ភ្នំពេញ៖ សហភាពអឺរ៉ុប(EU) បានប្តេជ្ញាផ្តល់ហិរញ្ញប្បទានប្រមាណ ១.៤ ពាន់លានអឺរ៉ូ ដើម្បីអនុវត្តយុទ្ធសាស្ត្រស្តីពីកិច្ចសហប្រតិបត្តិការអភិវឌ្ឍន៍ អឺរ៉ុប-កម្ពុជា សម្រាប់ឆ្នាំ២០២១-២០២៧ ខណៈរយៈពេល ៤ឆ្នាំកន្លងមក អឺរ៉ុបបានផ្តល់ ៩៩២លានអឺរ៉ូដល់កម្ពុជា។ ការផ្តល់ហិរញ្ញប្បទានរបស់សហភាពអឺរ៉ុប តាមរយៈយុទ្ធសាស្ត្រច្រកទ្វារសកល (Global Gateway Strategy) និងការផ្តួចផ្តើមក្រុមអឺរ៉ុប (Team European Initiatives) បានបង្ហាញពីការប្តេជ្ញាចិត្តខ្ពស់របស់សហភាពអឺរ៉ុបក្នុងការគាំទ្រដល់ការអភិវឌ្ឍរបស់កម្ពុជាក្រោមយុទ្ធសាស្ត្ររួមអឺរ៉ុប ។

សេចក្តីប្រកាសព័ត៌មានរួមស្តីពីកិច្ចប្រជុំកម្រិតខ្ពស់នៃយុទ្ធសាស្ត្ររួម កិច្ចសហប្រតិបត្តិការអភិវឌ្ឍន៍អឺរ៉ុបសម្រាប់កម្ពុជា ឆ្នាំ២០២១-២០២៧ និងយុទ្ធសាស្ត្រច្រកទ្វារសកលអឺរ៉ុបនាថ្ងៃទី១១ ខែវិច្ឆិកា ឆ្នាំ២០២៥ បានឱ្យដឹងថា ៖ ក្នុងអំឡុងឆ្នាំ២០២១-២០២៤ សហភាពអឺរ៉ុបបានផ្តល់ហិរញ្ញប្បទានសរុបចំនួន ៩៩២ លានដុល្លារអាម៉េរិក ដើម្បីជំរុញកំណើនបៃតង ឌីជីថលលូបនីយកម្ម និងការអភិវឌ្ឍប្រកបដោយ បរិយាបន្ន រួមទាំងសមាហរណកម្មក្នុងតំបន់អាស៊ាន តាមរយៈការវិនិយោគលើថាមពលប្រកបដោយចីរភាព ទំនើបកម្មហេដ្ឋារចនាសម្ព័ន្ធ ការអភិវឌ្ឍជំនាញ និងអភិបាលកិច្ច ។

ដោយឡែក សមិទ្ធផលជាក់ស្តែងរួមមាន គម្រោងផ្គត់ផ្គង់ទឹកស្អាតបាក់ខែង ដែលសម្រេចបាននូវការផ្គត់ផ្គង់តម្រូវការទឹកស្អាតបាន ១០០% ក្នុងរាជធានីភ្នំពេញនៅឆ្នាំ២០២៥, បំពង់បង្ហូរថ្មីប្រវែង ១.៩៥០ គីឡូម៉ែត្រ និងបណ្តាញប្រព័ន្ធទឹកស្អាតតភ្ជាប់ដល់គ្រួសារចំនួន ១១០ ០០០, ការផ្តល់អាហារូបករណ៍ជាង ១១៣ ០០០ កន្លែង និងឱកាសអាហារូបករណ៍ក្នុងវិស័យស្ទែម (STEM) ចំនួន ៥០០កន្លែងសម្រាប់យុវជន,វឌ្ឍនភាពក្នុងការស្តារ និងកែលម្អផ្លូវ ជនបទប្រវែង ១.១០០ គីឡូម៉ែត្រ, ការពង្រីកបណ្តាញអគ្គិសនីដល់ផ្ទះប្រជាពលរដ្ឋបាន ៩៥%, ការធ្លាក់ចុះនៃ ការដាច់ចរន្តអគ្គិសនី ៣០% នៅឆ្នាំ២០២៦, តម្លាភាពក្នុងអភិបាលកិច្ច និងការរីកចម្រើនក្នុងកិច្ចការការពារ បរិស្ថាន និងកសិកម្មបៃតង ។

ឯកឧត្តម ឈៀង យ៉ាណារ៉ា ទេសរដ្ឋមន្ត្រីទទួលបន្ទុកបេសកកម្មពិសេសអនុប្រធានទី២ នៃក្រុមប្រឹក្សាអភិវឌ្ឍន៍កម្ពុជា បានមានប្រសាសន៍ថា៖ កិច្ចប្រជុំកម្រិតខ្ពស់ស្តីពីយុទ្ធសាស្ត្ររួមស្តីពីកិច្ចសហប្រតិបត្តិការអភិវឌ្ឍន៍អឺរ៉ុបសម្រាប់កម្ពុជា ឆ្នាំ២០២១-២០២៧ និងយុទ្ធសាស្ត្រច្រកទ្វារសកលអឺរ៉ុប មានគោលដៅ ចម្បង គឺដើម្បីពិនិត្យ និងពិភាក្សាលើវឌ្ឍនភាពនៃការអនុវត្តយុទ្ធសាស្ត្ររួមស្តីពីកិច្ចសហប្រតិបត្តិការ អភិវឌ្ឍន៍អឺរ៉ុបសម្រាប់កម្ពុជា ឆ្នាំ២០២១-២០២៧ និងវឌ្ឍនភាពនៃកិច្ចសហប្រតិបត្តិការអភិវឌ្ឍន៍រវាងសហភាព អឺរ៉ុប និងរាជរដ្ឋាភិបាលកម្ពុជា ។

