សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ឯកឧត្តមបណ្ឌិត គុណ ញឹម រដ្ឋមន្រ្តីប្រតិភូអមនាយករដ្ឋមន្រ្តី និងជាអគ្គនាយកនៃអគ្គនាយកដ្ឋានគយ និងរដ្ឋាករកម្ពុជា បានបញ្ជាក់ឱ្យដឹងជាថ្មីថា ទំនិញនាំចូលពីប្រទេសថៃមកប្រទេសកម្ពុជា នៅតែអាចនាំចូលធម្មតា ប៉ុន្តែចំពោះ ទំនិញដែលបានហាមឃាត់ រួមមានបន្លែ ផ្លែឈើ និងប្រេងឥន្ធនៈ ហ្គាស ។
នៅក្នុងឱកាសដឹកនាំកិច្ចប្រជុំផ្សព្វផ្សាយខ្លឹមសារនៃអនុក្រឹត្យលេខ ១៣៩ អនក្រ.បក ចុះថ្ងៃទី៨ ខែសីហា ឆ្នាំ២០២៥ ស្តីពីការដាក់ឱ្យអនុវត្តអត្រាពន្ធគយ លើទំនិញនាំចូលពីសហរដ្ឋអាមេរិក កាលពីថ្ងៃទី៨ ខែសីហា ឆ្នាំ២០២៥ ឯកឧត្តមបណ្ឌិត គុណ ញឹម បានបញ្ជាក់ថា អគ្គនាយកដ្ឋានគយ និងរដ្ឋាករកម្ពុជា កាលពីថ្ងៃទី១៦ ខែកក្កដា ឆ្នាំ២០២៥ ក៏បានធ្វើបច្ចុប្បន្នភាពនូវមុខទំនិញមានប្រភពដើមពីប្រទេសថៃ ដែលជាប់បំរាមនាំចូលមកកម្ពុជាដល់បណ្តាអាជីវករ និងពាណិជ្ជករ ធុរជន ក៏ដូចជាសាធារណជនឱ្យបានដឹងជាព័ត៌មាន។
ឯកឧត្តមបណ្ឌិត គុណ ញឹម បានគូសបញ្ជាក់ថា ទំនិញនាំចូលពីប្រទេសថៃ មកប្រទេសកម្ពុជានៅតែអាចនាំចូលបានជាធម្មតា ដោយហាមឃាត់តែបន្លែ ផ្លែឈើ និងប្រេងឥន្ធនៈ ប៉ុណ្ណោះ ពីព្រោះថាមកដល់ពេលនេះ គយនៅមិនទាន់បានទទួលការណែនាំបន្ថែមថា ទំនិញផ្សេងក្រៅពីទំនិញហាមឃាត់ទាំងនោះ ត្រូវហាមមិនឱ្យចូលមកកម្ពុជា ដូច្នេះ ក្រៅពីទំនិញទាំង៣ប្រភេទនោះ គឺនៅតែអាចនាំចូលធម្មតា។
ចំពោះតម្រាយផ្លូវ និងមធ្យោបាយដឹកជញ្ជូនទំនិញនាំចូលមកកម្ពុជា អាជីវករ/ពាណិជ្ជករ អាចប្រើប្រាស់មធ្យោបាយដឹកជញ្ជូនផ្សេងៗបានតាមមាត់ច្រកផ្លូវការនានា លើកលែងតែមាត់ច្រកព្រំដែនផ្លូវគោក កម្ពុជា-ថៃ ដែលត្រូវបានបិទជាឯកតោភាគីដោយយោធាថៃ ដោយទំនិញដែលដឹកពីថៃមកកម្ពុជា អាចមានពីរប្រភព ទី១៖ ទំនិញរបស់ថៃ និងទី២៖ ទំនិញរបស់ប្រទេសទី៣ ដូចជា៖ ចិន, កូរ៉េ, ជប៉ុន ដែលដឹកឆ្លងកាត់ប្រទេសថៃ ចូលមកកម្ពុជា តាមផ្លូវទឹក និងផ្លូវគោក។
សូមជម្រាបថា អគ្គនាយកដ្ឋានគយ និងរដ្ឋាករកម្ពុជា ធ្លាប់បានធ្វើបច្ចុប្បន្នភាពនូវមុខទំនិញ មានប្រភពដើមពីប្រទេសថៃ ដែលជាប់បំរាម នាំចូលមកកម្ពុជា ដល់បណ្តាអាជីវករ និងពាណិជ្ជករ ធុរជន និងសាធារណជន មានបន្លែ និងផ្លែឈើ ប្រេងឥន្ធនៈ និងឧស្ម័នឥន្ធនៈ ដែលមានដូចជា៖១- ប្រេងសាំង (Gasoline) ២- ប្រេងម៉ាស៊ូត (Diesel) ៣-ប្រេងសាំងយន្តហោះ (Jet-A1)៤- ប្រេងខ្មៅ (Fuel oil) និង ៥- ឧស្ម័នរាវសម្រាប់ដុត (LPG និង LNG) ។
ដោយឡែក មុខទំនិញផ្សេងទៀត ក្រៅពីមុខទំនិញខាងលើ មិនមែនជាកម្មវត្ថុនៃការហាមឃាត់ការនាំចូលទេ។ អាជីវករ/ពាណិជ្ជករ នៅបន្តនាំចូលបានជាធម្មតា ដោយបំពេញបែបបទ និងនីតិវិធីកំណត់ ដោយលិខិតបទដ្ឋានជាធរមាន៕
Account
Security
Favourite Content