សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ រាជរដ្ឋាភិបាលកម្ពុជា បានបន្តយកចិត្តទុកដាក់គិតគូរ គ្រប់គ្រង និងអភិរក្សតំបន់រមណីយដ្ឋានបេតិកភណ្ឌពិភពលោកអង្គរឱ្យមានរបៀបរៀបរយ និងបានព្យាយាមដោះស្រាយបញ្ចប់វិវាទទាំងស្រុងរវាងប្រជាជនដែលរស់នៅទាំង ១១៤ ភូមិនៃតំបន់បេតិកភណ្ឌអង្គរជាមួយនឹងអាជ្ញាធរជាតិអប្សរា ។
នៅថ្ងៃទី០៨ ខែឧសភា ឆ្នាំ២០២៥ ក្រសួងរៀបចំដែនដី នគរូបនីយកម្ម និងសំណង់ ក៏បានបើកកិច្ចប្រជុំមួយដើម្បីពិគ្រោះយោបល់លើការរៀបចំលក្ខខណ្ឌនៃការប្រើប្រាស់ដី និងការគ្រប់គ្រងនៅរមណីយដ្ឋានបេតិកភណ្ឌពិភពលោកអង្គរ ដែលបានធ្វើឡើងនៅទីស្ដីការក្រសួងរៀបចំដែនដី នគរូបនីយកម្ម និងសំណង់ ។
បើតាមឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានឱ្យដឹងថា ការជួបជុំគ្នានាពេលនេះធ្វើឡើងបន្ទាប់ពីក្រុមការងារបានចុះវាយតម្លៃសារជាថ្មីឡើងវិញនូវការប្រើប្រាស់ដីក្នុងតំបន់ដែលបានកំណត់ថាជាតំបន់បេតិកភណ្ឌអង្គរ ហើយតំបន់នេះគ្របដណ្ដប់លើ ១១៤ភូមិ។
ឯកឧត្តម បានលើកឡើងថា ៖
«ស្របតាមការប្រែប្រួលនៃប្រជាសាស្ត្រ និងស្ថានភាពវិវត្តន៍នៃសង្គម សេដ្ឋកិច្ចកម្ពុជានិងស្ថានការណ៍វិវត្តន៍នៃនយោបាយ និងសេដ្ឋកិច្ចរបស់ពិភពលោកផងនោះធ្វើឱ្យចំនួនភ្ញៀវទេសចរណ៍ដែលមកទស្សនាកម្សាន្តប្រាសាទអង្គរវត្តមានការប្រែប្រួល ដូច្នេះទើបក្រុមការងារបានចាប់ផ្ដើមធ្វើការវាយតម្លៃឡើងវិញ ស្របតាមការកំណត់របស់រាជរដ្ឋាភិបាលកម្ពុជា ជាពិសេស សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី ក្នុងនីតិកាលទី៧ ដែលយើងចង់បានការគ្រប់គ្រងមួយមានភាពជាក់លាក់ក្នុងតំបន់បេតិកភណ្ឌពិភពលោកអង្គរ ហើយក៏ត្រូវបញ្ចប់ទាំងស្រុងនូវវិវាទរវាងប្រជាជនដែលរស់នៅក្នុង ១១៤ ភូមិក្នុងតំបន់បេតិកភណ្ឌអង្គរជាមួយនឹងអាជ្ញាធរជាតិអប្សរាផងដែរ»។
ឯកឧត្តមបានបញ្ជាក់ឱ្យដឹងទៀតថា ចំណែកឯការទទួលខុសត្រូវក៏ត្រូវកំណត់ឡើងវិញចំពោះរដ្ឋបាលមូលដ្ឋាន អាជ្ញាធរជាតិអប្សរា ហើយក្រសួងរៀបចំដែនដី នគរូបនីយកម្ម និងសំណង់ ព្រមទាំងសហការីនៃក្រសួងវប្បធម៌ និងវិចិត្រសិល្បៈ គឺជាអ្នកទទួលខុសត្រូវចំពោះមុខរាជរដ្ឋាភិបាល និងប្រជាជនកម្ពុជានូវការរៀបចំលក្ខខណ្ឌនៃការប្រើប្រាស់ដី និងការគ្រប់គ្រងនៅរមណីយដ្ឋានបេតិកភណ្ឌអង្គរ។
ឯកឧត្តមឧបនាយករដ្ឋមន្ត្រី បញ្ជាក់ថា ៖ «ខឿនសេដ្ឋកិច្ចនៅខេត្តសៀមរាបគឺពឹងផ្អែកទៅលើទេសចរណ៍ ដូច្នេះ តាមរយៈកិច្ចប្រជុំនេះ ត្រូវមានការឯកភាពគ្នា និងត្រូវចូលរួមអនុវត្តក្នុងការងាររៀបចំលក្ខខណ្ឌនៃការប្រើប្រាស់ដី និងការគ្រប់គ្រងឱ្យបានច្បាស់លាស់ មានប្រសិទ្ធភាព ដើម្បីអភិរក្សតំបន់រមណីយដ្ឋានបេតិកភណ្ឌពិភពលោកអង្គរឱ្យមានសោភ័ណភាព និងមានរបៀបរៀបរយ កសាងហេដ្ឋារចនាសម្ព័ន្ធនានាក្នុងខេត្តសៀមរាបសម្រាប់ទាក់ទាញភ្ញៀវទេសចរ ហើយម្យ៉ាងទៀតក៏ត្រូវគិតគូរពីជីវភាពរស់នៅរបស់ប្រជាពលរដ្ឋក្នុងខេត្ត ជាពិសេសប្រជាពលរដ្ឋដែលរស់នៅក្នុង ១១៤ ភូមិនៃតំបន់បេតិកភណ្ឌអង្គរឱ្យទទួលបានផលប្រយោជន៍ច្រើន និងមានជីវភាពល្អប្រសើរផងដែរ» ៕
Account
Security
Favourite Content