បរទេស ៖ យោងតាមប្រភពព័ត៌មានពីនីគីអាស៊ី រាយការណ៍ថា ថៃអាចប្រឈមមុខនឹងការខាតបង់ប្រមាណ ២ ពាន់លានដុល្លារនៅក្នុងការធ្វើពាណិជ្ជកម្មជាមួយកម្ពុជា​ ប្រសិនបើភាគីទាំងពីរមិនអាចរកដំណោះស្រាយ និងឈានទៅដល់ការបើកច្រកព្រំដែនអន្តរជាតិ កម្ពុជា-ថៃ រហូតដល់ដំណាច់ឆ្នាំ២០២៥នេះ។

កាលពីថ្ងៃអង្គារសប្ដាហ៍នេះ គណៈរដ្ឋមន្ត្រីថៃបានអនុម័តផែនការផ្តល់សំណងចំនួន ១០ លានបាត (៣០៩ ០០០ ដុល្លារ) ដល់គ្រួសារទាហាននីមួយៗដែលបានស្លាប់ និង ៨ លានបាតដល់គ្រួសារជនស៊ីវិលដែលបានស្លាប់។ ជម្លោះ​ព្រំដែនរវាងកម្ពុជា​-ថៃ បាន​ផ្ទុះ​ឡើង​នៅ​ថ្ងៃ​ទី​២៤ ខែ​កក្កដា ហើយបទ​ឈប់​បាញ់​បាន​ចូល​ជា​ធរមាននៅរយៈពេល​៥ថ្ងៃបន្តាប់ ប៉ុន្តែ​ការ​ប៉ះ​ទង្គិច និងភាពតានតឹងនៅតែបន្តអូសបន្លាយរហូតមកដល់ពេលបច្ចុប្បន្នដែលភាគីថៃនៅតែបំពានឈ្លានពានមកលើដែនដីកម្ពុជា។

​យោង​តាម​ការ​ប៉ាន់​ប្រមាណ​ដោយ​រដ្ឋាភិបាល​ថៃបានឲ្យដឹងថា ជម្លោះ​នេះ​បាន​បង្ក​ឱ្យ​មាន​ការ​ខូច​ខាត​ផ្ទាល់​យ៉ាង​ហោច​ណាស់​ ១០​ពាន់​លាន​បាត ខណៈដែលក្រុមមន្ត្រីកំពុងរៀបចំថវិកាចំនួន ២៥ ពាន់លានបាត ដើម្បីកាត់បន្ថយផលប៉ះពាល់សេដ្ឋកិច្ច។ ទន្ទឹមនឹងនេះ ភាគី​កម្ពុជា​ក៏​រង​ការ​ខូចខាត​ផងដែរ ដោយសម្ដេចបវវរធិបតី ហ៊ុន ម៉ាណែត បានអំពាវនាវដល់ស្ថាប័នហិរញ្ញវត្ថុជួយសម្រាលបន្ទុកហិរញ្ញវត្ថុដល់កងកម្លាំងប្រដាប់អាវុធដែលបានពលីក្នុងប្រតិបត្តិការការពារបូរណភាពទឹកដី ក៏ដូចជាគ្រួសារអ្នកស្លាប់ របួស និងជនស៊ីវិល ដែលភៀសខ្លួនដោយសារសង្គ្រាម ដែលក្នុងនោះមានធនាគារ​ជា​ច្រើន​បាន​ប្រកាសពីការ​លុបបំណុលរបស់គ្រួសារយោធិនពលីចោលទាំងស្រុង។

លោក Somkiat Tangkitvanich ប្រធានវិទ្យាស្ថានស្រាវជ្រាវអភិវឌ្ឍន៍ប្រទេសថៃ បានលើកឡើងថា ពាណិជ្ជកម្មរវាងថៃ និងកម្ពុជា ដែលពឹងផ្អែកលើការដឹកជញ្ជូនឆ្លងកាត់តាមផ្លូវគោកកំពុងធ្លាក់ចុះ ខណៈខ្សែសង្វាក់ផ្គត់ផ្គង់ត្រូវបានកាត់ផ្តាច់។

យោងតាមក្រសួងពាណិជ្ជកម្មថៃ បានឲ្យដឹងថា ការនាំចេញរបស់ប្រទេសថៃមកកម្ពុជាមានតម្លៃប្រហែល ៩,២ ពាន់លានដុល្លារកាលពីឆ្នាំមុន និងបានកើនឡើងប្រហែល ១៣ ដងក្នុងរយៈពេល ២០ ឆ្នាំកន្លងមកនេះ។ ប្រសិនបើច្រកព្រំដែននៅតែបិទរហូតដល់ដាច់ឆ្នាំនេះ សេដ្ឋកិច្ចថៃអាចនឹងខាតបង់ការនាំចេញមកកម្ពុជាក្នុងទំហំ ១,៨៥ ពាន់លានដុល្លារ។ ការនាំចេញដែលមានហានិភ័យសំខាន់ៗរួមមាន រថយន្ត គ្រឿងបន្លាស់រថយន្ត គ្រឿងម៉ាស៊ីន និងអាហារស្រស់ៗ ដូចជា បន្លែ ផ្លែឈើ និងទឹកដោះគោជាដើម ខណៈដែលកម្ពុជា​​កំពុង​ផ្អាក​ការ​នាំ​ចូល​ប្រេង​ឥន្ធនៈ និងហ្គាស​ផ្សេង​ទៀតពីថៃ។ មិនត្រឹមតែប៉ុណ្ណោះ ក្តី​បារម្ភ​មួយ​ទៀត​គឺ​ការ​បណ្ដេញ​ពលករ​ខ្មែរ​ចេញពីថៃ ខណៈដែលក្រុមហ៊ុន​ថៃជាច្រើន​ពឹងផ្អែក​លើកម្លាំងការងាររបស់ពលរដ្ឋខ្មែរ​នៅក្នុង​ការដ្ឋាន​សំណង់ និង​កសិដ្ឋាន។

សូមជម្រាបថា ចាប់តាំងពីមានជម្លោះព្រំដែនរវាងប្រទេសកម្ពុជា-ថៃ ទាំងពីរមក ពលរដ្ឋខ្មែរជាង ៦០ ម៉ឺននាក់បានវិលត្រឡប់មកពីប្រទេសថៃវិញ ដោយគេប៉ាន់ប្រមាណាថា ចំនួន​ពលករ​ខ្មែរ​សរុប​នៅ​ប្រទេស​ថៃគិត​ទាំង​អ្នក​ដែល​មិន​មានលិខិតអនុញ្ញាត​​អាចមាន​ចំនួនលើស​ពី​១​លាន​នាក់ ហើយលំហូរចាកចេញរបស់ពលករខ្មែរទាំងនោះកំពុងក្លាយជា​ក្ដីព្រួយ​បារម្ភ​អំពី​កង្វះ​កម្លាំង​ពលកម្ម​នៅក្នុងប្រទេស៕