សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ព្រឹត្តិការណ៍កីឡាអាស៊ានប៉ារ៉ាហ្គេម លើកទី១២ នៅប្រទេសកម្ពុជា នឹងចាប់ផ្តើម ពីថ្ងៃទី ៣ ដល់ថ្ងៃទី ៩ ខែមិថុនា ឆ្នាំ២០២៣ខាងមុខ ដែលមានកីឡាចំនួន ១៤ ប្រភេទ គឺ១៣ ប្រភេទ ប្រកួតដណ្តើមមេដាយជាផ្លូវការ និង១ប្រភេទទៀត ជាការប្រកួតសម្តែង។ សម្រាប់ការធ្វើជាម្ចាស់ផ្ទះ កម្ពុជាបានត្រៀមខ្លួនរួចរាល់នៃការប្រកួតអាស៊ានប៉ារ៉ាហ្គេម ទាំងទៅលើការរៀបចំទីលានប្រកួត និងការចុះឈ្មោះអត្តពលិក ។ នេះបើតាមមន្ត្រីជំនាញគណៈកម្មាធិការជាតិរៀបចំការប្រកួតកីឡាអាស៊ានប៉ារ៉ាហ្គេម លើកទី១២ ឆ្នាំ២០២៣ (CAMAPGOC) នៅកម្ពុជា។
លោក យី វាសនា អគ្គលេខាធិការគណៈកម្មការជាតិប៉ារ៉ាឡាំពិកកម្ពុជា និងជាអគ្គលេខាធិការរង CAMSOC-CAMAPGOC បានឱ្យដឹងថា កម្ពុជាចាប់ផ្តើមបង្កើតប្រវត្តិសាស្ត្របន្តទៀតគឺ ការរៀបចំកីឡាសម្រាប់ជនពិការ ដែលមានប្រទេសពីតំបន់អាស៊ានទាំង១១ ចូលរួមប្រកួតប្រជែង។ ការប្រកួតអាស៊ានប៉ារ៉ាហ្គេមនេះ កម្ពុជាបានត្រៀមមន្ត្រីបច្ចេកទេសក្នុងស្រុក សម្រាប់រៀបចំប្រភេទកីឡាទាំង ១៤ ក្នុងព្រឹត្តិការណ៍នេះ ចំនួន៩០០នាក់ ហើយអ្នកស្ម័គ្រចិត្ត ដែលត្រូវទទួលភារកិច្ចបន្តពីស៊ីហ្គេម សម្រាប់ការប្រកួតអាស៊ានប៉ារ៉ាហ្គេមនេះ មានចំនួន ២៥០០ នាក់ រួមទាំងមន្ត្រីបច្ចេកទេសអន្តរជាតិ និងសហព័ន្ធកីឡាអាស៊ានទាំង ១១ ប្រទេស បូករួមទាំងទីម័រខាងកើត គឺមានចំនួនសរុបប្រមាណ ២៥០ នាក់បន្ថែមទៀត។
លោក យី វាសនា បានមានប្រសាសន៍ថា ៖
“រហូតដល់ពេលនេះបណ្តាប្រទេសអាស៊ានទាំង១១ បានចុះឈ្មោះអត្តពលិក និងប្រតិភូរបស់ខ្លួន រួចរាល់ហើយ ខណៈម្ចាស់ផ្ទះកម្ពុជាបានត្រៀមអត្តពលិក២៣៦នាក់ ក្នុងនោះកម្ពុជាមានកីឡាករ ១៦០នាក់ និងកីឡាការិនី ៧៦នាក់ និងមន្ត្រីបច្ចេកទេស ៦៤នាក់។ នេះជាកត្តាមួយដ៏ចាំបាច់ ដែលកម្ពុជាធ្វើជាម្ចាស់ផ្ទះ ហើយកម្ពុជាបាន ត្រៀមខ្លួនឱ្យបានល្អ ខណៈទីលានត្រូវបានរៀបចំរួចរាល់ស្របតាមស្តង់ដារ ដោយចំណាយទឹកប្រាក់សរុបប្រមាណ១លានដុល្លារអាមេរិក។”
ការប្រកួតកីឡាអាស៊ានប៉ារ៉ាហ្គេម លើកទី១២ ឆ្នាំ២០២៣ នៅកម្ពុជាមាន១៤ប្រភេទកីឡារួមមាន៖ អត្តពលកម្ម, វាយសី, ប៊ូស្យា, អុក, បាល់ទាត់(ម្ខាង ៥ នាក់), បាល់ទាត់(ម្ខាង ៧ នាក់), បាល់បោះពិការភ្នែក, យូដូ, លើកទម្ងន់, ហែលទឹក, វាយកូនឃ្លីលើតុ (បុរស-នារី), បាល់ទះអង្គុយ(បុរស-នារី), បាល់បោះជិះរទេះ(បុរស-នារី), និងកីឡាជនពិការអេឡិចត្រូនិក (ការប្រកួតសម្តែង)។
សូមបញ្ជាក់ថា ក្នុងព្រឹត្តិការណ៍អាស៊ានប៉ារ៉ាហ្គេមលើកទី១១ នៅទីក្រុង Solo ប្រទេសឥណ្ឌូណេស៊ី ក្នុងឆ្នាំ ២០២២ កម្ពុជាដណ្តើមបានមេដាយសរុបចំនួន ២៨ គឺមាស ៧ មេដាយប្រាក់១០ និងមេដាយសំរឹទ្ធ ១១ នៃប្រភេទ Boccia បាល់ទះអង្គុយបុរស បាល់បោះរទេះរុញនារី វាយកូនឃ្លីលើតុ អុក អត្តពលកម្ម និង ហែលទឹក។ ទោះបីជាយ៉ាងណាក្នុងចំណោមកីឡាប្រកួតដណ្តើមមេដាយជាផ្លូវការទាំង១៣ នៅមិនទាន់ដឹងច្បាស់ពីចំនួនវិញ្ញាសាច្បាស់លាស់នៅឡើយ។ កាលកីឡាអាស៊ានប៉ារ៉ាហ្គេមលើកទី១១ឆ្នាំ២០២២ នៅប្រទេសឥណ្ឌូណេស៊ីបានដាក់កីឡា១៤ ប្រភេទ ដែលមានវិញ្ញាសាចំនួន៤៥៥។
គណៈកម្មាធិការជាតិរៀបចំការប្រកួតកីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ បានប្រកាសជាផ្លូវការពីការមកហូបចុក-ស្នាក់ដោយឥតគិតថ្លៃ សម្រាប់ប្រតិភូអត្តពលិកអាស៊ីអាគ្នេយ៍ទាំងអស់ ដែលចូលរួមប្រកួតកីឡាស៊ីហ្គេម លើកទី៣២ និងអាស៊ានប៉ារ៉ាហ្គេម លើកទី១២ ឆ្នាំ២០២៣ ជាប្រវត្តិសាស្ត្រដំបូងរបស់ព្រះរាជាណាចក្រកម្ពុជា ក្នុងបំណងចម្បងជំរុញឱ្យព្រឹត្តិការណ៍កីឡាទាំងមូលនៅកម្ពុជាទទួលបានភាពកក់ក្តៅ និងជោគជ័យទាំងអស់គ្នា៕
Account
Security
Favourite Content