ឯកឧត្តមទេសរដ្ឋមន្ត្រី បានគូសបញ្ជាក់ថា៖

“យុទ្ធសាស្ត្ររួមអឺរ៉ុប (JES 2021-2027)និងយុទ្ធសាស្ត្រច្រកទ្វារសកល (Global Gateway Strategy) បានឆ្លុះបញ្ចាំង​ភាពជាដៃគូដ៏រឹងមាំនិងយូរអង្វែងរវាងកម្ពុជានិងសហភាពអឺរ៉ុប។ ក្របខ័ណ្ឌទាំងពីរនេះមានសង្គតិភាពជាមួយយុទ្ធសាស្ត្របញ្ចកោណរួមទាំងបង្ហាញ​ពីការប្តេជ្ញាចិត្តរួមគ្នាក្នុងការឆ្ពោះទៅការអភិវឌ្ឍប្រកបដោយបរិយាបន្នការអភិវឌ្ឍធនធានមនុ​ស្ស និងចីរភាពបរិស្ថាន ។ រាជរដ្ឋាភិបាលកម្ពុជា វាយតម្លៃខ្ពស់ចំពោះកិច្ចសហប្រតិបត្តិការដែលផ្អែកលើគោលការ​ណ៍ ដែលបន្តផ្តល់នូវលទ្ធផលជាក់ស្តែងដល់ប្រជាជនកម្ពុជានិងគាំទ្រលើមាគ៌ាឆ្ពោះទៅរកការអភិវឌ្ឍប្រកបដោយចីរភាពនិងភាពធន់ជាពិសេ​​សស្របពេលដែលកម្ពុជាកំពុងឈានទៅការចាកចេញពី ក្រុមប្រទេសមានការអភិវឌ្ឍតិចតួច”។

ឯកឧត្តម Igor Driesmans ឯកអគ្គរដ្ឋទូតសហភាពអឺរ៉ុបប្រចាំកម្ពុជា បានបញ្ជាក់ថា “យុទ្ធសាស្ត្ររួមអឺរ៉ុប និង យុទ្ធសាស្ត្រច្រកទ្វារសកល បង្ហាញពីការប្តេជ្ញាចិត្តរបស់ក្រុមអឺរ៉ុប (Team Europe) ក្នុងការជំរុញការអភិវឌ្ឍសង្គម-សេដ្ឋកិច្ចប្រកបដោយបរិយាបន្ន, ចីរភាព និងអព្យាក្រឹតអាកាសធាតុ ។ សហភាពអឺរ៉ុប មានការប្តេជ្ញាចិត្តខ្ពស់ ចំពោះភាពជាដៃគូដែលប្រកាន់ខ្ជាប់នូវអាទិភាពរួម,គណនេយ្យភាពទ្វេទិសនិងការសហ​ការរយៈពេលវែង ។ តាមរយៈ យុទ្ធសាស្ត្ររួមអឺរ៉ុប និងយុទ្ធសាស្ត្រច្រកទ្វារសកល សហភាពអឺរ៉ុបផ្តោតលើការចែករំលែកជំនាញរបស់អឺរ៉ុប និង ការតម្រឹមហិរញ្ញប្បទាន ដើម្បីគាំទ្រដល់ការអភិវឌ្ឍរបស់កម្ពុជាប្រកបដោយចីរភាព, ភាពធន់របស់ស្ថាប័ន និង វិបុលភាពប្រកបដោយបរិយាបន្ន” ។

គួរជម្រាបថា៖ កិច្ចប្រជុំកម្រិតខ្ពស់នេះមានការចូលរួមពីតំណាងជាន់ខ្ពស់មកពីក្រសួងស្ថាប័នរាជរដ្ឋាភិបាល​កម្ពុជាចំនួន ២៥រូប និងតំណាងជាន់ខ្ពស់ពីបណ្តាប្រទេសជា សមាជិកអឺរ៉ុប រួមមាន ឯកអគ្គរាជទូតនៃព្រះរាជាណាចក្របែលហ្សិក, ឯកអគ្គរដ្ឋទូតនៃសាធារណរដ្ឋឆែក,ឯកអគ្គរដ្ឋទូត នៃសាធារណរដ្ឋអៀរឡង់, អនុប្រធានបេសកកម្មនៃស្ថានទូតអាល្លឺម៉ង់ប្រចាំកម្ពុជា, ប្រធានទីភ្នាក់ងារស្វីសសម្រាប់ ការអភិវឌ្ឍ និងសហប្រតិបត្តិការប្រចាំកម្ពុជា (SDC), នាយិកាទីភ្នាក់ងារបារាំងសម្រាប់ការអភិវឌ្ឍប្រចាំកម្ពុជា (AFD), នាយកទីភ្នាក់ងារអាល្លឺម៉ង់សម្រាប់កិច្ចសហប្រតិបត្តិការអន្តរជាតិប្រចាំកម្ពុជា(GIZ), តំណាងធនាគារ អភិវឌ្ឍន៍អាល្លឺម៉ង់ប្រចាំកម្ពុជា (KW) និងតំណាងសភាពាណិជ្ជកម្មអឺរ៉ុបប្រចាំកម្ពុជា (Eurocham)៕