើញថា ចាប់តាំងពី​មានគម្រោង​អភិវឌ្ឍន៍​អាកាសយានដ្ឋានអន្តរជាតិតេជោ ដែលមានទីតាំង​ស្ថិតស្រុកកណ្ដាលស្ទឹង ខេត្តកណ្ដាល និងស្រុក​បាទី ខេត្ត​តាកែវ តំបន់​តាមបណ្ដោយផ្លូវជាតិលេខ២ ក្នុងនោះមានខេត្តកែវផងដែរ មានការ​ចាប់អារម្មណ៍ និងទាក់ទាញគម្រោង​វិនិយោគ​ថ្មីៗ ជាពិសេស​ឧស្សាហកម្ម រោងចក្រ សហគ្រាស ដែលធ្វើឱ្យមានតម្រូវការប្រើប្រាស់​ដីធ្លីសម្រាប់សង់​រោងចក្រ និងសាងសង់ឃ្លាំង​ស្តុកទំនិញ ។​

បើតាមអ្នកស្រី អាន សុធីតា ​អគ្គនាយិកា​ក្រុមហ៊ុនអចលនទ្រព្យ​ PropNex Cambodia បានលើកឡើងថា​ តំបន់ជុំវិញ​ព្រលានយន្តហោះអន្តរជាតិ​តេជោ​ នឹង​មានសក្ដានុពលបន្ថែម ជាពិសេ​សលើ​វិស័យឧស្សាហកម្ម​ ព្រោះ​តំបន់​នេះមានការ​សាងសង់​ហេដ្ឋារចនាសម្ព័ន្ធថ្មី​ៗ ដូចជា ផ្លូវ ភ្លើង និងទឹក​ ដែលមានភាពងាយស្រួល​ និងសម្រួលដល់ការ​វិនិយោគក្នុងវិស័យនេះ​ ។​ សម្រាប់​តំបន់ដែលនៅ​ឆ្ងាយបន្តិច​ អាច​មានសក្ដានុពលទៅលើវិស័យលំនៅឋាន ជាក់ស្ដែង​ តំបន់ជុំវិញនេះ ចាប់មានការ​សាងសង់​លំនៅឋាន​សម្រាប់ផ្គត់ផ្គង់លើទីផ្សារ​តាំងពីព្រលានយន្តហោះមិនទាន់ធ្វើ​ប្រតិបត្តិការ​ម្ល៉េះ ។

គួររម្លឹកថា លោក​អ្នកឧកញ៉ា ពុង ឃាវសែ ប្រធានក្រុម​ប្រឹក្សាភិបាលនៃ​ក្រុមហ៊ុន​ OCIC បានបង្ហើបពីគម្រោង​សាងសង់​ផ្លូវទឹក​ថ្មីមួយ​តភ្ជាប់ពីអាកាស​យានដ្ឋានអន្តរជាតិតេជោទៅកាន់ទន្លេបាសាក់ និងតភ្ជាប់ទៅកាន់គម្រោងព្រែកជីកហ្វូណ​នតេជោ ។ តាមរយៈផ្លូវទឹកថ្មីនេះ នឹ​ងធ្វើឱ្យតំបន់​ជុំវិញព្រលានយន្តហោះតេជោ​កាន់តែទាក់ទាញ ក្នុងនោះស្រុក​បាទីខេត្ត​តាកែវ​ ក៏ជា​តំបន់ដែលនឹងទាក់ទាញបានការ​វិនិយោគថ្មីៗបន្ថែមទៀត ជាពិសេស រោងចក្រ​ឧស្សាហកម្ម និងលំនៅឋាន ៕