ភ្នំពេញ ៖​ បច្ចុប្បន្នទំនិញកំពុងមានវត្តមាននៅក្នុងទីផ្សារគឺជាផលិតផលដែលផលិតនៅកម្ពុជាបន្ទាប់ពីកម្ពុជាបានធ្វើពហិកា និងកាត់បន្ថយ ការនាំចូលផលិតផលមួយចំនួន ពីប្រទេសថៃ ។ ខណៈដែលរាជរដ្ឋាភិបាលប្តេជ្ញាធ្វើពិពិធកម្មនិងពង្រឹងទីផ្សារក្នុងស្រុក ដោយលើកកម្ពស់ បង្កើន និងលើកទឹកចិត្តដល់ការប្រើប្រាស់ផលិត​ផលកម្ពុជា គាំទ្រអ្នកផលិត គុណភាព និងការ​វេចខ្ចប់។ នេះបើយោងតាមអ្នកនាំពាក្យក្រសួងពាណិជ្ជកម្ម ។

ឯកឧត្តម ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម បានថ្លែងនៅក្នុងសន្និសីទសារព័ត៌មានកាលពីថ្មីៗនេះថា៖

«បច្ចុប្បន្នទំនិញភាគច្រើនដែលផ្គត់ផ្គង់នៅក្នុងទីផ្សារ គឺជាផលិតផល ផលិតនៅក្នុងប្រទេសកម្ពុជា »។

ឯកឧត្តម រដ្ឋលេខាធិការ បានបន្ថែមថា ក្រៅពីផលិតផលដែលផលិតនៅកម្ពុជា ភាគរយនៅសេសសល់ កម្ពុជាកំពុងតែបាននាំចូលទំនិញ ពីប្រទេសវៀតណាម ម៉ាឡេស៊ី ឥណ្ឌូនេស៊ី សឹង្ហបុរី និងប្រទេសដទៃទៀតនៅក្នុងតំបន់ផងដែរ។

ឯកឧត្តម ប៉ែន សុវិជាតិ បានបញ្ជាក់ថា៖ កម្ពុជាបានឈប់នាំចូលប្រេង ឧស្ម័ន បន្លែ និងផ្លែឈើពីប្រទេសថៃ ហើយឥឡូវនេះនាំចូលផលិតផលទាំងនេះពីវៀតណាម និងប្រទេសសិង្ហបុរី ជំនួសវិញ។

ឯកឧត្តមរដ្ឋលេខាធិការ បានកត់សម្គាល់ថា ចាប់តាំងពីមានភាពតានតឹងរវាងកម្ពុជា និងថៃក្នុងខែកក្កដា ក្រសួងពាណិជ្ជកម្មបានសង្កេតឃើញថា សកម្មភាពពាណិជ្ជកម្មរបស់កម្ពុជា ការផ្គត់ផ្គង់ក្នុងស្រុកនិងសមត្ថភាពក្នុងការចាប់យកឱកាសថ្មីៗដោយឯករាជ្យបានក្លាយជាចំណុចសំខាន់រួមក្នុងចំណោមប្រជាពលរដ្ឋឧស្សាហករ ផលិតករ អាជីវករ សហគ្រិននិងវិនិយោគិ​ន​។

ឯកឧត្តម ប៉ែន សុវិជាតិ បានលើកឡើងថា៖

«ប្រជាពលរដ្ឋរបស់យើង ក្នុងនាមជាអ្នកប្រើប្រាស់ ឥឡូវនេះអនុវត្តតាមគោលការណ៍មួយគឺ ផ្តល់តម្លៃដល់ផលិតផលកម្ពុជា។ សហគ្រាសធុនតូច និងមធ្យមអនុវត្តតាមគោលការណ៍មួយគឺ ខិតខំផលិតផលិតផលដែលមានគុណភាព និងពង្រីកភាពចម្រុះផលិតផល ដើម្បីធានាថាការផ្គត់ផ្គង់ក្នុងស្រុកបំពេញតម្រូវការរបស់អ្នកប្រើប្រាស់»។

