សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ឯកឧត្តម ស៊ាង ថៃ រដ្ឋលេខាធិការក្រសួងពាណិជ្ជកម្ម បានអញ្ជើញជាអធិបតីក្នុងកម្មវិធី “ផ្គូរផ្គងអាជីវកម្ម ដើម្បីជំរុញផលិតផលខ្មែរចូលផ្សារទំនើប និងម៉ាត ឆ្នាំ២០២៥” ដើម្បីពង្រឹង និងពង្រីកកិច្ចសហប្រតិបត្តិការដៃគូពាណិជ្ជកម្ម តាមរយៈការផ្សារភ្ជាប់ទំនាក់ទំនងរវាងផ្សារទំនើប ម៉ាត និងអ្នកផលិត អ្នកផ្គត់ផ្គង់ផលិតផលខ្មែរ ។
កម្មវិធីផ្គូរផ្គងនេះ មានការធ្វើបទបង្ហាញចែករំលែកបទពិសោធន៍ពីវាគ្មិនចំនួន៤ រូបមកពី ៖អគ្គនាយកដ្ឋានជំរុញពាណិជ្ជកម្មតំណាងផ្សារអ៊ីអន ជីបម៉ុង តំណាងក្រុមហ៊ុន អ៊ែមផល អាហ្រ្កូ ប្រូដាក់ ខូអិលធីឌី ផ្តោតសំខាន់លើការអភិវឌ្ឍជំរុញផលិតផលកម្ពុជា ស្វែងយល់អំពីបែបបទ នីតិវិធី និងលក្ខខណ្ឌនៃការនាំយកផលិតផលខ្មែរចូលទៅតាមបណ្តាផ្សារទំនើប និងម៉ាតនៅកម្ពុជា ដោយមានការតាំងបង្ហាញផលិតផលខ្មែរចម្រុះជាច្រើនមុខផងដែរ។
ឯកឧត្តម រដ្ឋលេខាធិការ បានផ្តល់យោបល់ និងអនុសាសន៍ណែនាំដល់អ្នកផលិត អ្នកផ្គត់ផ្គង់ផលិតផលខ្មែរ ឲ្យយកចិត្តទុកដាក់ខ្ពស់ក្នុងការផលិតនូវផលិតផលប្រកបដោយគុណភាព ធានានូវសុវត្ថិភាពប្រើប្រាស់ មានការវេចខ្ចប់ត្រឹមត្រូវតាមស្តង់ដារ និងមានតម្លៃសមរម្យ ដើម្បីមានប្រៀបក្នុងការប្រកួតប្រជែង ទាំងលើទីផ្សារក្នុងស្រុក និងទីផ្សារក្រៅប្រទេស។
ឯកឧត្តម ស៊ាង ថៃ បានបញ្ជាក់ថា៖ ក្នុងទិសដៅជំរុញ គាំទ្រ និងប្រើប្រាស់ផលិតផលខ្មែរឱ្យកាន់តែទូលំទូលាយនៅលើទីផ្សារក្នុងស្រុក ជាពិសេសការបញ្ជូនទំនិញ ទៅដាក់លក់ក្នុងផ្សារទំនើប និងម៉ាត។
សូមបញ្ជាក់ថា កម្មវិធីនេះក៏ជាវេទិកាមួយផ្តល់ឱកាសជូនអ្នកផលិត អ្នកផ្គត់ផ្គង់ផលិតផលខ្មែរ បានលើកឡើងពីបញ្ហាប្រឈម និងសំណូមពរជូនម្ចាស់ផ្សារទំនើប និងម៉ាត ពាក់ព័ន្ធនឹងការនាំយកផលិតផលខ្មែរដាក់លក់ក្នុងផ្សារទំនើប និងម៉ាត ក្រោមកិច្ចសម្របសម្រួលពីក្រសួងពាណិជ្ជកម្ម។
សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ធ្លាប់បានអំពាវនាវតាមរយៈសារលិខិតអបអរទិវាជាតិលើកកម្ពស់ការប្រើប្រាស់ផលិតផលខ្មែរ ថ្ងៃទី៩ ខែមេសា លើកទី៨ ឆ្នាំ២០២៥ ដែលនឹងត្រូវប្រារព្ធឡើងក្រោមប្រធានបទ «ប្រើប្រាស់ផលិតផលខ្មែរ គឺមោទនភាពជាតិខ្មែរ»។
សម្តេចធិបតី បានអំពាវនាវ ដល់ប្រជាពលរដ្ឋគ្រប់រូបឱ្យគាំទ្រ និងទិញផលិតផលខ្មែរយកទៅប្រើប្រាស់ប្រកបដោយស្មារតីជាតិនិយម និងបណ្តុះមនសិការ «ខ្មែរស្រឡាញ់ខ្មែរ ខ្មែរប្រើប្រាស់ ផលិតផលខ្មែរ ជាមោទនភាពជាតិខ្មែរ» ដើម្បីរួមចំណែកធ្វើឱ្យផលិតកម្មក្នុងស្រុកបន្តអត្ថិភាព សំដៅលើកកម្ពស់ កិត្យានុភាពជាតិ និងភាពម្ចាស់ការ។
សម្តេចធិបតី ហ៊ុន ម៉ាណែត ក៏បានស្នើឱ្យក្រសួង ស្ថាប័នពាក់ព័ន្ធទាំងអស់ ថ្នាក់ជាតិ និងថ្នាក់ក្រោមជាតិ ក៏ដូចជាដៃគូអភិវឌ្ឍ អង្គការមិនមែនរដ្ឋាភិបាលជាតិ អន្តរជាតិ វិស័យឯកជន បន្តកិច្ចសហការជាមួយគណៈកម្មាធិការជាតិជំរុញចលនាភូមិមួយ ផលិតផលមួយ ដើម្បីជួយពង្រឹងផលិតករខ្មែរឱ្យអភិវឌ្ឍផលិតផលរបស់ខ្លួន ឱ្យកាន់តែមានគុណភាពខ្ពស់ សម្បូរបែប កាន់តែមានទំនុកចិត្តពីអ្នកប្រើប្រាស់ និងមានសក្តានុពលពាណិជ្ជកម្ម ទាំងលើទីផ្សារជាតិ និងអន្តរជាតិ៕
Account
Security
Favourite Content