សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ តាមផែនការអភិវឌ្ឍតំបន់ឆ្នេររបស់រាជរដ្ឋាភិបាលកម្ពុជា កំពតបាន និងកំពុងក្លាយជាខេត្តមួយដែលមានការអអភិវឌ្ឍផ្នែកឧស្សាហកម្ម និងកំពុងទាក់ទាញវិនិយោគិនបរទេសចូលមកបណ្ដាក់ទុនជាបន្តបន្ទាប់ ។ យោងតាមប្រសាសន៍សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាបានឱ្យដឹងថា សម្ដេចបានចុះហត្ថលេខាយល់ព្រមឱ្យបង្កើតតំបន់សេដ្ឋកិច្ចពិសេស ២ ទៅ ៣ កន្លែងហើយនៅក្នុងខេត្តកំពត ។
ថ្លែងនៅក្នុងពិធីសម្ពោធដាក់ឱ្យប្រើប្រាស់ជាផ្លូវការនូវផ្លូវជាតិចំនួន៣ខ្សែ ( លេខ៣១ លេខ៣៣ និងលេខ៤១ ) កាលពីព្រឹកថ្ងៃទី២៩ ខែមេសា ឆ្នាំ២០២៥ សម្ដេចមហាបវរធិបតី ហ៊ុន ម៉ាណែត បានមានប្រសាសន៍ថា ខេត្តកំពតបច្ចុប្បន្ននេះ វាមិនត្រឹមតែជាខេត្តដែលមានសក្ដានុពលទេសចរណ៍ទេ ប៉ុន្តែវាកំពុងក្លាយជាតំបន់ដែលមានសក្ដានុពលលើវិស័យឧស្សាហកម្ម ដោយបច្ចុប្បន្ននេះ មានក្រុមហ៊ុនមួយគ្រោងវិនិយោគលើការផលិតទំនិញសម្រាប់ផ្គត់ផ្គង់នៅលើពិភពលោក ដោយប្រើប្រាស់កំពង់ផែទឹកជ្រៅខេត្តកំពតសម្រាប់ការងារដឹកជញ្ជូន ។
សម្ដេចបន្តថា រោងចក្រដែលគ្រោងនឹងបង្កើតនៅក្នុងខេត្តកំពតនេះ បានបើកដំណើរនៅកម្ពុជាជាច្រើនកន្លែងរួចមកហើយ និងបានចំណាយទុនជាង១ពាន់លានដុល្លារ ហើយកំពុងចរចាក្នុងការបង្កើតរោងចក្រមួយទៀតនៅក្នុងខេត្តកំពត ដែលមានតម្លៃរាប់ពាន់លានដុល្លារអាមេរិក ។
សម្ដេចបានបន្តទៀតថា ៖
«កាលមុន ផ្ដោតខ្លាំងលើខេត្តព្រះសីហនុ ដោយវិនិយោគិនជាច្រើនបណ្ដាក់ទុនវិនិយោគក្នុងខេត្តព្រះសីហនុ ប៉ុន្តែបច្ចុប្បន្ននេះ ចាប់ផ្ដើមរីកមកកាន់ខេត្តកំពតជាបណ្ដើរៗហើយ ហើយនៅពេលខាងមុខ ពោលគឺក្រោយការតភ្ជាប់ផ្លូវទឹកនៃគម្រោងព្រែកជីកហ្វូណនតេជោ ខេត្តតាកែវក៏ជាខេត្តមួយអាចទាក់ទាញការវិនិយោគក្នុងវិស័យឧស្សាហកម្ម ដើម្បីផលិតរួចនាំចេញទៅកាន់ទីផ្សារអន្តរជាតិ »។
សម្ដេចបានបន្ថែមថា តាមរយៈផ្លូវចំនួន៣ខ្សែ ដែលបានសម្ពោធដាក់ឱ្យប្រើប្រាស់នៅក្នុងឱកាសនេះ នឹងបង្កើតឱ្យមានបណ្ដាញប្រទាក់ក្រឡាគ្នា ហើយអ្នកដែលបានផលគឺអ្នកនៅក្នុងខេត្តជាប់ផ្លូវជាតិទាំងនោះ និងប្រជាពលរដ្ឋដែលកំពុងស្នាក់នៅ និងធ្វើការនៅក្នុងខេត្តជាប់ផ្លូវជាតិទាំង៣ខ្សែនេះ ។ ទាំងនេះគឺជាលទ្ធផលនៃការដើរទាក់ម៉ូយរបស់រាជរដ្ឋាភិបាលក្នុងការនាំវិនិយោគិនមកបណ្ដាក់ទុនវិនិយោគ បង្កើតឱកាសការងារ និងប្រាក់ចំណូល ។
បើតាមអ្នកជំនាញនៃវិស័យអចលនទ្រព្យបានលើកឡើងថា តាមបណ្ដោយផ្លូវជាតិសំខាន់ៗទៅកាន់ខេត្តកំពត ក៏នឹងមានសក្ដានុពលក្នុងការបង្កើតជាឃ្លាំង រោងចក្រ ឬឃ្លាំងស្តុកទំនិញផងដែរ ។
លោក ប៉ូ អ៊ាវគង់ បានលើកឡើងថា ក្រោយរដ្ឋាភិបាល បានអភិវឌ្ឍន៍ផ្លូវទៅកាន់ខេត្តកំពតកាន់តែមានគុណភាព និងធំទូលាយជាងមុន ឃើញថាតាមបណ្ដោយផ្លូវទាំងនោះ មានការចាប់អារម្មណ៍ពីអ្នកវិនិយោគសម្រាប់សាងសង់ឃ្លាំងស្តុកទំនិញ និងរោងចក្រ ។ អ្វីដែលពិសេស ក្រោយពេលរដ្ឋបានអភិវឌ្ឍន៍កំពង់ផែទឹកជ្រៅក្នុងខេត្តកំពត ក៏បានធ្វើឱ្យសក្ដានុពលក្នុងការទាក់ទាញអ្នកវិនិយោគ កាន់តែខ្លាំងជាងមុនថែមទៀត ៕
Account
Security
Favourite Content