បរទេស៖ យោងតាមប្រភពព័ត៌មានពី The Guardian បានរាយការណ៍ថា ប្រធានាធិបតីអាម៉េរិក លោក Donald Trump បានបង្ហាញពីគម្រោងផែនការទូលំទូលាយនៅក្នុងកិច្ចព្រមព្រៀងពាណិជ្ជកម្មជាមួយចក្រភពអង់គ្លេស។

នេះគឺជាកិច្ចព្រមព្រៀងលើកទីមួយគិតចាប់តាំងពី​ Trump ដាក់ពន្ធលើការនាំចូលពីប្រទេសផ្សេងៗកាលពីខែមេសា។ យ៉ាងណាមិញ ភាពជាក់លាក់ជាច្រើនអំពីកិច្ចព្រមព្រៀងនេះមិនមានភាពច្បាស់លាស់ភ្លាមៗនោះទេ ហើយក៏មិនទាន់ត្រូវបានចុះហត្ថលេខាផងដែរ ប៉ុន្តែ Trump អះអាងថា ព័ត៌មានលម្អិតចុងក្រោយកំពុងត្រូវបានសរសេរឡើង។ កិច្ចព្រមព្រៀងនឹងរួមបញ្ចូលការបង្កើនទីផ្សាររាប់ពាន់លានដុល្លារសម្រាប់ការនាំចេញរបស់អាម៉េរិក ហើយចក្រភពអង់គ្លេសនឹងកាត់បន្ថយ ឬលុបបំបាត់របាំងមិនមែនពន្ធគយជាច្រើនចំពោះផលិតផលអាម៉េរិក។ ខាងក្រោមនេះគឺជារបាយការណ៍មួយពីសេតវិមានបង្ហើបពីចំណុចមួយចំនួននៅក្នុងកិច្ចព្រមព្រៀងពាណិជ្ជកម្ម៖

_ អាម៉េរិកនឹងរក្សា​​ពន្ធ ១០% ​លើ​ការ​នាំ​ចូល​របស់ចក្រភពអង់គ្លេស
_កែសម្រួលពន្ធលើរថយន្តរបស់ចក្រភពអង់គ្លេស ដោយរថយន្ត ១ សែនគ្រឿងដំបូងដែលនាំចូលពីក្រុមហ៊ុនផលិតរថយន្តរបស់ចក្រភពអង់គ្លេសជារៀងរាល់ឆ្នាំត្រូវមានអត្រា ១០% ហើយយានយន្តបន្ទាប់ពីនោះនឹងប្រឈមអត្រាពន្ធ ២៥%

_ បង្កើតឱកាស ៥ ពាន់លានដុល្លារសម្រាប់ការនាំចេញសម្រាប់កសិករ អ្នកចិញ្ចឹមសត្វ និងអ្នកផលិតរបស់សហរដ្ឋអាម៉េរិក រួមមានការនាំចេញអេតាណុលមានតម្លៃជាង ៧០០ លានដុល្លារ និងសាច់គោអាម៉េរិក និងផលិតផលកសិកម្មផ្សេងទៀត ២៥០ លានដុល្លារ

_ ប្រទេស​ទាំង​ពីរប្ដេជ្ញា​ចិត្ត​ធ្វើ​ការ​រួម​គ្នា​ដើម្បី​លើក​កម្ពស់​ការ​ចូល​ដំណើរការ​ទីផ្សារ​ឧស្សាហកម្ម និង​កសិកម្ម

_ បិទចន្លោះប្រហោង និងបង្កើនការប្រកួតប្រជែងរបស់ក្រុមហ៊ុនអាម៉េរិកនៅក្នុងទីផ្សាររបស់អង់គ្លេស

_ ពង្រឹងនីតិវិធីពន្ធគយសម្រាប់ការនាំចេញរបស់អាម៉េរិក។

_ ការប្តេជ្ញាចិត្តទាក់ទង​នឹងកម្មសិទ្ធិបញ្ញា កម្លាំងពលកម្ម និងបរិស្ថាន

_ ធានាខ្សែសង្វាក់ផ្គត់ផ្គង់របស់ក្រុមហ៊ុនផលិតអវកាសអាម៉េរិកតាមរយៈការចូលប្រើប្រាស់ជាអាទិភាពចំពោះសមាសធាតុអវកាសដែលមានគុណភាពខ្ពស់របស់អង់គ្លេស

_ បង្កើតខ្សែសង្វាក់ផ្គត់ផ្គង់សុវត្ថិភាពសម្រាប់ផលិតផលឱសថ

_ តម្រូវ​ឱ្យ​សហរដ្ឋ​អាមេរិកបង្កើត​ផែនការ​ផ្សេង​មួយទៀត ​ដើម្បី​ជំនួស​ពន្ធ​ដែក​និង​អាលុយមីញ៉ូម​ផ្នែក​ទី ២៣២។

ទន្ទឹមនឹងនេះ នាយករដ្ឋមន្រ្តីចក្រភពអង់គ្លេស Keir Starmer ដែលបានចូលរួមជាមួយ Trump ពីចម្ងាយលើកឡើងថា ពួកគេនឹងកសាងវេទិកាដែលអស្ចារ្យសម្រាប់អនាគត។ យ៉ាងណាមិញ អ្នកជំនាញខ្លះព្យាករណ៍ថា កិច្ចព្រមព្រៀងដែលអាម៉េរិកនឹងធ្វើជាមួយចក្រភពអង់គ្លេស នឹងមិនអាចធ្វើម្តងទៀតបានដោយងាយជាមួយប្រទេសផ្សេងទៀតនោះទេ ដោយសារប្រទេសទាំងនោះមានឱនភាពពាណិជ្ជកម្មដ៏ធំជាមួយនឹងអាម៉េរិក៕