ឯកឧត្តម អ្នកនាំពាក្យ បានបន្តលើកឡើងថា៖ រដ្ឋាភិបាលរក្សាជំហរច្បាស់លាស់ក្នុងការធ្វើពិពិធកម្ម និងពង្រឹងទីផ្សារក្នុងស្រុក ដោយលើកកម្ពស់ បង្កើន និងលើកទឹកចិត្តដល់ការប្រើប្រាស់ផលិតផលកម្ពុជា គាំទ្រដល់អ្នកផលិត និងការពារគុណភាព សុវត្ថិភាព និងសុខភាពសាធារណៈចំណីអាហារ តាមរយៈការពង្រឹងស្តង់ដារត្រួតពិនិត្យ និងការវេចខ្ចប់។

ឯកឧត្តម ប៉ែន​សុវិជាតិ ក៏បានអំពាវនាវដល់ឧកញ៉ា វិនិយោគិន និងអ្នកផលិតក្នុងស្រុកពង្រីកផលិតកម្ម កែលម្អបច្ចេកវិទ្យា បង្កើនគុណភាពផលិតផល និងជាពិសេសកំណត់តម្លៃសមរម្យ ដើម្បីលើកទឹកចិត្តដល់ការប្រើប្រាស់ផលិត​ផលក្នុងស្រុក និងជំរុញការនាំចេញ។ឯកឧត្តម សង្ឃឹមថាប្រជាជនកម្ពុជានឹងគាំទ្រផលិតផលក្នុងស្រុកឱ្យបានច្រើន តាមដែលអាចធ្វើទៅបាន​៕

ប្រធាននាយកដ្ឋានសេដ្ឋកិច្ចអន្តរជាតិ នៃរាជបណ្ឌិត្យសភាកម្ពុជា បណ្ឌិត ហុង វណ្ណៈ បានប្រាប់ AMS Economy ថា ស្ថានភាពនេះបង្ហាញពីឱកាសដ៏មានតម្លៃសម្រាប់កម្ពុជា ពិសេសក្នុងការបង្កើនសមត្ថភាពផលិតកម្មក្នុងស្រុក ដើម្បីផ្គត់ផ្គង់ទីផ្សារ ក៏ដូចជាការបង្វែរការនាំចេញទៅកាន់ប្រទេសអាស៊ាន និងទីផ្សារផ្សេងទៀត។

លោកបណ្ឌិត បានឱ្យដឹងថា កម្ពុជាយើងផលិតតែទំនិញមួយចំនួន ទៅលក់នៅក្នុងក្របខ័ណ្ឌប្រទេសអាស៊ាន ភាគច្រើនគឺយើងនាំផលិតផលកសិផល និងគ្រឿងអេឡិចត្រូនិច ជាដើម ។            

បណ្ឌិត ហុងវណ្ណៈ ក៏បានឱ្យដឹងថា សូម្បីផលិតផលសម្រាប់ចូលទៅកាន់ទីផ្សារ RCEP ក៏ដូចគ្នាដែរ មិនទាន់មានផលិតផលសម្បូរបែប និងធុនធ្ងន់នៅឡើយ ។ តាមការសង្កេតឃើញ ក្នុងទីផ្សារRCEP មានការនាំចេញសម្លៀកបំពាក់ទីផ្សារជប៉ុន កូរ៉េ ចំណែកឧស្សហកម្មកាត់ដេរមួយភាគធំ​ យើងនាំទៅទីផ្សារ សហរដ្ឋអាមេរិក និងអឺរ៉ុប។ទោះជាយ៉ាងណា លោកបណ្ឌិត បានបញ្ជាក់ថា ក្នុងកម្រិតអាស៊ានភាគច្រើនយើងបាននាំចេញ ដោយសារតែការផលិតនៅកម្ពុជាបានច្រើនហើយ ​តែ​មិនទាន់ឆ្លើយតបនូវតម្រូវការនៅឡើយ និងកំពុងស្ថិតនៅក្នុងដំណាក់ការប្រជ្រៀតចូលទៅក្នុងទីផ្សារនេះ៕